QR Bilim jáne ǵylym mınıstri Ashat Aımaǵambetov jumysqa turǵyzǵany úshin para alatyn dırektorlar máselesiniń qalaı sheshiletinin málimdedi. Bul týraly ol Antikornews stýdııasynda aıtty, dep habarlaıdy «Adyrna» ulttyq portaly.
«Endi, shyndyqty bárimiz bilemiz. Ómirde qandaı jaǵdaılar bolyp jatqanyn da kórip júrmiz. Sondyqtan ondaı máselelerdiń, bundaı táýekelderdiń bar ekenin moıyndaýmyz qajet. Biz ony bilemiz. Bilgennen keıin arnaıy normaǵa bastamashy bolyp, ony zańnamaǵa engizdik», - dedi ol.
Mınıstr endi, muǵalimdi jumysqa alý máselesin dırektor jeke ózi sheshe almaıtynyn aıtty.
«Mysaly, bir bos oryn bolsa, oǵan aldymen jarnama jasap, habarlandyrý beriledi. Naqty jalaqysy, jumystyń kólemi men talaptary da kórsetiledi. Al úmitkerler konkýrsqa óz qujattaryn tapsyrady. Árıne, ashyqtyqty qamtamasyz etý úshin biz osy jumystyń bárin elektrondy formatqa aýystyrýymyz qajet», - dedi mınıstr.
Konkýrs kezinde komıssııa úmitkerlerdiń kandıdatýrasyn qarap, kásibı mamandy tańdaıdy. Sonyń nátıjesinde mektepke bilikti muǵalimder keledi.
«Búginde osy norma bilim týraly zańǵa endi. Ony iske asyrý úshin mınıstrliktiń tıisti buıryǵyn daıyndap jatyrmyz. Men bir-eki jumanyń ishinde osy buıryqqa ózim qol qoıamyn. Sodan bastap jańa norma iske asady. Bul – óte mańyzdy másele», - dedi Aımaǵambetov.
"Adyrna" ulttyq portaly
