اقتوبە وبلىسىندا پوليتسەيلەر شارتتى تۇردە مەرزىمىنەن بۇرىن بوساتىلعان 25 ادامدى باس بوستاندىعىنان ايىرۋ ورىندارىنا قايتاردى دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتوبە وبلىسىنىڭ ۋچاسكەلىك پوليتسيا ينسپەكتورلارى جىل باسىنان بەرى "ەسەپ" جانە "ەسەپ ەلەمەنتى", "تۇرمىس", "قۇقىقتىق ءتارتىپ", "ۋچاسكە" سياقتى جەدەل-الدىن الۋ ءىس-شارالارىن، سونداي-اق رەيدتىك ءىس-شارالاردى وتكىزدى. قابىلدانعان شارالاردىڭ ارقاسىندا اعىمداعى جىلى 5 ايدىڭ قورىتىندىسى بويىنشا وبلىس اۋماعىندا جاساعان قىلمىستاردىڭ 21,6% - عا تومەندەگەنى بايقالادى.
بوستاندىققا شىققاننان كەيىن تۇزەلۋ جولىنا تۇسپەگەن جانە قوعامدىق ءتارتىپ پەن ازاماتتاردىڭ تىنىشتىعىن بۇزۋدى جالعاستىرعان شارتتى تۇردە مەرزىمىنەن بۇرىن بوساتىلعان 25 ادام باس بوستاندىعىنان ايىرۋ ورىندارىنا قايتارىلدى.
اقتوبە وبلىسى بويىنشا قاجد پروباتسيا قىزمەتىمەن بىرلەسكەن جۇمىس ناتيجەسىندە قوعامدىق ءتارتىپتى جۇيەلى تۇردە بۇزعان ەسەپتە تۇرعان 75 ادامعا قاتىستى شارتتى جازانى باس بوستاندىعىنان ايىرۋعا اۋىستىرۋ جۇزەگە اسىرىلدى، ال سوتتالعان 4 ادامنىڭ سىناق مەرزىمى ۇزارتىلدى.
"پوليتسيا دەپارتامەنتى قاجد جانە جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن بىرلەسىپ باس بوستاندىعىنان ايىرۋ ورىندارىنان بوساتىلعان ادامداردى جۇمىسقا ورنالاستىرۋ، ولاردى جاڭا ماماندىقتارعا قايتا وقىتۋ ماسەلەلەرىن شەشۋ بويىنشا شارالار قابىلداۋدا. جۇمىسپەن قامتۋ جانە الەۋمەتتىك باعدارلامالار ورگاندارىنا جۇمىسقا ورنالاسۋعا جاردەمدەسۋ ءۇشىن تۇراتىن مەكەن - جايى بار باس بوستاندىعىنان ايىرۋ ورىندارىنان بوساتىلعان ادامداردىڭ ءتىزىمى جىبەرىلەدى", - دەيدى جپقب باستىعىنىڭ ورىنباسارى امانتۇرلى تاكەشەۆ.
بيىل مامىر ايىندا وبلىستا 217 ادام جۇمىسقا ورنالاستىرىلدى، جاڭا ماماندىقتارعا قىسقا مەرزىمدى وقىتىلۋعا 2 ادام جىبەرىلگەن.
"ادىرنا" ۇلتتىق پورتالى.
