پاۆلودار وبلىسىندا شىبىن-شىركەيدىڭ بەتى قايتار ەمەس. وبلىس ورتالىعىندا جاعداي ءبىرشاما تۇراقتالدى. اسىرەسە، اۋىل جۇرتىنىڭ ماسادان مازاسى كەتتى, دەپ حابارلايدى "ادىرنا" ۇلتتىق پورتالى 24.kz ارناسىنا سىلتەمە جاساپ.
اقتوعاي اۋدانىنا قاراستى قوجامجار اۋىلىنىڭ تۇرعىندارى قانسورعىش جاندىكتەردىڭ كوپتىگى سونشا، قوراداعى قويلار ارام ءولىپ جاتىر دەيدى. مۇرات ابدۋمالىكوۆ توقتىسىنىڭ ءولىپ قالعانىن تاڭەرتەڭ كورگەن. ورىستەن ساۋ كەلگەن مارقانىڭ اۋرۋدان ولمەگەنىن ايتادى. ماسا مەن شىركەيگە شىداماعان يتتەر دە ءتۇنى بويى قىڭسىلاپ شىعادى.
مۇرات ابدۋمالىكوۆ، قوجامجار اۋىلىنىڭ تۇرعىنى:
– 3 كۇن بويى، مىنە، ماسا تالاپ جاتىر. تاڭ اتقانشا ءتۇتىن سالىپ جۇرەمىز. ءيا، ماسادان ءولدى. باسقا نەدەن؟ يتتەر، انە، جاتىر ءبارى تىعىلىپ، سارايدان شىقپايدى ەشقايدا.
ولگەن مالدان الىنعان سىناما ساراپتاماعا جىبەرىلدى. ابدەن مەزى بولعان كوپشىلىك جاعدايدى قالتا تەلەفوندارىنا ءتۇسىرىپ، الەۋمەتتىك جەلىلەرگە جۇكتەگەن. ال اۋداننىڭ اتقا مىنەرلەرى بولسا ۋلاۋ جۇمىستارى ءجۇرىپ جاتقانىن ايتادى. بۇل ءۇشىن بيىل 602 ميلليون تەڭگە بولىنگەن.
ەرمەك ماشرىقوۆ، اقتوعاي اۋدانى اكىمىنىڭ مىندەتىن اتقارۋشى:
– اقتوعاي اۋدانىنىڭ بيۋدجەتىنەن 1 ملن. 380 مىڭ تەڭگە اقشا ءبولىندى. ول اقشانىڭ 510 مىڭى پرەپارات ساتىپ الۋعا، سونان كەيىن 288 قالعان سوماسى وبرابوتكا جاساۋعا، ۋلاندىرۋ جۇمىستارىن جاساۋعا ءبولىندى. وتەس اۋىلىنان باستاپ بارلىعىندا ۋلاندىرۋ جۇمىستارىن الدەقاشان باستادىق. بۇگىنگى كۇنى 4 رەت ۋلاندىرۋ جۇمىستارى جۇرگىزىلدى. بۇل جۇمىس ءالى دە جالعاستىرىلۋدا. ەرتەڭ، بۇرسىگۇندەرى اقتوعاي باسىنا تاعى دا جاسايىن دەپ جاتىرمىز.
