قىزىعى مەن شىجىعى كوپ فۋتبولدان ەۆروپا چەمپيوناتىنىڭ شيرەك فينالدىق ويىندارى مارەسىنە جەتتى. جارىس جولىندا سايدىڭ تاسىنداي ىرىكتەلگەن ءتورت كوماندا عانا قالدى. دراماعا مەن تارتىسقا تولى وتكەن ەۋرو 2020 دوداسىنىڭ ¼ فينالدىق كەزدەسۋلەردىڭ ناتيجەسىن سىزدەرمەن بىرگە تالقىلاساق.
شۆەيتساريالىق ەرتەگى اياقتالدى. تاڭ قالدىردى، تاڭداندىردى.
شۆەيتساريا 1-1 يسپانيا (پەنالتي سەرياسى بويىنشا 1-3)
جارىستىڭ پلەي-وفف كەزەڭى باستالعالى بەرى بارشا جانكۇيەرلەردىڭ سۇيىسپەنشىلىگىنە بولەنگەن شۆەيتساريا قۇراماسى جارىستى اياقتادى. ءوز جولدارىندا ءتىپتى الەم چەمپيوندارى فرانتسيا قۇراماسىن جولدا قالدىرعان شۆەيتساريالىق فۋتبولشىلارعا قانداي ماقتاۋ ايتساق تا جاراسادى. دەسەك تە شيرەك فينالدىق كەزەڭىڭ العاشقى ماتچىندا يسپانيا قۇراماسىنىڭ ويىن جاعىنان باسىمدىعى انىق بايقالدى. ىسقىرىق پارمەنى بەرىلگەننەن اق شابۋىلعا لاپ قويعان يسپاندىقتار 8-مينۋتتا شۆەيتسار قورعاۋشىسى دەنيس زاكاريانىڭ قاتەلىگىنەن ەسەپ اشتى. العاشقى گولدان كەيىن يسپان فۋتبولشىلارى وزدەرىنىڭ جەڭىسىنە تىم سەنىمدى بولعانداي كورىندى. باپكەردىڭ ءدا ءدال سولاي ويلاعانى ەكىنشى تايم باستالعان ساتتە جەتەكشى فۋتبولشىلارى پاۋلو سارابيا مەن الۆارتو موراتانىڭ ورنىنا وزگە فۋتبولشىلاردى شىعارعانىنان بايقالدى. قاتەلىكتەر وسى جەردەن باستالدى. اتالعان ەكى فۋتبولشىنىڭ ورنىن باسقان داني ولمو مەن جەرار مورەنو قارسىلاس قاقپاسىن ءدال كوزدەي المادى. قىراعىلىق تانىتۋعا شۆەيتسار قاقپاشىسى يان زوممەر مۇكىندىك تە بەرمەدى. بوساڭسىعان يسپان قورعاۋشىلارىنىڭ قاتەلىگىن ۇتىمدى پايدالانعان شۆەيتساريالىق دجەردان شاكيري 68 مينۋتتا تارازى باسىن تەڭەستىرسە، 77 مينۋتتا شاكيريگە پاس بەرگەن رەمو فرويلەر ءتارتىپ بۇزىپ الاڭنان قۋىلدى. تەڭ ناتيجەمەن اياقتالعان نەگىزگى ۋاقىتتان كەيىنگى قوسىمشا تايمداردا دا ەسەپ وزگەرگەن جوق. شۆەيتساريالىق قاقپاشى يان زوممەر اسقان شەبەرلىك تانىتىپ، 30 مينۋت ىشىندە ۇلتتىڭ باس قاھارمانىنا اينالىپ ۇلگەردى. وكىنىشكە وراي، پەنالتي سەرياسىندا شۆەيتساريالىق فۋتبولشىلار بىرىنەن كەيىن ءبىرى قاتەلەسىپ، ارماندارىنداعى ناتيجەگە سىنىق سۇيەم قالعاندا ءسۇرىندى. يسپانيالىقتار ءوز كەزەگىندە مۇمكىندىكتەرىن وتە ءساتتى ورىنداپ، جارتىلاي فينال جولداماسىن قورجىندارىنا سالدى.
جۇلدىزدى كوماندا جۇلدىزدى ويىنشىلاردى جەڭدى.
