ەلوردادا ەكى بولمەلى پاتەر ۇتىسقا قويىلدى. قىزىعى، ۆاكتسينا سالدىرعانداردىڭ اراسىندا ويناتىلادى. بۇل تۋرالى التاي كولگىنوۆ ءوز ينستا پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
ەلوردا اكىمىنىڭ ايتۋىنشا، ۇجىمدىق يممۋنيتەتتى قالىپتاستىرۋ ءۇشىن تۇرعىنداردىڭ 60% ۆاكتسيناتسيالانۋى كەرەك.
"سانيتار دارىگەرلەر قوسىمشا كارانتيندىك شەكتەۋلەر تۋرالى جاڭا قاۋلى دايىنداپ جاتىر: قاۋىپ-قاتەر توبى ءۇشىن ۆاكتسينالاۋ مىندەتتى، ۆاكتسينالانباعان قىزمەتكەرلەردى قاشىقتان جۇمىس ىستەۋ رەجيمىنە كوشىرۋ تالاپ ەتىلەدى", - دەدى كولگىنوۆ.
اكىمدىك قالا تۇرعىندارىن ىنتالاندىرۋ ءۇشىن باعالى سىيلىقتاردىڭ ۇتىس ويىنىن ەنگىزىپ جاتىر. ال جاڭادان ۆاكتسينالانعاندار اراسىندا ەكى بولمەلى پاتەر ويناتىلادى (ينۆەستورلار ەسەبىنەن). ۇتىس ويىنىنا قالا ەمحانالارىندا نەمەسە ءسوو/سۇ پۋنكتتەرىندە ەكپە العان قالا تۇرعىندارىنىڭ ءبارى قاتىسا الادى.
"ال پاتەر ۇتىس ويىنىنا وسى جىلدىڭ 25 ماۋسىمى مەن 31 تامىزى ارالىعىندا ۆاكتسينانىڭ ءبىرىنشى كومپونەنتىن الاتىن 18 جاستان اسقان قالا تۇرعىندارى قاتىسا الادى. قىركۇيەك ايىنىڭ باسىندا ناتيجەسىن جاريالايمىز. كونكۋرستىڭ ءادىل ءوتۋى جانە ۆاكتسيناتسيالانعانداردى تولىعىمەن قامتۋ ءۇشىن (كورسەتىلگەن كەزەڭدە) IT-قوعامداستىقتى جۇمىلدىرامىز", - دەپ اتاپ ءوتتى قالا باسشىسى.
“ادىرنا” ۇلتتىق پورتالى
