اقتوبەدە مەكتەپ ديرەكتورلارى قايتىس بولدى

3950
Adyrna.kz Telegram

اقتوبە وبلىسىندا جول اپاتىنان قازا تاپقان مەكتەپ ديرەكتورلارىن جەر قوينىنا تاپسىردى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

اقتوبە وبلىسىنداعى قوبدا-ويىل جولىنىڭ 156 شاقىرىمىندا 19 ماۋسىمدا اپات بولدى. جول تالعامايتىن كولىك اۋدارىلىپ، ەكى ايەل قازا تاپتى. تاعى ەكەۋى ءومىر ءۇشىن كۇرەسىپ جاتىر. قازا بولعاندار مەن زارداپ شەككەندەر - ارىپتەستەر، اقتوبەدەگى مەكتەپ ديرەكتورلارى.

اقتوبە حالقى قازا تاپقان مەكتەپ ديرەكتورلارىن اقتىق ساپارعا شىعارىپ سالدى.

باعدات ۇرىمباەۆا بۇكىل ءومىرىن ءبىلىم سالاسىنا ارناعان. ۇنەمى كۇلىپسىرەپ، ادەمى بولىپ جۇرەتىن. التى جىل اقتوبە قالاسىنداعى №20 مەكتەپ-ليتسەيدى باسقاردى. وقۋ ورنىنىڭ كىرەبەرىسى بۇگىندە گۇلدەرگە تولى. مارقۇمدى ەسكە الۋعا وقۋشىلاردىڭ اتا-انالارى مەن ارىپتەستەرى كەلدى.

«ول جاۋاپتى، بىردە-ءبىر جانجال بولعان جوق. ەكى قىز تاربيەلەدى. ەڭ كىشىسى بيىل ءبىرىنشى سىنىپقا بارادى»، – دەدى №20 جالپى ورتا ءبىلىم بەرۋ مەكتەپ-ليتسەيىنىڭ قىزمەتكەرى رىستى قۇلمانبەتوۆا.

«ءبىز جۇمىس كۇنىن تولىق ىستەيتىن ەدىك، ءبىر-بىرىمىزگە جاقسى دەمالىس كۇندەرىن تىلەدىك، ول: «جولعا شىعامىن» دەدى. مەن وعان: «جولىڭ بولسىن!»، – دەدىم. ءبىزدىڭ بارلىق ارىپتەستەرىمىزدىڭ، مەكتەپ قىزمەتكەرلەرىنىڭ ەسىندە ول مەيىرىمدى، شىنشىل ادام بولىپ قالا بەرەدى. ونىڭ ۇلكەن جوسپارلارى بولدى»، – دەدى №20 جالپى ورتا ءبىلىم بەرەتىن مەكتەپ-ليتسەيى ديرەكتورىنىڭ وقۋ-تاربيە ءىسى جونىندەگى ورىنباسارى اسەم اقنازاروۆا.

ەكىنشى مارقۇم الميرا وراكوۆانىڭ دا ۇلكەن جوسپارلار بولدى. ال قازىر ارىپتەستەرى كوز جاسىن تىيا المايدى. مۇعالىم جۇمىسىنا شىنايى بەرىلدى: ءبىر كەزدەرى ول بىرنەشە قالالىق كوللەدجدەردى باسقارعان. وسىدان ءتورت جىل بۇرىن 33-ءشى مەكتەپتىڭ ديرەكتورى بولدى.

«ول ەشقاشان ادامداردى بولمەگەن. بارىنە جاقسى قارادى. وتە وكىنىشتى، ءالى كۇنگە دەيىن سەنبەيمىن»، – دەدى №33 ورتا مەكتەبىنىڭ دەنە شىنىقتىرۋ ءپانىنىڭ مۇعالىمى ورازباي ۇلقاباي.

جول اپاتىنان باسقا ەكى وقۋ ورنىنىڭ باسشىلارى – اقگۇل قيسىقوۆا مەن شولپان ءبايادىلوۆا امان قالدى. ولاردىڭ ءومىرى ءۇشىن ويىل اۋداندىق اۋرۋحاناسىنىڭ دارىگەرلەرى كۇرەسۋدە. دارىگەرلەر بولجام جاساۋعا اسىقپايدى: ولاردىڭ ءبىرىنىڭ سۇيەكتەرى سىنىپ، ميى شايقالعان. ەكىنشىسى جانساقتاۋ بولىمىندە جاتىر.

«قازىرگى تاڭدا جاعدايى تۇراقتى اۋىر. بۇگىن ساناۆياتسيا ماماندارى تەكسەرەدى. قاجەت بولعان جاعدايدا قالالىق ەمحانالارعا جاتقىزىلادى»، – دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ورازباەۆ.

مەكتەپ قىزمەتكەرلەرىنىڭ ايتۋىنشا، جول تالعامايتىن كولىك مارقۇم باعدات ۇرىمباەۆاعا تيەسىلى بولعان. بىراق سول قايعىلى كەشتە ونى ارىپتەسى الميرا وراكوۆا ايداعان. ولاردىڭ بىرلەسكەن ساپارىنىڭ جۇمىسقا ەشقانداي قاتىسى جوق ەدى.

«ويىل اۋدانىنا كيەلى ورىندارعا باردى. بۇل ولاردىڭ جەكە ساپارى بولدى»، – دەدى قالالىق ءبىلىم ءبولىمىنىڭ باستىعى مەتگۇل قوسىمباەۆا.

اپاتتىڭ بارلىق ەگجەي-تەگجەيىن پوليتسيا انىقتايدى. بىراق قازىردىڭ وزىندە بەلگىلى: جۇرگىزۋشى جول ەرەجەسىن بۇزىپ، كولىكتى باسقارا المادى.

"ادىرنا" ۇلتتىق پورتالى

پىكىرلەر