قر ءبىلىم جانە عىلىم ءمينيسترى اسحات ايماعامبەتوۆ جۇمىسقا تۇرعىزعانى ءۇشىن پارا الاتىن ديرەكتورلار ماسەلەسىنىڭ قالاي شەشىلەتىنىن مالىمدەدى. بۇل تۋرالى ول Antikornews ستۋدياسىندا ايتتى، دەپ حابارلايدى «ادىرنا» ۇلتتىق پورتالى.
«ەندى، شىندىقتى ءبارىمىز بىلەمىز. ومىردە قانداي جاعدايلار بولىپ جاتقانىن دا كورىپ ءجۇرمىز. سوندىقتان ونداي ماسەلەلەردىڭ، بۇنداي تاۋەكەلدەردىڭ بار ەكەنىن مويىنداۋمىز قاجەت. ءبىز ونى بىلەمىز. بىلگەننەن كەيىن ارنايى نورماعا باستاماشى بولىپ، ونى زاڭناماعا ەنگىزدىك»، - دەدى ول.
مينيستر ەندى، مۇعالىمدى جۇمىسقا الۋ ماسەلەسىن ديرەكتور جەكە ءوزى شەشە المايتىنىن ايتتى.
«مىسالى، ءبىر بوس ورىن بولسا، وعان الدىمەن جارناما جاساپ، حابارلاندىرۋ بەرىلەدى. ناقتى جالاقىسى، جۇمىستىڭ كولەمى مەن تالاپتارى دا كورسەتىلەدى. ال ۇمىتكەرلەر كونكۋرسقا ءوز قۇجاتتارىن تاپسىرادى. ارينە، اشىقتىقتى قامتاماسىز ەتۋ ءۇشىن ءبىز وسى جۇمىستىڭ ءبارىن ەلەكتروندى فورماتقا اۋىستىرۋىمىز قاجەت»، - دەدى مينيستر.
كونكۋرس كەزىندە كوميسسيا ۇمىتكەرلەردىڭ كانديداتۋراسىن قاراپ، كاسىبي ماماندى تاڭدايدى. سونىڭ ناتيجەسىندە مەكتەپكە بىلىكتى مۇعالىمدەر كەلەدى.
«بۇگىندە وسى نورما ءبىلىم تۋرالى زاڭعا ەندى. ونى ىسكە اسىرۋ ءۇشىن مينيسترلىكتىڭ ءتيىستى بۇيرىعىن دايىنداپ جاتىرمىز. مەن ءبىر-ەكى جۇمانىڭ ىشىندە وسى بۇيرىققا ءوزىم قول قويامىن. سودان باستاپ جاڭا نورما ىسكە اسادى. بۇل – وتە ماڭىزدى ماسەلە»، - دەدى ايماعامبەتوۆ.
"ادىرنا" ۇلتتىق پورتالى
