الماتىدا تسيركتىڭ الدىندا سۋبۇرقاققا تۇسكەن بالالار وپات بولا جازدادى. ولاردى قۇتقارۋعا ۇمتىلعان اناسى اۋىر حالدە جانساقتاۋ بولىمىندە جاتىر. ازىرگە فونتانعا جاۋاپتى ماماندار ادامداردى قالاي توق سوققانىنا قاتىستى تۇسىنىكتەمە بەرگەن جوق. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
وقيعا سەنبى كۇنى ساعات ۇشتەر شاماسىندا بولعان. سول ماڭدا بالالارىمەن جۇرگەن ۇكىلاي ەكى قىزدىڭ اياق كيىمىن شەشىپ، سۋبۇرقاقتىڭ جيەگىندە وتىرعانىن بايقاعان. كەنەتتەن ولاردى توق سوققانىن كورىپ، جەدەل دابىل قاعىپ كومەككە شاقىرادى. ابىلاي دەگەن جىگىت زارداپ شەككەندەردى سىرتقا شىعارۋعا كومەكتەسىپتى. سۋدان شىعارعان كەزدە كەلىنشەك پەن ونىڭ قىزى ەسىنەن تانىپ قالىپتى. جەدەل جاردەم كەلگەنشە سول ماڭداعىلار العاشقى كومەك كورسەتكەن.
«قالاي تارتىپ كەتكەنىن ورتادا جابىسىپ تۇردى. مەن كورگەن كەزدە ءبارى سەرەيىپ-سەرەيىپ كادىمگىدەي جابىسىپ تۇرعاننان مەن ولاردى توق ۇرعانىن ۇقتىم. ويتكەنى كادىمگىدەي جوعارعى تەمىرلەرگە اناسى قادالىپ قالعان سياقتى بولدى. كادىمگى ومىرلەرى ءۇزىلىپ كەتكەندەي»، - دەيدى كۋاگەر ۇكىلاي بەستاي.
قىزى مەن اناسىن سۋ بۇرقاقتان الىپ شىققان ابىلاي بالاپانوۆ دەگەن جىگىت وسى. ول تسيركتىڭ جانىنداعى ورىندىقتا تەرىس قاراپ، كىتاپ وقىپ وتىرىپتى. كومەك سۇراعان داۋىستى ەستي سالا قول ۇشىن سوزۋعا ۇمتىلعان. ونىڭ ايتۋىنشا قىزداردىڭ ءبىرىنىڭ كيىمى فونتانعا ءىلىنىپ، قالىپتى. اناسى قىزىنا بارعاندا ءوزى توققا تۇسكەن بولۋى مۇمكىن دەپ توپشىلاۋدا. الدىمەن قىزداردىڭ ءبىرىن شىعارىپ، اناسىن قۇتقارماق بولعاندا ءوزىن توق سوعىپتى. تاعى ءبىر قىزدى شىعارۋعا شاماسى بولماعان.
«ەستىگەننەن كەيىن بىردەن سۋعا سەكىردىم. ەندى اناسىن الىپ شىعايىن دەپ ەدىم، توق مەنى دە ۇردى. بىراق قاتتى ەمەس. اياقتان جامباسقا دەيىن ۇردى. سوندا ارتقا قادام جاسادىم. فونتان ءوشتى. ول وشكەندە توق جوق بولدى. سول ساتتە اناسىن ۇستادىم. شىعارعان كەزدە ماعان ەكى بالا كومەكتەستى. مىنا كافەلدىڭ ۇستىنە قويىپ قويدىق»، - دەيدى قالا تۇرعىنى ابىلاي بالاپانوۆ.
ال قوعامدىق دەنساۋلىق ساقتاۋ باسقارماسىنىڭ مالىمەتى بويىنشا اۋرۋحاناعا ءۇش ادام جەتكىزىلىپتى. سەگىز جانە 10 جاستاعى ەكى جەتكىنشەك شۇعىل مەديتسينالىق جاردەم اۋرۋحاناسىنا جاتقىزىلسا، كەلىنشەك قالالاق ورتالىق كلينيكالىق اۋرۋحاناعا جەتكىزىلگەن. بالالاردىڭ ءبىرىنىڭ بەتى بەرى قاراپتى. ال كەلىنشەكتىڭ جاعدايى وتە اۋىر ەكەن.
«ايەل ادام قازىر قالالىق ورتالىق كلينيكالىق اۋرۋحانادا جاتىر. رەانيماتسيا بولىمىندە. جاعدايى وتە اۋىر. ەكى بالامىز، قىزىمىز. بىرەۋى 10 جاستا ونىڭ جاعدايى قازىر ورتا دەڭگەيدە. كەشە رەانيماتسيادان وتدەلەنيەگە اۋىستىردىق. ال ەكىنشى قىزىمىز 8 جاستاعى ول قازىر ءالى رەانيماتسيادا، بۇگىنگى جاعدايىن باقىلاپ قارايمىز»، - دەيدى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى لاۋرا مىرزاعالي.
ازىرگە قالاداعى سۋبۇرقاقتارعا جاۋاپتى مەكەمە باسشىلىعى اپاتتىڭ نەدەن تۋىنداعانىنا قاتىستى جاۋاپ بەرگەن جوق. دەگەنمەن الەۋمەتتىك جەلىدە توق سوعۋ قاۋپى بار جەرگە وزدەرى تۇسكەنى تۋرالى پىكىر بىلدىرگەن. دەگەنمەن قوندىرعىلارىندا اقاۋ بولدى ما ول جاعىن اشىپ ايتپادى. قازىر پوليتسيا قىلمىستىق ءىس قوزعاپ تەرگەۋ امالدارىن قولعا العان. تەرگەۋ قورتىندىسى بويىنشا پروسەسۋالدىق شەشىم قابىلدانباق.
"ادىرنا" ۇلتتىق پورتالى