بەلگيا 1-2 يتاليا
جۋرناليستەر مەن جانكۇيەرلەردىڭ ويىندا ءتۋرنيردىڭ باستى ءفاۆوريتى سانالعان بەلگيا قۇراماسى جارىس جولىن ¼ فينالدان اياقتادى. فيفا رەيتينگى بويىنشا الەمنىڭ ءنومىرى ءبىرىنشى ۇلتتىق قۇراماسى سانالاتىن بەلگيالىقتاردىڭ ۇتىلۋىنا سەبەپ كوپ. تاقىرىپ قىلىپ كورسەتكەنىمىزدەي بەلگيا قۇراماسى ناعىز جۇلدىز فۋتبولشىلاردان جاساقتالعان. انگليا چەمپيوناتىنىڭ ۇزدىك ويىنشىسى كەۆين دە بريۋينە، الەم چەمپيوناتىنىڭ التىن قولعاپ يەگەرى تيبو كۋرتۋا، اعايىندى ەدەن جانە تورگان ازارلار، رومەلۋ لۋكاكۋ، اتاي بەرسەك سانىنان جاڭىلامىز. دەگەنمەن، قۇرامانىڭ جالعىز ءالسىز تۇسى-ەگدە جاستاعى قورعاۋشىلارىندا ەدى. مىنە، يتالياندىقتار ءدال وسى تۇستان اۋىرتا سوققىلار جاسادى. يتاليا قۇراماسىنا كەلەر بولساق، جاستىق پەن تاجىريبەنىڭ ادەمى قوسىندىسى دەسەك قاتەلەسپەيمىز. كوماندا بەلسەندى تۇردە شابۋىلعا دا شىعادى، قورعانىسقا دا ساۋاتتى ءمان بەرەدى. الاڭ ورتاسىندا قىسىم جاساپ، بەلگيانىڭ جۇلدىزدى ويىنشىلارىنىڭ ادىمىن اشتىرمايدى. ودان قالسا قاقپادا تۇرعان دجاننۋليدجي دوننارۋمما تۋرا سوققىلاردىڭ بالىعىن ەركىن قايتارىپ تۇردى. ونىڭ قاقپاسىنا كىرگەن جالقى گولدى رومەلۋ لۋكاكۋ سوقسا، جەڭىمپازدار تاراپىنان نيكولو بارەللا مەن لورەنتسو ينسينە قىراعىلىعىمەن كوزگە ءتۇستى. جارتىلاي فينال جولداماسىنا يە بولعان روبەرتو مانچيني باستاعان يتالياندىقتاردىڭ الار اسۋلارى الدا سەكىلدى، ال «جۇلدەسىز جۇلدىزدار» دەگەن لاقاپ اتقا يە بولعان بەلگيا قۇراماسىنىڭ ەندىگى جاعدايى نە بولاتىنى بەلگىسىز. قۇراما ماماندارىنىڭ سوزىنشە كوماندا الداعى ۋاقىتتا بۋىن الماسۋ پروتسەسسى ارقىلى نەگىزگى قۇرامعا بىرنەشە جاس فۋتبولشىلاردى ەنگىزبەك، بۇگىنگى قاتەلىكتەرىن قايتالاماس ءۇشىن.
دانيانىڭ داتى ۇزاققا سوزىلۋدا
چەحيا 1-2 دانيا
ەكى كوماندانى دا تۋرنيردە توسىن سىي جاساعان قۇرامالاردىڭ ساناتىنا جاتقىزا الامىز. چەحيالىقتار 1/8 فينالدا اتاقتى نيدەرلاندى قۇراماسىن جەڭسە، دانيالىقتار العاشقى تۋردا ورىن العان شوك جاعدايدان كەيىن ەستەرىن جيىپ، شيرەك فينالعا دەيىن جەتىپ وتىر. ويىن ايتارلىقتاي دەڭگەيدە وتە قىزىقتى ءارى تارتىستى ءوتتى. قوس قۇرامانىڭ تاراپىنان ورىن العان الما-كەزەك شابۋىلدار، جانكۇيەرلەردىڭ قولداۋى بارلىعى ويىننىڭ كوركىن ودان سايىن اشا ءتۇستى. يۋسسۋف پوۋلسەن، مارتين برەيتۋەيت باستاعان دات فۋتبولشىلارىنىڭ شابۋىلداعى ساۋاتتىلىقتارى تايعا باسقان تاڭباداي انىق بايقالدى. 8 مينۋتتا جارتىلاي قورعاۋشى توماس ديلەيني ەسەپ اشسا، 42 مينۋتتا شابۋىلشى كاسپەر دولبەرگ ەسەپتى ەسەلەپ، دانيانىڭ جارتىلاي فينالعا شىعۋ مۇمكىندىگىن ۇلعايتا ءتۇستى. ەكىنشى تايم چەحيالىقتاردىڭ تولاسسىز شابۋىلدارىمەن باستالىپ، ناتيجەسىندە پاتريك شيك ەسەپ ايىرماسىن قىسقارتتى. ەۋرو باستالعالى بەرى تەك ادەمى گولدار سوعىپ جۇرگەن چەح شابۋىلشىسى شيك تۋرنيردەگى بەسىنشى گولىن سوعىپ، سۇرمەرگەندەر كوشىندە كريشتيانۋ رونالدۋمەن تەڭەستى. قورىتىندى ەسەپ وسى كۇيىندە ساقتالدى، 2-1 ەسەبىمەن دانيا قۇراماسى جەڭىسكە جەتتى. كريستيان ەريكسەننىڭ جان تۇرشىگەرلىك وقيعاسىنان كەيىن جاقسى ويناۋدى وزدەرىنە ماقسات تۇتقان دات فۋتبولشىلارى جانكۇيەرلەردى قايتپاس قايسار رۋحىمەن باۋراپ الدى. جارتىلاي فينالدىڭ جولداماسى دا وسى ۇشان-تەڭىز ەڭبەكتىڭ قارىمتاسى سەكىلدى.
