ماڭعىستاۋدا قازاقتىڭ ءۇش بيىنە ەسكەرتكىش قويىلدى

2807
Adyrna.kz Telegram

بيىل ماڭعىستاۋ جەرىندەگى «وتپان» تاريحي-مادەني كەشەنىنە - 10 جىل. وسىعان وراي، وبلىس كولەمىندە مەرەكەلىك شارالار ۇيىمداستىرىلىپ، كەڭ كولەمدە اتالىپ ءوتتى. 

ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى اياسىندا «ءۇش ءجۇزدىڭ توبە بيلەرى» اتتى مونۋمەنت كەشەنى اشىلىپ، عىلىمي-پراكتيكالىق كونفەرەنتسيا، قولونەر شەبەرلەرىنىڭ رەسپۋبليكالىق كورمە-جارمەڭكەسى مەن ۇلتتىق ويىنداردىڭ جارىسى ۇيىمداستىرىلدى. ەلباسى ماقالاسىندا «ءاربىر حالىقتىڭ، ءاربىر وركەنيەتتىڭ بارشاعا ورتاق قاسيەتتى جەرلەرى بولادى، ونى سول حالىقتىڭ ءاربىر ازاماتى بىلەدى. بۇل – رۋحاني ءداستۇردىڭ باستى نەگىزدەرىنىڭ ءبىرى. ءبىز – ۇلانعايىر جەرى مەن اسا باي رۋحاني تاريحى بار ەلمىز» دەگەن بولسا،  وسى تۇرعىدان العاندا وتپان تاۋ – تەك قازاق حالقى ءۇشىن عانا ەمەس، كيەلى تۇبەكتى بىزگە دەيىن دە جايلاعان جەتى جۇرت ءۇشىن قىمبات مەكەن. وتپان تاۋدىڭ ەجەلدەن ارقالاعان ماقسات-مىندەتى بار. ول - ىنتىماق پەن بىرلىك ساقتاۋ جانە اعايىن اراسىنداعى تاتۋلىق تۋىن تىك ۇستاۋ. كەشەننىڭ يدەولوگيالىق كورىنىسى – ەل پرەزيدەنتى نۇرسۇلتان ءابىشۇلى ۇسىنعان «ماڭگىلىك ەل» تۇجىرىمداماسىمەن ۇندەسىپ، ۇلت بىرلىگىنىڭ اجىراماس بولشەگى سانالادى.

- «وتپان تاۋ – كوپۇلتتى وتانىمىزدا تاعدىر تابىستىرعان وزگە ۇلت وكىلدەرى ءۇشىن دە قاستەرلى نىسان. بايقاعان ادامعا مۇندا ءىس جۇزىندە، قازاقستاندىق ۇلت يدەياسى جۇزەگە اسىرىلىپ جاتىر. جاڭادان اشىلعان «ءۇش ءجۇزدىڭ توبە بيلەرى» مونۋمەنتىنىڭ تۇعىرى دا وسىنداي بيىك يدەيالاردى كوزدەگەن اسقار تاۋدىڭ باسى بولماق كەرەك. مۇنىڭ ءبارى تۇتاسا كەلگەندە حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايدى. سونداي-اق ول، وتپاننىڭ ۇلىلارىمىزدىڭ ونەگەلى جولىن ناسيحاتتاۋ ارقىلى جاس ۇرپاقتىڭ ساناسىنا ۇلتتىڭ گەنەتيكالىق كودىن ءسىڭىرىپ، «ماڭگىلىك ەل» ستراتەگياسى نەگىزدەرىندە تاربيەلەۋدە اتقارعان ءرولى زور. وتپان تاۋدى قازاقتىڭ قاراشاڭىراعىنىڭ وتاۋى دەسەك، بۇگىنگى «ءۇش ءجۇزدىڭ توبە بيلەرى» مونۋمەنتىنىڭ وتپان تاۋدان ورىن تەبۋى زاڭدىلىق. ۇلىلاردىڭ ۇلاعاتى ۇرپاقتىڭ جۇرەگىنە ۇيالاسىن! ۇلتتىق كودتى ءسىڭىرۋ دەگەنىمىز – مىنە، وسى، - دەدى ماڭعىستاۋ وبلىسىنىڭ اكىمى ەرالى توعجانوۆ.


گۇلايىم شىنتەمىرقىزى،

«ەگەمەن قازاقستان».

ماڭعىستاۋ وبلىسى

پىكىرلەر