Aqtóbe oblysynda 35 aýyldyq okrýgtiń ákimi saılanady. Qazir oblysta aýyl ákimderin saılaý naýqanyna qyzý daıyndyq júrip jatyr dep habarlaıdy "Adyrna" ulttyq portalynyń tilshisi.
Aqtóbe oblystyq saılaý komıssııasynyń tóraǵasy Gúlnar Kúnbaevanyń aıtýynsha, oblysta 141 aýyl ákimi bar. Aýyl ákimderin saılaý 35 aýyldyq okrýg boıynsha ótkiziledi. Qalǵan eldi mekenderdegi ákimderdiń ókilettik merzimi (4 jyl) aıaqtalmaǵan. Ókilettik merzimi aıaqtalǵannan keıin olar da tikeleı daýys berý arqyly saılanbaq.
Sonymen bul naýqanda ákim bolǵysy keletin úmitkerler saıası partııalar tarapynan nemese óz-ózderin usyna alady. Saılaý barysynda bir orynǵa keminde eki úmitker bolý kerek.
— Saılaýǵa qatysý jarnasy — 42500 teńge. Eger úmitkerdi partııa usynsa, ony partııa tóleıdi, eger úmitker ózin-ózi usynsa, ne aýdan, oblystyq mańyzy bar qala ákimi usynsa, úmitker ózi tóleıdi. Tólengen jarna qaıtarylmaıdy, — deıdi G.Kúnbaeva.
Zańnamaǵa sáıkes, aýdandyq mańyzy bar qala, aýyl, kent, aýyldyq okrýg ákimi bolyp saılaný úshin el azamaty 25-ke tolǵan, áreketke qabiletti, memlekettik qyzmet salasyndaǵy zańnama talaptaryna sáıkes bolýǵa tıis, sottylyǵy jáne sybaılas jemqorlyq qylmys jasaý deregi bolmaýy shart.
Aqtóbe oblysynda qazir saılaýǵa 8 adam ózin-ózi usynyp otyr. Naqtyraq aıtsaq, bir adam Baıǵanın aýdanynan, 7 adam Shalqar aýdanynan usynylǵan.
Aıta ketý kerek, bıyl aýyl ákimderin saılaý 25 shilde kúni ótedi. Osy kúni tańǵy saǵat 7.00-den bastap saılaý ýchaskeleri jumysyn bastaıdy. Saılaýǵa 18 jasqa tolǵan turǵyndar qatysa alady. Ol úshin ýchaskege baryp, tizimde bar-joq ekendigińizge kóz jetkizip, sodan soń bıýlleten arqyly daýys bere alasyz.
"Adyrna" ulttyq portaly.