فۋتبول ءوز ۇيىنە ورالادى
ۋكراينا 0-4 انگليا
رەسمي تۇردە فۋتبول ويىنىنىڭ وتانى سانالاتىن اعىلشىن حالقى ەۋرودوداداعى ۇلكەن ناتيجەمەن ماقتانا الماي كەلە جاتقانىنا جارتى عاسىردان استى. اتالمىش كەزدەسۋ سول سەبەپتى انگليالىق كەز كەلگەن جانكۇيەرگە دە، فۋتبولشىعا دا اسا ماڭىزدى ەدى. ءسوز جۇزىندەگى مىقتىلىقتى اعىلشىندار العاشقى مينۋتتاردان اق ءىس جۇزىندەگى مىقتىلىققا اينالدىرۋعا تىرىستى. 4 مينۋتتا سوعىلعان حارري كەيننىڭ گولى بۇعان انىق دالەل ەدى. اندرەي شەۆچەنكو باستاعان ۋكراينا قۇراماسى العاشقى تايمنىڭ اياعىنا تامان ءتاۋىر قارسىلىق كورسەتكەنىمەن، كوماندانىڭ فيزيكالىق كۇشى ەكىنشى تايمدى دا ءدال سونداي قارقىندا وتكىزۋگە جەتە قويمادى. ەكىنشى تايم باستالعان ساتتەن شابۋىلعا لاپ قويعان «ارىستاندار» 5 مينۋتتىڭ ىشىندە قارسىلاستار قاقپاسىن ەكى رەت ءدال كوزدەدى. حارري كەين ەكىنشى گولىن تويلاسا، حارري ماگۋاير تۋرنيردەگى العاشقى گولىن سوقتى. بۇنىمەن توقتاپ قالماعان اعىلشىندار 63 مينۋتتا ەسەپ ايىرماسىن ۇلعايتتى. دجوردان حەندەرسون سوققان گولدان كەيىن تەلەترانسلياتسيا بىزگە ۋكراين جانكۇيەرلەرىنىڭ كوز جاسىنا ەرىك بەرگەن بەينەلەرىن كورسەتتى. اعىلشىندار قۋاندى، ۋكرايندار جارىس جولىن اياقتادى. جارتىلاي فينال مەن فينالدىق كەزدەسۋلەر انگليانىڭ لوندون قالاسىنداعى «ۋەمبلي» ستاديونىندا وتەتىنىن ەسكەرسەك، بۇل جاعداي اعىلشىن فۋتبولشىلارى ءۇشىن ۇلكەن باسىمدىق بولماق. «فۋتبول ءوز ۇيىنە ورالادى» دەگەن جارنامالىق لوزۋنگتار قازىردىڭ وزىندە قالا كوشەلەرىن كومكەرىپ تۇر.
7, 8 شىلدە كۇندەرى وتەتىن جارتىلاي فينالدىق كەزدەسۋدە يتاليا مەن يسپانيا، انگليا مەن دانيا ءوزارا مىقتىنى انىقتايدى. جەڭگەنى فينال جولداماسىنا، جەڭىلگەنى قولا جۇلدەگە يە بولادى. ارينە، تورتجىلدىقتىڭ باستى باسەكەسى بولعاندىقتان كىمنىڭ دە بولسا التىن مەدالدى ءوز ەلدەرىنە سىيلاعىسى كەلەتىنى حاق. شىن مىقتىنى الاڭ كورسەتسىن.
