شىمكەنت قالاسىندا «جاسىل كەڭسە» رەسپۋبليكالىق كونكۋرسىنا قاتىسۋ جانە «جاسىل كەڭسە» قاعيدالارىن ەنگىزۋ بويىنشا ترەنينگ ءوتتى. ترەنينگتە ەكى جىلدا وتكەن بايقاۋدىڭ قورىتىندىلارى، سونداي-اق «جاسىل كەڭسەنى» ىسكە اسىرۋ پرينتسيپتەرى جانە ءۇشىنشى رەسپۋبليكالىق بايقاۋعا قاتىسۋ شارتتارى ۇسىنىلدى. سونىمەن قاتار، قوقىستى قايتا وڭدەۋ بويىنشا اقپارات بەرىلدى.
«جاسىل ەكونوميكانى» قولداۋ جانە G-Global-دى دامىتۋ كواليتسياسى» زتب قر ەكولوگيا، گەولوگيا جانە تابيعي رەسۋرستار مينيسترلىگى مەن ەقىۇ نۇر-سۇلتانداعى باعدارلامالار ءوفيسىنىڭ قولداۋىمەن 15 ءساۋىر مەن 31 تامىز ارالىعىندا 10 نوميناتسيا بويىنشا رەسپۋبليكالىق كونكۋرس وتكىزۋدە. وعان مەملەكەتتىك ورگانداردىڭ، ءبىلىم بەرۋ، دەنساۋلىق ساقتاۋ، ساۋدا قۇرىلىمدارىنىڭ، ونەركاسىپتىڭ، حالىقارالىق ۇيىمداردىڭ، ۇكىمەتتىك ەمەس ۇيىمداردىڭ جانە باسقالاردىڭ وكىلدەرى ون نوميناتسيا بويىنشا قاتىسا الادى.
كونكۋرسقا قاتىسۋ شارتتارى www.greenoffice-kaz.org سايتىندا جانە https://www.facebook.com/greenofficekz/ فەيسبۋك جەلىلەرىندە كورسەتىلگەن.
«جاسىل كەڭسە»، ادەتتە، بارلىق رەسۋرستار ۇنەمدەلگەن جانە قورشاعان ورتانى قورعاۋعا ارنالعان كەڭسە دەپ اتالادى.
كونكۋرس ەكولوگيالىق ءومىر سالتىن، «جاسىل» جانە تومەن كومىرتەكتى تەحنولوگيالاردى ناسيحاتتاۋعا، قوعامدىق پايدالانۋداعى عيماراتتاردىڭ ەكولوگيالىلىعىن، جايلىلىعىن جانە ەرگونوميكالىعىن ارتتىرۋعا، وزىق تاجىريبەنى، ۇزدىك تەحنولوگيالىق شەشىمدەردى تاراتۋعا، ەكولوگيالىق جاۋاپتى ۇيىمداردى برەندتەۋگە باعىتتالعان.
بايقاۋدىڭ ناتيجەلەرى 2021 جىلدىڭ قازان ايىندا جاريالانىپ، قاتىسۋشىلار سەرتيفيكاتتارمەن، ال جەڭىمپازدار ارنايى سىيلىقتارمەن ماراپاتتالادى.
شىمكەنت قالاسى اكىمدىگىنىڭ ءباسپاسوز قىزمەتى
