قر پرەمەر-ءمينيسترى اسقار مامين توراعالىق ەتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى، - دەپ حابارلايدى primeminister.kz.
«قازاقستانداعى سانيتارلىق-ەپيدەميولوگيالىق جاعداي تۇراقتى جانە باقىلاۋعا الىنعان. ۆيرۋستىڭ رەپرودۋكتيۆتىك يندەكسى - 1, ينفەكتسيالىق توسەك ورىندار 25 پايىزعا، رەانيماتسيالىق توسەك ورىندارى 21 پايىزعا تولى. نۇر-سۇلتان قالاسى ءالى دە «قىزىل ايماقتا» تۇر، «سارى ايماقتا» 5 ءوڭىر: الماتى جانە شىمكەنت قالالارى، اتىراۋ، باتىس قازاقستان جانە قاراعاندى وبلىستارى ورنالاسقان. قالعان 11 ءوڭىر – «جاسىل ايماقتا»، - دەدى دەنساۋلىق ساقتاۋ ءمينيسترى الەكسەي تسوي.
بۇگىنگى تاڭدا 2,8 ميلليوننان استام ادام ءبىرىنشى كومپونەنتتى، 1,7 ميلليوننان استامى ەكىنشى كومپونەنتتى الدى.
پرەمەر-مينيستر ەلوردادا كوروناۆيرۋستىڭ «دەلتا» ءۇندى شتامىنا ءتان مۋتاتسيانىڭ ىقتيمالدىعى انىقتالىپ وتىرعانىن، ونىڭ تارالۋ جىلدامدىعى وتە جوعارى، جىلدام ءورشيتىنىن جانە سالدارى اناعۇرلىم اۋىر ەكەنىن اتاپ ءوتتى.
ۇكىمەت باسشىسى سانيتارلىق-ەپيدەميولوگيالىق جاعدايدى باقىلاۋدا ۇستاۋدى، ۆەدومستۆوارالىق كوميسسياعا ەلورداداعى سانيتارلىق-ەپيدەميولوگيالىق تالاپتاردى كۇشەيتۋ بويىنشا قوسىمشا شارالار قابىلداۋدى تاپسىردى.
«جالپى، قازاقستانداعى جاعداي تۇراقتى بولعانىنا قاراماستان، كورشى مەملەكەتتەردەگى جاعداي ناشارلاي ءتۇستى. سوندىقتان مەملەكەتتىك شەكارادا باقىلاۋدى كۇشەيتۋ كەرەك، سونداي-اق سانيتارلىق-ەپيدەميولوگيالىق نورمالاردى قاتاڭ ساقتاۋعا جانە ۆاكتسينالاۋ قارقىنىن ارتتىرۋعا ەرەكشە نازار اۋدارۋ قاجەت»، - دەدى مامين.
