وسىدان 5 جىل بۇرىن، ياعني 2016 جىلدىڭ 5 ماۋسىمىندا اقتوبەدە قارۋ-جاراق ساتاتىن ەكى دۇكەنگە جانە №6655 اسكەري بولىمىنە لاڭكەستىك شابۋىل جاسالدى. لاڭكەستەردىڭ قولىنان 7 ادام قازا تاپتى، 30-عا جۋىق ادام ءتۇرلى جاراقاتتارمەن اۋرۋحاناعا ءتۇستى.
سول جىلى بولعان قايعىلى وقيعا بارلىعىن ەسەڭگىرەتتى. قىلمىسكەرلەردىڭ قولىنان پوليتسيا جانە اسكەري قىزمەتكەرلەرمەن بىرگە تۇرعىندار دا قازا تاپتى. بىراق ولاردىڭ ارام ويلارى ءارى قاراي ىسكە اسۋىنا قۇقىق قورعاۋ ورگاندارىنىڭ جەدەل شارالارى مۇمكىندىك بەرگەن جوق.
حالىقتىڭ تىنىشتىعىن قورعاۋ جولىندا №6655 اسكەري ءبولىمىنىڭ ساربازدارى — مايور دانيەل مايلىباەۆ، كىشى سەرجانت بەرىكجان قاليەۆ، قاتارداعى جاۋىنگەر دوسبول ساپار قىلمىسكەرلەرمەن ايقاسىپ، قازا تاپتى. ولاردىڭ جانكەشتىلىكپەن جاساعان ارەكەتتەرى لايىقتى باعاسىن الىپ، تاۋەلسىز قازاقستاننىڭ ەرلىك تۋرالى جىلناماسىنا جازىلدى.
قازا تاپقان اقتوبەلىكتەردىڭ ىشىندە «پاللادا» قارۋ-جاراق دۇكەنىنىڭ 44 جاستاعى ساتۋشىسى اندرەي ماكسيمەنكو، 69 جاستاعى زەينەتكەر نيكولاي ونيششەنكو، 35 جاستاعى ميحايل ماتروسوۆ بار. ولار قىلمىسكەرلەردىڭ قولىنان كەزدەيسوق قازا بولدى. 33 جاستاعى «كۇزەت» قىزمەتكەرى مەيىرحان تاجىباەۆ قىزمەتتىك مىندەتىن ورىنداۋ كەزىندە قايتىس بولدى.
تەراكتىدە قازا تاپقانداردىڭ بارلىعىنىڭ ارتىندا بالالارى جەتىم قالدى. ولاردىڭ اراسىندا بالاباقشا مەن مەكتەپ جاسىنداعى بالالار دا بار. قازا تاپقان اسكەريلەردىڭ ءبىرى — 20-عا دا تولماعان قىرشىن جاس ەدى، ونىڭ ارتىندا اتا-اناسى اڭىراپ قالدى.
ال لاڭكەستىك وقيعاعا كەلسەك، وعان 27 ادام قاتىسقان. ولاردىڭ ون سەگىزى قولعا ءتۇسىرۋ وپەراتسياسى كەزىندە اتىلدى، 9-ى ۇستالدى. جالپى، ايىپتالۋشىلار سانى — 29: 9 ادام تەرروريستىك اكتىگە قاتىسقانى ءۇشىن، سونداي-اق، قر قك-ءنىڭ باسقا دا باپتارى بويىنشا، ال 18 ادام — قىلمىستىق وقيعاعا دايىندىق بولىپ جاتقانىن بىلە تۇرا، حابارلاماعانى ءۇشىن; قالعان ەكى ادام قىلمىستى جاسىرعانى ءۇشىن ايىپتالدى.
قىلمىستىق ءىس ماتەريالدارى 201 تومعا جەتكەن، 26 رەت تەرگەۋ ءىسى، 215 سوت-مەديتسينالىق ساراپتاما جۇرگىزىلگەن. وقيعا ورنىندا تۇسىرىلگەن بەينەجازبالاردان مالىمەتتەر بانكى قۇرىلعان. سوتقا 27 ادام — ايىپتالۋشىلار مۇددەسىن قورعاۋعا، 88 ادام — ءجابىر شەگۋشى رەتىندە، 48 ادام كۋاگەر رەتىندە قاتىسقان.
2016 جىلى 9 ماۋسىمدا اقتوبەدە بولعان تەراكتىگە بايلانىستى قازاقستاندا ۇلتتىق ازا تۇتۋ كۇنى جاريالاندى.
5 جىل بۇرىن بۇل كۇنى رەسپۋبليكا كولەمىندە تۋلار تومەن ءتۇسىرىلدى. مادەني-كوپشىلىك جانە سپورتتىق شارالار كەيىنگە شەگەرىلدى. تەلە-راديولاردان بەرىلەتىن ويىن-ساۋىق باعدارلامالارى توقتاتىلدى.
مۇنداي وقيعا قايتالانباسىن جانە ەلىمىزدىڭ تىنىشتىعى بۇزىلماسىن دەپ تىلەيمىز!
"ادىرنا" ۇلتتىق پورتالى.
