قازاقتان شىققان تۇڭعىش عارىشكەر توقتار اۋباكىروۆتىڭ ەسىمى تاريحتا قالاتىنى ءسوزسىز. كەڭەس وداعىنىڭ جانە رەسەي فەدەراتسياسىنىڭ باتىرى اتانعان، ەل ماقتانىشى بيىل 75 جاسقا تولىپ، مەرەيلى مەرەيتويىن اتاپ وتۋدە. ۇلى دالانىڭ ۇشقىشى توقتار وڭعاربايۇلىنىڭ قۇرمەتىنە وراي بۇگىن اۋدانىمىزعا قاراستى «GULNAR BAQ» دەمالىس ورنىندا قۇمداعى ۆولەيبولدان حالىقارالىق جارىس ۇيىمداستىرىلىپ، ونىڭ اشىلۋ سالتاناتى مەن العاشقى ويىندارى وتكىزىلدى. ءدۇبىرلى دودانىڭ وتۋىنە الماتى وبلىسىنىڭ اكىمدىگى مەن «بۋرەۆەستنيك-الماتى» ۆولەيبول كلۋبى ۇيىتقى بولدى.
سپورتتىق ءىس-شاراعا مەرەيلى 75 جاسقا جەتكەن، حالىق قاھارمانى توقتار اۋباكىروۆ ارنايى شاقىرىلسا، قۇرمەتتى قوناقتاردىڭ قاتارىندا قازاقستاننىڭ حالىق جازۋشىسى، «نەۆادا-سەمەي» پوليگونىن جابۋ ءۇشىن كۇرەسكەن، قوعام قايراتكەرى ولجاس سۇلەيمەنوۆ، بەلگىلى كۇيشى سەكەن تۇرىسبەكوۆ، گەنەرال-لەيتەنانت امانگەلدى شابدارباەۆ، قاراساي اۋدانىنىڭ اكىمى جانداربەك دالاباەۆ جانە باسقا دا قوعام قايراتكەرلەرى بولدى.
حالىقارالىق ءتۋرنيردىڭ اشىلۋ سالتاناتىندا اۋدان باسشىسى جانداربەك ەرمەكۇلى العاشقىلاردىڭ ءبىرى بولىپ ءسوز باستاپ، قازاقتىڭ تۇڭعىش عارىشكەرىنە دەگەن ىزگى تىلەگىن، ءىلتيپاتىن ءبىلدىرىپ، وسىنداي اڭىز ادامنىڭ قازاقتان شىققانىنا قۋانۋ كەرەكتىگىن ايتتى. سونىمەن قاتار، اۋدان اكىمى ج.دالاباەۆ وبلىس باسشىسى اماندىق باتالوۆتىڭ ارنايى قۇتتىقتاۋىن جەتكىزىپ، وسىنداي يگى باستاماعا سەبەپشى بولىپ وتىرعان «بۋرەۆەستنيك-الماتى» ۆولەيبول كلۋبىنىڭ پرەزيدەنتى امانگەلدى شابدارباەۆقا ەرەكشە العىسىن ءبىلدىردى. مەرەيتوي يەسىنە دەگەن ىستىق ىقىلاسىن، اق تىلەگىن قۇرمەتتى قوناقتاردىڭ ءبىرى ولجاس سۇلەيمەنوۆ تە ارناپ، جارىسقا قاتىسۋشى كوماندالارعا ساتتىلىك تىلەدى.سپورتتىق باسەكە باستالار الدىندا بۇل ءتۋرنيردىڭ باستى كەيىپكەرى، عارىشكەر توقتار اۋباكىروۆ ءوزى دە ءبىر-ەكى اۋىز جىلى لەبىزىن ءبىلدىردى. ول ءوز سوزىندە وسىنداي باسقوسۋعا سەبەپكەر بولعان ا.شابدارباەۆقا دەگەن شىنايى ريزاشىلىعىن ءبىلدىرىپ، دوستىقتارى قاشاندا جوعارى ەكەنىن ايتىپ، بۇل دودادا جەڭىلىس بولمايدى، تەك سپورت قانا جەڭەتىنىن ەرەكشە كوڭىل-كۇيدە جەتكىزدى. ال، ءوز كەزەگىندە گەنەرال-لەيتەنانت امانگەلدى سماعۇلۇلى حالىقتىڭ ماقتانىشى ت.اۋباكىروۆ جايلى جاقسى ەستەلىكتەرىمەن ءبولىسىپ، ءسوز سوڭىندا قازاقتىڭ تۇڭعىش عارىشكەرىنە جانە باسقا دا بىرقاتار قادىرلى قوناقتارعا شاپان جاۋىپ، قۇرمەت كورسەتتى.
قۇتتى مەيمانداردىڭ سپورتشىلارعا دەگەن تىلەكتەرىنەن كەيىن، جارىستىڭ العاشقى ويىندارى دا باستالىپ كەتتى. بۇگىنگى ويىنعا 40-تان استام ەرلەر مەن ايەلدەر، سونىمەن قاتار كورشىلەس وزبەكستان مەملەكەتىنەن بىرنەشە كوماندا قاتىستى. ولار جۇپ رەتىندە جانە تورتكە ءتورت بولىپ، قارسىلاس رەتىندە باقتارىن سىنايدى. ءۇش كۇنگە سوزىلاتىن جارىستىڭ جالپى جۇلدە قورى – 1 ملن. تەڭگە.
