مەتسەناتتاردىڭ كومەگىمەن قازاقستاندا العاش رەت حالىقارالىق ستاندارتتارعا ساي ۋچاسكەلىك پوليتسيا پۋنكتى اشىلدى. باستاما قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆتىڭ تاپسىرماسىمەن قر ءىىم «پوليتسيانىڭ سەرۆيستىك مودەلى» پيلوتتىق جوباسىنىڭ اياسىندا جۇزەگە اسىرىلىپ جاتىر.
اتالعان ۋپپ-نىڭ ەرەكشەلىگى - ازاماتتاردىڭ قاجەتتىلىكتەرى، ۋچاسكەلىك پوليتسيا ينسپەكتورلارىنىڭ فۋنكتسيونالدىق مىندەتتەرى ەسكەرىلىپ، ارنايى جابدىقتالدى. كەڭسەدە ازاماتتاردى قابىلداۋعا، جينالىس وتكىزۋ ءۇشىن 10 ورىنعا شاقتالعان جەكە بولمە بار، تۇرمىستىق زورلىق-زومبىلىق كورگەن انا مەن بالاعا ارنايى بولمە قاراستىرىلدى، قىزمەتكەرلەردىڭ كيىمىن قويۋعا ارنالعان شكافتار مەن قۇجاتتاردى ساقتاۋعا ارنالعان جاشىكتەر قاراستىرىلدى. ودان بولەك، پروباتسيا قىزمەتكەرىنە ءبىر بولمە جانە كامەلەت جاسقا تولماعان بالالارمەن جۇمىس ىستەيتىن ۋچاسكەلىك ينسپەكتورعا جەكە بولمە بەرىلدى. سونداي-اق قىزمەتكەرلەردىڭ دەمالىس بولمەسى مەن اس ءۇي دە تولىعىمەن جابدىقتالعان. جالپى عيماراتتىڭ اۋدانى 8 جۇمىس ورنى مەن تىركەۋ ءبولىمىن قوسقاندا 156,65 م² قۇرايدى.
نۇر-سۇلتان قالاسىنىڭ اكىمى ا.س. كولگىنوۆ جانە نۇر-سۇلتان قالاسى «الماتى» اۋدانىنىڭ اكىمى ب.ت. ەسپولوۆ جاڭا ۋچاسكەلىك پۋنكت ءۇشىن كەڭسە ءبولدى. م.س. نارىكباەۆ اتىنداعى كازگيۋ ۋنيۆەرسيتەتى «NAK» قۇرىلىس كومپانياسىمەن بىرگە ۋچاسكەلىك پوليتسيا پۋنكتىنىڭ زاماناۋي ستيلدەگى ديزاينىن جاساپ، جوبالاۋ جانە جوندەۋ جۇمىستارىن جۇرگىزدى. سونىمەن قاتار تەحنيكالىق جابدىقتارىن الىپ، عيماراتتى تولىعىمەن قايتا جابدىقتادى.
كازگيۋ باسقارما توراعاسى تالعات نارىكباەۆتىڭ ايتۋىنشا، جوعارى وقۋ ورنىنىڭ قىزمەتكەرلەرى ينسپەكتورلارمەن تەرەڭدەتىلگەن سۇحباتتار جۇرگىزىپ، ارنايى ادىستەمە دايىنداعان.
«پيلوتتىق ايماقتاعى 29 پوليتسيا قىزمەتكەرىنىڭ جۇمىس ۋاقىتىنا حرونومەتراج جۇرگىزۋ بارىسىندا باقىلاۋشىلار (ۋنيۆەرسيتەت قىزمەتكەرلەرى مەن ستۋدەنتتەرى) ۋچاسكەلىك جانە پاترۋلدىك پوليتسيا قىزمەتكەرلەرى جۇمىسىنىڭ كۇردەلىلىگى مەن اۋىرلىعىن زەرتتەدى. زەرتتەۋ بارىسىندا پوليتسيا قىزمەتكەرلەرىنىڭ جۇمىسى قاۋىپ-قاتەرگە تولى ەكەنىنە قاراماستان ءتيىمدى جانە جايلى ورىندا جۇمىس ىستەۋى ءۇشىن قاجەتتى جاعداي جاسالماعانى انىقتالدى»,- دەدى ول.
ءسوزىنىڭ سوڭىندا تالعات نارىكباەۆ: «قازاقستانداعى باسقا ۋچاسكەلىك پوليتسيا پۋنكتەرى دە وسىنداي بولعانىن قالايمىز. ءبىز سەرۆيستىك پوليتسيا قۇرىپ جاتىرمىز»، - دەپ اتاپ ءوتتى.
پوليتسيا قىزمەتكەرلەرى جانە پيلوتتىق اۋدانداعى پوليتسيا دەپارتامەنتىنىڭ باسشىلىق قۇرامى ۋنيۆەرسيتەت بازاسىندا «كيكىلجىڭ پسيحولوگياسى»، «قۇقىقتىق تالداۋ نەگىزدەرى»، «ەموتسيونالدى ينتەللەكت»، «قۇجاتتاردى راسىمدەۋ» كۋرستارىن وقىپ، كاسىبي بىلىكتىلىگىن ارتتىردى.
نۇر-سۇلتان قالاسى «الماتى» اۋدانى پوليتسيا ءبولىمىنىڭ اعا ۋچاسكەلىك ينسپەكتورى قۋانىش باكىباەۆ پيلوتتىق جوبا بولاشاقتا جەمىسىن بەرەتىنىنە سەنىمدى: «ەلوردالىق پوليتسيا قىزمەتىندە وزگەرىستەر بولىپ جاتقانىن كورىپ وتىرمىز. كازگيۋ ۋنيۆەرسيتەتىندە بىلىكتىلىكتى ارتتىرۋ كۋرسىنان وتتىك. پيلوتتىق جوبانىڭ ارقاسىندا بولاشاقتا ءىس-قاعازدار جۇمىسىنىڭ باسىم بولىگى ەلەكتروندى فورماتقا اۋىسادى. ول ءوز كەزەگىندە ۋچاسكەلىك پوليتسيا قىزمەتكەرلەرىنىڭ جۇمىسىن جەڭىلدەتەدى».
اتالعان ۋچاسكەلىك پۋنكتىنىڭ شتاتتىق قۇرامى كۋرس ناتيجەسى بويىنشا وقىتۋشىلار بەرگەن ۇسىنىستاردىڭ نەگىزىندە جاساقتالاتىن بولادى.
