بيىلدان باستاپ اقتوبە وبلىسىنىڭ ىرعىز اۋدانى مەن شىعىس قازاقستان وبلىسىنىڭ اباي اۋدانى اراسىندا مادەني جانە ەكونوميكالىق بايلانىستار نىعايىپ، ارىپتەستىك قارىم-قاتىناس جولعا قويىلدى. وسىلايشا ابايدىڭ ەلى مەن ابايدىڭ ارعى اتاسى ىرعىزباي تۋعان ولكەنىڭ اراسى جاقىنداي ءتۇستى دەپ حابارلايدى "ادىرنا" ۇلتتىق پورتالىنىڭ ءتىلشىسى.
بۇعان دەيىن حابارلاعانىمىزداي، وتكەن اپتادا شىعىس قازاقستان وبلىسى اباي اۋدانىندا اقتوبە وبلىسى ىرعىز اۋدانىنىڭ مادەني كۇندەرى ءوتتى. ەل تاۋەلسىزدىگىنىڭ 30 جىلدىعىنا وراي، سونداي-اق «رۋحاني جاڭعىرۋ» باعدارلاماسى اياسىندا وتكىزىلگەن شاراعا وبلىستان جانە اۋداننان 50-گە جۋىق ادام قاتىستى.
شارا اباي ەسكەرتكىشىنە گۇل شوعى قويۋدان باستالدى. بۇدان كەيىن ىرعىزدىقتار قاراۋىل اۋىلدىق كلۋبىنىڭ فويەسىندە اۋىلشارۋاشىلىق جانە كىتاپ كورمەسىن جاساقتاپ، تۇرعىندارعا ۇسىندى.
ىرعىز اۋداندىق اۋىل شارۋاشىلىعى ءبولىمى باسشىسىنىڭ مىندەتىن ۋاقىتشا اتقارۋشى اقالماس تۇرتاەۆتىڭ ايتۋىنشا، اتالعان كورمەگە وبلىستان قىمىز، شۇبات، ەشكى ءسۇتى، «شالقار» سۋى، بالىق، تارى، جارما، قۇرت، ىرىمشىك، جەنت، اق ىرىمشىك، سۇزبە، قايماق، بال، ت.ب. ءسۇت، شۇجىق، كونديتەر ونىمدەرى قويىلعان.
«ىرعىز ءوڭىرى مەن اباي ەلىنىڭ ورتاق قۇندىلىقتارى» اتتى تانىمدىق كونفەرەنتسيا بارىسىندا ىرعىز اۋدانىنىڭ اكىمى ادىلكەرەي اۋەلباەۆ قاراۋىلدىقتارعا ىرعىزباي تۋعان توپىراق — ىرعىز ءوڭىرىنىڭ ىستىق سالەمىن جەتكىزىپ، وتكەن تاريح بەتتەرىنە شولۋ جاسادى.
"سوناۋ جوڭعار شاپقىنشىلىعىنان ۇدەرە كوشكەن ەل سوناۋ ىرعىز بويىنان پانا تاپسا، «شىنجىر بالاق، شۇبار ءتوس» ىرعىزباي سول وزەننىڭ جاعاسىندا دۇنيەگە كەلگەن. العاشقىسى قازاق حالقىن جويىلىپ كەتۋدەن ساقتاۋداعى كۇرت بەتبۇرىس بولسا، ەكىنشىسى كەيىن ۇرپاعى حالقىمىزدىڭ دانىشپان پەرزەنتىنە اينالعان تاريحي تۇلعا ەدى. وسىنداي تۇتاس حالىقتىڭ تاريحىندا ءىز قالدىرعان وقيعالار وتكەن ىرعىز ەلى ەكى جارىم عاسىردان سوڭ ىرعىزبايدىڭ جۇرتىنا قوناق بولىپ كەلىپ قالدى. اقتوبە وبلىسى ىرعىز اۋدانىنىڭ اباي اۋدانىنداعى «ىرعىزدان ىرعىزبايدىڭ ەلىنە» اتتى مادەني كۇندەرى ابايمەن قۇرداس، بىلتىر 175 جىلدىعىن اتاپ وتكەن ىرعىزدان باستاۋ الىپ، بۇگىن قاراۋىلدا ءوز مارەسىنە جەتكەلى وتىر، — دەگەن ول ەلدىڭ باتاسىن الىپ اتتانعان ساپاردىڭ ماقساتىنا توقتالىپ، وسى جوباعا وبلىس اكىمى وڭداسىن ورازالين ەرەكشە قولداۋ بىلدىرگەنىن اتاپ ءوتتى.
بۇدان كەيىن كونفەرەنتسيادا اباي اۋدانىنىڭ اكىمى نۇرجان ابدىكارىموۆ ىرعىزدىقتارعا جىلى لەبىزىن ءبىلدىردى.
— اربىر ەلىم، جەرىم دەيتىن، بولاشاعىن ويلايتىن قازاق ابايدىڭ جەرىنە كەلىپ، ۇلى تۇلعاعا تاعزىم ەتۋى كەرەك. ابايداي ۇلى تۇلعا ءالى تۋعان جوق. 18-19 عاسىردا ءومىر سۇرسە دە، قازاقتىڭ بولاشاعىن ويلاپ، ارتىنا ماڭگىلىك مۇرا قالدىرىپ كەتكەن دانا ويشىل ءبىز ءۇشىن قاشان دا قىمبات. اباي تۋعان وڭىرگە ەلباسى مەن مەملەكەت باسشىسىنىڭ ءوزى كەلىپ، ۇلكەندەردىڭ باتاسىن العان. سوندىقتان بولاشاق ۇرپاق بۇل جەردىڭ توپىراعىن باسىپ، تاريحىمەن تانىسۋى ءتيىس. وسى ورايدا ۇلكەن دەلەگاتسيا بولىپ، كيەلى مەكەنگە كەلىپ جاتقان سىزدەرگە، ىرعىزدىڭ جۇرتىنا، ايتار العىسىمىز شەكسىز،— دەدى ول.
جيىندا دەلەگاتسيا وكىلدەرى اقتوبە ءوڭىرى مەن ىرعىز ولكەسىنىڭ تاريحى تۋرالى بايانداما وقىپ، ىرعىزباي مەن ابايعا قاتىستى بىرقاتار تىڭ دەرەكتەردى ايتىپ بەردى.
شارا سوڭىندا اقتوبە وبلىسىنىڭ ىرعىز اۋدانى مەن شىعىس قازاقستان وبلىسىنىڭ اباي اۋدانى اراسىندا ارىپتەستىك قارىم-قاتىناستى دامىتۋ ماقساتىندا ەكى اۋداننىڭ اكىمدەرى ءوزارا مەموراندۋمعا قول قويىپ، ەكى ءوڭىردىڭ ونەرپازدارى كونتسەرتتىك باعدارلامالارىن ۇسىندى.
ساپار سوڭىندا دەلەگاتسيا اباي مەن شاكارىمنىڭ كەسەنەسىنە بارىپ، قوس كەمەڭگەردىڭ رۋحىنا تاعزىم ەتتى. ابايدىڭ مۇراجاي-ءۇيىن ارالاپ، زامانىندا ۇلى اقىننىڭ ءوزى تۇتىنعان قۇندى جادىگەرلەردى ءوز كوزدەرىمەن كوردى.
"ادىرنا" ۇلتتىق پورتالى.
