جاندىكتەردى ۋلايمىن دەپ كورشىلەرىن ءولتىرىپ العان ايەلگە سوت ۇكىمى شىقتى

1334

اقتاۋ قالاسىنىڭ سوتى جاندىكتەردى ۋلايمىن دەپ ەكى ادامنىڭ ولىمىنە سەبەپ بولعان ايەلگە قاتىستى ءىس بويىنشا ۇكىم شىعاردى، دەپ حابارلايدى «ادىرنا» ۇلتتىق پورتالى.

«ايەلگە قر قك 304-بابى، 3-بولىگى («ابايسىزدا ەكى ادامنىڭ ولىمىنە اكەپ سوققان سانيتارلىق ەرەجەلەردى بۇزۋ») بويىنشا ايىپ تاعىلدى.

ءىس مەملەكەتتىك ايىپتاۋشىنىڭ، جابىرلەنۋشىنىڭ، جابىرلەنۋشىنىڭ وكىلىنىڭ، سوتتالۋشىنىڭ جانە ونىڭ قورعاۋشىسىنىڭ قاتىسۋىمەن وتكەن اشىق سوت وتىرىسىندا قارالدى»، - دەلىنگەن Stan.kz اقپارات اگەنتتىگى جاريالاعان ماتەريالدا.

مەملەكەتتىك ايىپتاۋشى ءىستىڭ ءمان-جايىن ەسكەرە وتىرىپ، سوتتان سانكتسيا اياسىندا سوتتالۋشىنى 7 جىلعا باس بوستاندىعىنان ايىرۋدى سۇرادى. ال جابىرلەنۋشىلەر مەملەكەتتىك ايىپتاۋشىنىڭ پىكىرىمەن كەلىستى.

سوتتالۋشى ءوز كىناسىن ءىشىنارا مويىنداپ، جابىرلەنۋشىلەردەن كەشىرىم سۇراپ، سوتتان باس بوستاندىعىنان ايىرمايتىن جازا تاعايىنداۋدى سۇرادى.

اقتاۋ قالالىق سوتى ءىستى قر قك-ءنىڭ 304-بابى 3-بولىگى بويىنشا قاراعان. سوتتالۋشىنىڭ قىلمىستىق ارەكەتتەرى سوت تەرگەۋىندە جان-جاقتى، تولىق جانە وبەكتيۆتى تۇردە زەرتتەلگەن دالەلدەمەلەرمەن تولىق نەگىزدەلۋىنە جانە قىلمىستىق ارەكەتتىڭ اۋىر قىلمىستار ساناتىنا جاتاتىنىنا بايلانىستى ايىپتاۋ ۇكىمى قابىلداندى، دەلىنگەن سوت حابارلاماسىندا.

«سوت ۇكىمىمەن ايىپتالۋشى ە-گە 6 جىل مەرزىمگە باس بوستاندىعىنان ايىرا وتىرىپ، جازاسىن قىلمىستىق-اتقارۋ جۇيەسىنىڭ قاۋىپسىزدىگى بارىنشا تومەن مەكەمەلەرىندە وتەۋ جازاسى تاعايىندالدى»، - دەلىنگەن سوت ۇكىمىندە.

ۇكىم زاڭدى كۇشىنە ەنگەن جوق.

ەسكە سالايىق، وقيعا وسى جىلدىڭ باسىندا بولدى. اقتاۋ تۇرعىنى كورشىلەرىن ەسكەرتپەي، جاندىكتەردى ولتىرۋگە ارنالعان «كۆيكفوس» پرەپاراتىمەن ءۇيىن زالالسىزداندىرماق بولعان. سالدارىنان كورشى پاتەردە قىزى مەن اناسى يىستەن ۋلانىپ كوز جۇمدى. تاعى التاۋى اۋرۋحاناعا شۇعىل تۇردە جاتقىزىلدى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى