اقتوبەدە وسىدان ءتورت اي بۇرىن 9-سىنىپتىڭ 4 وقۋشىسى 7 جاسار بالاعا قىسىم كورسەتىپ، مەكتەپ ىشىندەگى دارەتحانادا زورلاعان دەپ حابارلايدى "ادىرنا" ۇلتتىق پورتالى "ەۋرازيا" ءبىرىنشى ارناسىنا سىلتەمە جاساپ.
بۇل وقيعا تۋرالى ءزابىر كورگەن وقۋشىنىڭ اجەسى حابارلاعان. ونىڭ ايتۋىنشا، ءىس قۇزىرلى ورگاندارعا جەتكەنىمەن، تەرگەۋ امالدارى دۇرىس جۇرگىزىلمەگەن. ول بالاسىن قورلاعاندار جازادان سىتىلىپ كەتە مە دەپ الاڭداۋلى. ونىڭ مەكتەپ باسشىلىعى مەن ۇستازدارعا، پوليتسيا تەرگەۋشىسىنە قويار ساۋالى كوپ.
اتالعان وقيعا بيىل ناۋرىز ايىندا بولعان. جەتى جاستاعى ەر بالانىڭ استاڭ-كەستەڭ بولعان ىشكى كۇيزەلىسىن اجەسى ونىڭ سالعان سۋرەتىنەن بايقاعان.
"دارەتحانادا قولىمدى بۇرادى، قۇلاعىمدى بۇرادى، تەپتى، باسىمنان يتەرىپ قۇلاتتى، ۇردى دەدى. ۇيگە كەلىپ بالامدى سۋعا تۇسىرەيىن دەسەم، دەنەسىن ۇستاتپايدى، ەش جەرىن جۋعىزبايدى. "جوق، جوق، اۋىرادى" دەپ. سودان ساعان نە ىستەدى دەپ، سول كەزدە ماعان سونداي ارەكەت جاسادى دەپ ايتتى. مەكتەپتىڭ دارەتحاناسىندا ءتورت بالا ءتيىستى، بىرەۋى كۇزەتتە تۇردى دەدى", — دەيدى وقۋشىنىڭ اجەسى.
جەتى جاستاعى وقۋشى مەكتەپكە بارعىسى كەلمەيتىنىن اناسىنا دا ايتقان. "قورقام، اپاي كۇتىپ السىن" — دەپتى. بىراق اناسى ونى بالالىعى بولار دەپ ويلاپتى. ال مەكتەپتەگى ۇستازدارى مەن ديرەكتور بولسا، كەشىگىپ كەلگەن بالادان نەگە ءمان-جايدى انىقتاماعان دەپ اجەسى شىر-پىر. ءدال سول كۇنى بارلىق بەينەكامەرا ىستەپ تۇرعاندا، دارەتحاناعا كىرە-بەرىستەگىسىنىڭ ىستەن شىققانىنا دا كۇدىكتەنىپ وتىر. وقۋشىنىڭ اجەسى ءىستىڭ دۇرىس تەرگەلگەنىنە دە كۇمانمەن قارايدى.
"بالامدى مازاق ەتىپ، ۇرىپ-سوعىپ، زورلاعان بالا قازىر بوستاندىقتا ءجۇر. بۇل بالا ەكى اي بويى تەرگەلگەن جوق. ەندى بارىپ تەرگەۋشىدەن سۇراسام، بۇل بالا اكەسىمەن باسقا جاققا كەتىپ قالدى، ەندى كەلگەسىن تەرگەلەدى دەيدى. ول قاشان كەلەدى؟", — دەيدى جابىرلەنۋشىنىڭ اجەسى.
قازىر ءتارتىپ ساقشىلارى ءتورتىنشى كۇدىكتىنىڭ انىقتالعانىن جانە تەرگەۋ جۇرگىزىلەتىنىن حابارلادى. قىلمىستىق ءىستى وبلىستىڭ باس پوليتسەيى ءوز باقىلاۋىنا العان.
"جاس بالاعا قاتىستى ناپسىقۇمارلىق سيپاتتاعى كۇش قولدانۋ فاكتىسى بويىنشا قىلمىستىق كودەكستىڭ 121-بابى، 4-بولىگىمەن تىركەلگەن قىلمىستىق ءىسى بار. بارلىق تەرگەۋ ارەكەتتەرى اياقتالعان سوڭ، سونىمەن قاتار ساراپتاما قورىتىندىسى الىنعاننان كەيىن قىلمىستىق ءىس بويىنشا تۇپكىلىكتى پروتسەسسۋالدىق شەشىم قابىلدانادى", — دەيدى وبلىستىق پوليتسيا دەپارتامەنتى №3 قالالىق پوليتسيا ءبولىمى باسشىسىنىڭ ورىنباسارى ر.جانۇزاقوۆ.
سۇمدىق جايتتان كەيىن بالانىڭ پسيحيكاسى بۇزىلعان. كۇندىز كۇلكى، تۇندە ۇيقىدان ايىرىلعان ءبۇلدىرشىن 2 اي بويى پسيحولوگتىڭ باقىلاۋىندا بولىپ، 1 اپتا اۋرۋحانادا جاتىپ شىققان. دارىگەرلەر ونىڭ دەنساۋلىعىندا كىنارات بار ەكەنىن ايتقان. ءالى ءدارى-دارمەك ءىشىپ ءجۇر. "نەمەرەمنىڭ بالالىق شاعىن ۇرلادى" دەپ جىلاعان انا پرەزيدەنتتەن اراشا سۇراپ ءجۇر.
"ادىرنا" ۇلتتىق پورتالى.
