اقتوبە وبلىسىندا 35 اۋىلدىق وكرۋگتىڭ اكىمى سايلانادى. قازىر وبلىستا اۋىل اكىمدەرىن سايلاۋ ناۋقانىنا قىزۋ دايىندىق ءجۇرىپ جاتىر دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتوبە وبلىستىق سايلاۋ كوميسسياسىنىڭ توراعاسى گۇلنار كۇنباەۆانىڭ ايتۋىنشا، وبلىستا 141 اۋىل اكىمى بار. اۋىل اكىمدەرىن سايلاۋ 35 اۋىلدىق وكرۋگ بويىنشا وتكىزىلەدى. قالعان ەلدى مەكەندەردەگى اكىمدەردىڭ وكىلەتتىك مەرزىمى (4 جىل) اياقتالماعان. وكىلەتتىك مەرزىمى اياقتالعاننان كەيىن ولار دا تىكەلەي داۋىس بەرۋ ارقىلى سايلانباق.
سونىمەن بۇل ناۋقاندا اكىم بولعىسى كەلەتىن ۇمىتكەرلەر ساياسي پارتيالار تاراپىنان نەمەسە ءوز-وزدەرىن ۇسىنا الادى. سايلاۋ بارىسىندا ءبىر ورىنعا كەمىندە ەكى ۇمىتكەر بولۋ كەرەك.
— سايلاۋعا قاتىسۋ جارناسى — 42500 تەڭگە. ەگەر ۇمىتكەردى پارتيا ۇسىنسا، ونى پارتيا تولەيدى، ەگەر ۇمىتكەر ءوزىن-ءوزى ۇسىنسا، نە اۋدان، وبلىستىق ماڭىزى بار قالا اكىمى ۇسىنسا، ۇمىتكەر ءوزى تولەيدى. تولەنگەن جارنا قايتارىلمايدى، — دەيدى گ.كۇنباەۆا.
زاڭناماعا سايكەس, اۋداندىق ماڭىزى بار قالا، اۋىل، كەنت، اۋىلدىق وكرۋگ اكىمى بولىپ سايلانۋ ءۇشىن ەل ازاماتى 25-كە تولعان، ارەكەتكە قابىلەتتى، مەملەكەتتىك قىزمەت سالاسىنداعى زاڭناما تالاپتارىنا سايكەس بولۋعا ءتيىس، سوتتىلىعى جانە سىبايلاس جەمقورلىق قىلمىس جاساۋ دەرەگى بولماۋى شارت.
اقتوبە وبلىسىندا قازىر سايلاۋعا 8 ادام ءوزىن-ءوزى ۇسىنىپ وتىر. ناقتىراق ايتساق، ءبىر ادام بايعانين اۋدانىنان، 7 ادام شالقار اۋدانىنان ۇسىنىلعان.
ايتا كەتۋ كەرەك، بيىل اۋىل اكىمدەرىن سايلاۋ 25 شىلدە كۇنى وتەدى. وسى كۇنى تاڭعى ساعات 7.00-دەن باستاپ سايلاۋ ۋچاسكەلەرى جۇمىسىن باستايدى. سايلاۋعا 18 جاسقا تولعان تۇرعىندار قاتىسا الادى. ول ءۇشىن ۋچاسكەگە بارىپ، تىزىمدە بار-جوق ەكەندىگىڭىزگە كوز جەتكىزىپ، سودان سوڭ بيۋللەتەن ارقىلى داۋىس بەرە الاسىز.
"ادىرنا" ۇلتتىق پورتالى.
