بۇگىن شىمكەنت قالاسىندا قالا كۇنى مەرەكەسىنە وراي «مەرەكەڭمەن، شىمقالا!» اتتى سالتاناتتى ءىس-شارا ءوتتى. مەرەكەلىك ءىس-شارادا قالانىڭ دامۋىنا ءتۇرلى سالا بويىنشا ۇلەس قوسقان ازاماتتاردىڭ ەڭبەكتەرى ەلەنىپ، ماراپاتتار تابىستالدى دەپ جازادى "ادىرنا" ۇلتتىق پورتالى.
بۇعان دەيىن شىمكەنت قالاسى ءماسليحاتىنىڭ كەزەكتەن تىس بەسىنشى سەسسياسىندا 20 قالا تۇرعىنىنا «شىمكەنت قالاسىنىڭ قۇرمەتتى ازاماتى» اتانعىن بەرۋ ماسەلەسى قاراستىرىلىپ، ول ۇسىنىس قابىلدانعان ەدى. ولار شاھاردىڭ دامۋىنا ەلەۋلى ۇلەس قوسقان كاسىپكەرلەر، زەينەتكەر ۇستازدار مەن پروفەسسورلار جانە ت.ب سالا ماماندارى. ءوز ومىرلەرىن قالانىڭ دامۋىنا ارناپ، ايانباي ەڭبەك ەتكەن، اتالمىش اتاققا لايىق تۇلعالار.
شىمكەنت قالاسىنىڭ اكىمى مۇرات ايتەنوۆ وسىناۋ ماراپاتقا يە بولعانداردى قۇتتىقتاپ، ىزگى تىلەگىن ءبىلدىردى.
"ەلباسىنىڭ تاريحي جارلىعىنا سايكەس، 2018 جىلعى 19 ماۋسىمدا شىمكەنت قالاسى رەسپۋبليكالىق ماڭىزى بار قالا ستاتۋسىنا يە بولعان ەدى. ودان بەرى تۇپ-تۋرا 3 جىل ۋاقىت ءوتتى. قالا كۇنى – وتكەندى سارالاپ، بۇگىندى باعالاپ، ەرتەڭگە بولجام جاسايتىن مەرەيلى مەرەكە. سوڭعى 3 جىلدىڭ كورسەتكىشتەرىنە زەر سالساق، بۇل كورەگەن شەشىم قالانىڭ ەكىنشى تىنىسىن اشتى دەپ ايتۋعا ابدەن بولادى. بىرىنشىدەن، قالا بيۋدجەتى 3,6 ەسەگە ءوسىپ، 131,2 ملرد تەڭگەدەن بيىل 481 ملرد تەڭگەگە جەتتى. ينۆەستيتسيا كولەمى سوڭعى ءۇش جىلدا ەكى ەسەگە جۋىق ءوسىپ، 214 ملرد تەڭگەدەن بيىل 400 ملرد تەڭگەگە جەتەدى. 2025 جىلعا دەيىن قالاداعى نەگىزگى ينجەنەرلىك ينفراقۇرىلىم ماسەلەسى شەشىلەدى. 3 جىل بۇرىن 402,5 مىڭ شارشى مەتر تۇرعىن ءۇي بەرىلسە، بيىل ءبىر ميلليونعا جەتكىزۋدى جوسپارلاپ وتىرمىز", - دەدى ول.
ءىس-شارا باراسىندا قالا اكىمى «شىمكەنت قالاسىنىڭ قۇرمەتتى ازاماتى» اتانعان جانداردى ماراپاتتادى. ارتىنشا مەرەكەلىك كونتسەرت بولىپ، وعان تانىمال ونەر جۇلدىزدارى قاتىستى. شىمكەنت قالاسى رەسپۋبليكالىق ماڭىزى بار ءۇش قالانىڭ قاتارىنا قوسىلىپ، مەگاپوليس اتاعىن العان قالانىڭ ءبىرى.
"ادىرنا" ۇلتتىق پورتالى
