ەستەرىڭىزدە بولسا، 11 ماۋسىم كۇنى اقوردانى، ۇقك-ءنى جانە باسقا دا ستراتەگيالىق ماڭىزدى نىسانداردى درونمەن اۋەدەن ۆيدەوعا ءتۇسىرىپ جۇرگەن ليۋ حاۋ ەسىمدى قىتاي ازاماتى ۇستالعان. Nege.kz پورتالى قىتايلىق «شپيونعا» قاتىستى كەيبىر جايتتاردى انىقتادى، دەپ حابارلايدى “ادىرنا” ۇلتتىق پورتالى.
ءبىز وسى وقيعاعا بايلانىستى قازاقستانداعى قحر ەلشىلىگىنە، ۇقك توراعاسى ك.ماسىموۆكە ىشكى ىستەر ءمينيسترى ە.تۇرعىمباەۆقا جانە نۇر-سۇلتان قالاسى پوليتسيا دەپارتامەنتىنىڭ باسشىسى ە.سادەنوۆكە رەسمي ساۋال جولداعانبىز.
قحر ەلشىلىگىنەن ءالى جاۋاپ كەلگەن جوق. ادەتتە داۋلى مالىمدەمە جاساپ، جۇرگەن جەرىن شۋلاتىپ جۇرەتىن ەلشى چجان سياو جاۋاپ بەرۋدى قاجەت دەپ تاپپاۋى مۇمكىن. سەبەبىن ءىشىڭىز ءبىلسىن…
ۇلتتىق قاۋىپسىزدىك كوميتەتى دە ازىرگە تىم-تىرىس. ءىىم-ءنىڭ ءباسپاسوز قىزمەتى «تىركەلگەن فاكتى نەگىزىندە قر اقبك-نىڭ 563-بابى (قر اۋە كەڭىستىگىن پايدالانۋ ءتارتىبىن بۇزۋ) بويىنشا اكىمشىلىك ماتەريال جيناقتالعانىن، ماتەريالداردى قر يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتىنە جولداۋ جوسپارلانىپ وتىرعانىن» جازىپتى.
تەك نۇر-سۇلتان قالالىق پوليتسيا دەپارتامەنتىنەن تام-تۇمداپ اقپارات العانداي بولدىق. دەپارتامەنت باسشىسىنىڭ ءبىرىنشى ورىنباسارى ب.مالىباەۆتىڭ جاۋابى تومەندەگىدەي:
«2021 جىلدىڭ 11 ماۋسىمىندا پوليتسيا دەپارتامەنتىنىڭ قىزمەتكەرلەرىمەن نۇر-سۇلتان قالاسى ترياتلون پاركىنىڭ اۋماعىندا قىتاي حالىق رەسپۋبليكاسى ازاماتى Liu Hao «DJJ» ماركالى دروندى قولدانا وتىرىپ، ەلوردانىڭ وزىنە ۇناعان عيماراتتارىن بەينەجازباعا ءتۇسىرۋ ارقىلى قازاقستان رەسپۋبليكاسىنىڭ اۋە كەڭىستىگىن پايدالانۋ ءتارتىبىن بۇزعانى انىقتالدى. اتالعان فاكتى نۇر-سۇلتان قالاسى «الماتى» اۋدانىنىڭ پوليتسيا باسقارماسىنىڭ اقپاراتتى ەسەپكە الۋ كىتابىنا №217111030016973 سانىمەن تىركەلگەن.
2021 جىلعى 12 ماۋسىمدا قىتاي ازاماتىنا قاتىستى جيناقتالعان ماتەريالدار، قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 563-بابىنا سايكەس اكىمشىلىك جاۋپكەرشىلىكتى قاراستىرۋ ءۇشىن «ازاماتتىق اۆياتسيا كوميتەتىنە» جولدانعانىن حابارلايمىز.
Liu Hao-نىڭ قازاقستان رەسپۋبليكاسىنىڭ اۋماعىنا كەلۋى جونىندەگى قۇجاتتارىن دەپارتامەنتتىڭ كوشى-قون قىزمەتى باسقارماسىنىڭ قىزمەتكەرلەرى تەكسەرىپ، كەلۋ ماقساتى ىسكەرلىك (جۇمىس بابىمەن) ەكەنىن، كوشى-قون سالاسىندا قۇقىق بۇزۋشىلىقتار انىقتالماعانىن حابارلايمىز».
ياعني، ازىرگە قىتايلىق ليۋ حاۋدى «ىسكەر» دەپ قابىلدايمىز. ويتكەنى مەملەكەتىمىزدىڭ قاۋىپسىزدىگىن قامتاماسىز ەتەتىن ۇقك دە، پرەزيدەنتتىڭ قاۋىپسىزدىگىنە تىكەلەي جاۋاپتى مەملەكەتتىك كۇزەت قىزمەتى دە بۇل وقيعاعا بايلانىستى رەسمي مالىمدەمە جاساعان جوق.
جالپى، شپيونداردىڭ شەتەلدە اشكەرەلەنىپ قالۋى كوپ جاعدايدا حالىقارالىق داۋلارعا تۇرتكى بولعانىمەن، اناۋ ايتقانداي توسىن جاڭالىق سانالمايدى. كەيبىر ەلدەر ۇستالىپ قالعان شپيوندارىن ارنايى كەلىسىممەن الماستىرىپ الىپ جاتادى. سوندىقتان مۇنداي «بارىس-كەلىستەر» بۇعان دەيىن دە بولعان، بۇدان كەيىن دە بولا بەرمەك.
بۇل جەردە سۇراق باسقا بولسا كەرەك-ءتى: قازاقستاندا قىتايدىڭ قانشا «ىسكەرى» ءجۇر؟ مەملەكەتتىڭ جانە مەملەكەت باسشىسىنىڭ قاۋىپسىزدىگىنە جاۋاپتى ورگاندار ولار تۋرالى بىلە مە؟!
