ەسەت باتىردىڭ ەلىندە، جەلتوقساندىقتار وتانىندا نيكونوۆ ورتالىقتارى جۇمىس ىستەۋدە

3780
Adyrna.kz Telegram

4-ماۋسىم كۇنى قاراعاندى قالاسىنداعى بوكەتوۆ ۋنيۆەرسيتەتىندە "ورىس الەمى" قورىنىڭ قولداۋىمەن "ورىس ورتالىعى" اشىلدى دەگەن حابارلاما تارادى. بۇل تۋرالى اقپارات "قازاقستان دەگەن بولماعان. قازاق جەرى كسرو مەن رەسەي يمپەرياسىنىڭ سىيى" دەگەن رەسەيلىك ساياساتكەر، تاريحشى ۆياچەسلاۆ نيكونوۆقا تيەسىلى "ورىس الەمى" قورىنىڭ رەسمي سايتى russkiymir.ruدا جاريالاندى. وندا بۇل قازاقستانداعى ءۇشىنشى ورتالىق ەكەنى، بۇعان دەيىن الماتى مەن اقتوبە قالاسىندا اشىلعانى جازىلىپتى. ءتىپتى ولار الما-اتا جانە اكتيۋبينسك دەپ جازۋ ارقىلى تاۋەلسىز قازاقستاننىڭ جەر-سۋ، ەلدى-مەكەن اتاۋلارىن مويىندامايتىنىن دا ايقىن سەزدىرىپتى. الايدا كەيىننەن قاراعاندىدا ورتالىق اشىلعانى تۋرالى اقپارات سايتتان الىنىپ تاستالدى. دەي-تۇرا ول اقپاراتتىڭ سكريندەرى ساقتاۋلى. 

ماقالانىڭ الىنۋىنا بوكەتوۆ اتىنداعى ۋنيۆەرسيتەتتىڭ رەسمي جاۋابى اسەر ەتكەن سىڭايلى. قاراعاندى قالاسىنداعى بوكەتوۆ اتىنداعى ۋنيۆەرسيتەتتىڭ اتاۋى ورىس تىلىندە اشىلعان فەيسبۋكتەگى رەسمي پاراقشاسىندا "اكادەميك ە.ا.بوكەتوۆ اتىنداعى قاراعاندى ۋنيۆەرسيتەتىنىڭ رەسمي پاراقشاسىندا كەلەسىدەگىدەي اقپارات جاريالاندى: «6 ماۋسىمدا ا.س.پۋشكيننىڭ تۋعان كۇنى قارساڭىندا تويلاناتىن حالىقارالىق ورىس ءتىلى كۇنىنە وراي فيلولوگيا فاكۋلتەتىندە ورىس ءتىلى مەن ادەبيەتىنىڭ وقۋ كابينەتى اشىلدى. وكىنىشكە وراي، وسىعان بايلانىستى كەيبىر اقپارات قۇرالدارى مەن الەۋمەتتىك جەلىلەردە جاريالانعان مالىمەتتەردىڭ شىنايى بولماعاندىعىن ايتا كەتۋ كەرەك.
ۋنيۆەرسيتەتتە سوڭعى ۋاقىتتا تىلدەردى ساپالى وقىتۋ ءۇشىن اعىلشىن، نەمىس، قىتاي، تۇرىك تىلدەرىنىڭ كابينەتى اشىلعاندىعىن اتاپ وتكىمىز كەلەدى. اتالمىش اشىلعان كابينەتتىڭ «ورىس ءتىلى مەن ادەبيەتى» ماماندىعى بويىنشا وقىپ جاتقان ءبىلىم الۋشىلارعا جانە الىس-جاقىن شەتەلدەن كەلگەن ستۋدەنتتەرگە ورىس ءتىلى مەن ادەبيەتىن مەڭگەرتۋدى ماقسات ەتەتىندىگىن تۇسىندىرەمىز.
بۇل كابينەتتى اشۋ ماسەلەسى قازاقستانداعى رەسەيدىڭ توتەنشە جانە وكىلەتتى ەلشىلىگىمەن 2017, 2018, 2019 جىلدارى تالقىلانىپ، شەشىمىن تاپقان.
ەكىجاقتى ءوزارا كەلىسىمنىڭ نەگىزىندە 2021 جىلى ءساۋىر ايىندا بەرىلگەن 1038 دانا وقۋ ادەبيەتى فيلولوگيا فاكۋلتەتىندە ورىس ءتىلى مەن ادەبيەتى ماماندىعى بويىنشا وقيتىن ستۋدەنتتەردىڭ وقۋ اۋديتورياسىنا قويىلدى" دەپ جاۋاپ بەرگەن.  اتالمىش حابارلامادان كەيىن russkiymir.ru سايتىنداعى اقپارات ءوشىرىلدى.

Russkiymir.ru cايتىندا الەم بويىنشا اشىلعان ورتالىقتاردىڭ مەكەن-جايى مەن اقپاراتتارى بار. الەمنىڭ 52 ەلىندە نيكونوۆ قورى ورتالىقتار اشىپ ۇلگەرىپتى. ورتالىقتاردىڭ باسىم بولىگى وقۋ ورىندارىندا اشىلعان. قازاقستاندا ەكى ورتالىقتىڭ مەكەن-جايى انىق كورسەتىلگەن. ولار الماتى قالاسىندا ءال-فارابي اتىنداعى قازاق ۇلتتىق ۋنيۆەرسيتەتىندە، باسشىسى ۋماتوۆا جاننا ماكسۋتوۆنا دەپ كورسەتىلسە، اقتوبە قالاسىندا قازاق-ورىس حالىقارالىق ۋنيۆەرسيتەتىندە، باسشىسى ەمەليانوۆا ەلەنا ۆلاديميروۆنا دەپ جازىلعان. ورتالىق ازيا ەلدەرى بويىنشا "ورىس ورتالىقتارى" وزبەكستان مەن تۇركىمەنستاندا جوق.

اتالمىش ورتالىقتاردىڭ جۇمىس ىستەۋى ۇلكەن كۇمان تۋىنداتاتدى. باسشىسى ۆياچەسلاۆ نيكونوۆ "قازاقتىڭ جەرى بولماعان، ول رەسەيدىڭ سىيى" دەسە، ورتالىقتىڭ ماقساتى مادەني بايلانىس پەن دوستىق قاتىناستى ارتتىرۋ ەكەنىنە سەنۋ قيىن.  1986 جىلى جەلتوقساندا بوزداقتاردىڭ قانى ازاتتىق ءۇشىن توگىلگەن الماتىدا، رەسەي يمپەرياسىنا قارسى سوعىسىپ، ەگەسىپ وتكەن ەسەت باتىردىڭ وتانى اقتوبەدە نيكونوۆ ورتالىقتارىنىڭ بولۋى تاريحقا قيانات، ەلدىككە سىن.

اسحات قاسەنعالي،

"ادىرنا" ۇلتتىق پورتالى

پىكىرلەر