قازاقستاندا جۇمىسقا قابىلداۋ ءۇشىن سۇرالاتىن قاعاز انىقتامالار ەندى بولمايدى. قازىر جۇمىس بەرۋشىگە قاجەتتى قۇجاتتاردى بىردەن جىبەرەتىن جاڭا سەرۆيس تەستىلەنىپ جاتىر. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى «ادىرنا» ۇلتتىق پورتالى.
«ازاماتتارعا دا، بيزنەسكە دە قاتىستى پروتسەستەر بار. مىسالى، جۇمىسقا قابىلداۋ. حالىققا قىزمەت كورسەتۋ ورتالىقتارىندا نەمەسە ەلەكترون ۇكىمەت پورتالىنان الۋعا بولاتىن (قاجەتتى) انىقتامالار ميلليونداعان رەت بەرىلەدى ەكەن.
بيزنەس-قۇرىلىمدار سوتتىلىعى تۋرالى، پسيحو-ناركوباقىلاۋ انىقتاماسى مەن مەكەنجايىن راستاۋدى تالاپ ەتەدى. جىل سوڭىنا دەيىن سەرۆيس جاساۋدى جوسپارلاپ وتىرمىز، ول قازىر تەستىدەن ءوتىپ جاتىر. ونىڭ كومەگىمەن ادامدار انىقتامالارىن ەشقايدا اپارماسا دا بولادى»، - دەدى ول.
ءمينيستردىڭ ايتۋىنشا، اتالمىش سەرۆيس جۇمىس بەرۋشىگە جاڭا قىزمەتكەر تۋرالى انىقتامالاردى ءوز بەتىنشە سۇراتۋعا مۇمكىندىك بەرەدى.
«(جۇمىس بەرۋشى) جسن ەنگىزەدى، ول العىسى كەلگەن اقپاراتقا باسادى. ادامعا بۇل دەرەكتەردى جۇمىس بەرۋشىگە ەلەكترون فورماتتا بەرۋگە رۇقسات سۇراپ SMS (سۇراقپەن) كەلەدى. ول «وك» دەپ جاۋاپ بەرسە، وندا ءبىز بۇل اقپاراتتى جۇمىس بەرۋشىگە دەرەكتەر بازاسىنان جۇكتەيمىز. ياعني، جۇمىس بەرۋشىلەر مەن حقكو اراسىندا ارلى-بەرلى ءجۇرۋ توقتايدى»، - دەدى ول.
