ماڭعىستاۋدا بالاسىن ەمشىگە اپارىپ ەمدەتەمىن دەپ، ءبىر قولىنان ايىرعان اتا-انا جاۋاپقا تارتىلۋى مۇمكىن. قر ءبىلىم جانە عىلىم مينيسترلىگى قۇزىرەتتى ورگاندارعا ءتيىستى حات جولداعان دەپ جازدى ەكسپرەسس ك.
ءبىلىم جانە عىلىم ۆيتسە-ءمينيسترى بيبىگۇل اسىلوۆانىڭ ايتۋىنشا، حات ءىىم جانە ماڭعىستاۋ وبلىسىنىڭ اكىمدىگىنە جولداندى. وندا زارداپ شەككەن بالانىڭ قۇقىن قامتاماسىز ەتۋ ماقساتىندا ونىڭ زاڭدى وكىلدەرىن، ياعني اتا-اناسىن جاۋاپقا تارتۋ تۋرالى ايتىلعان.
ايتا كەتەيىك، 6 ماۋسىم كۇنى ماڭعىستاۋ وبلىسى قىزىلساي سەلوسىنىڭ 3-ءشى سىنىپ وقۋشىسى اقپان ابدۋللاح ۆەلوسيپەدتەن قۇلاپ، ءبىر قولىن سىندىرىپ الادى. بالانىڭ اتا-اناسى دارىگەرگە بارۋدىڭ ورنىنا، ونى سىنىقشىعا اپارعان.
«ءبىزدىڭ بالالار اۋرۋحاناسىنىڭ تراۆموتولوگيا بولىمىنە 17 ماۋسىم كۇنى 8 جاستاعى بالا ءتۇستى. اۋرۋحاناعا تۇسكەنگە دەيىن بىلەگىن سىندىرىپ العان، ەمشىلەر قولىنا تىعىز تامشى سالىپ تاستاعان. بىزگە كەلگەندە بالانىڭ جاعدايى وتە اۋىر بولدى، قولىنىڭ باسى قارايىپ، ەتى ءولىپ قالعان، جان جوق. سودان كەيىن ءبىز بارلىق ورتالىققا شىقتىق، كونسۋلتاتسيا جاسادىق، حيرۋرگتەرگە كورسەتتىك. ءبارىنىڭ ايتقان تۇجىرىمداماسى – امپۋتاتسيا. 20 ماۋسىم كۇنى وتا جاسالدى. سىنىقشى-ەمشىگە بارىپ ەم العاندا، سىنعان سۇيەك ءاردايىم ورنىنا كەلە بەرمەيدى. قازىر 21 عاسىر، زامان، تەحنولوگيا دامىپ جاتىر. سوندىقتان ناۋقاستى ەڭ ءبىرىنشى ۋاقىتىلى اۋرۋحاناعا جەتكىزىڭىزدەر»، - دەدى ماڭعىستاۋ وبلىستىق بالالار اۋرۋحاناسىنىڭ حيرۋرگى قۇرمان قايرانوۆ.
"ادىرنا" ۇلتتىق پورتالى
