كەشە، 3 ماۋسىم كۇنى اقىن جۇما-نازار سومجۇرەك ومىردەن ءوتتى. بۇل تۋرالى تولەمىرزا تەمىربەكۇلى Facebook پاراقشاسىندا جازدى، دەپ حابارلايدى «ادىرنا» ۇلتتىق پورتالى.
«يساتاي-ماحامبەت باتىرلاردىڭ قاھارماندىعىن جىرلاعان ىعىلمان شورەكوۆتىڭ «ەل قامىن جەگەن ەرلەردىڭ ءسوز بىلگەن جاندا حاقى بار» دەگەن ءسوزى بار. وسى ايتىلعان «ەل قامىن جەۋ» - قىلىش-نايزا الىپ قان مايداندا ەرلىك كورسەتۋ عانا ەمەس، بەيبىت زاماندا دا ەلىنە قولىنان كەلگەنىنشە ەڭبەك قىلۋ. ءوز باسىم، حالىققا قىزمەت قىلۋدىڭ وزىق ۇلگىسىن كورسەتكەن زاماناۋي قايراتكەردىڭ ءبىرى، ءتىپتى بىرەگەيى رەتىندە – جۇما-نازار سومجۇرەك اعانى اتار ەدىم. ەگەر، جوعارىدا اتالعان كوسەمسوزدى اقيقي دەپ تانىساق، «ەل قامىن جەگەن ەر» رەتىندە جۇما-نازار اعانىڭ بىزدە قاقى بار. قانداي دەسەڭىز، ونىڭ – قوعامداعى ورنىن، بار بولمىسىن، قازاعىما بولسىن دەگەن پاتريوتتىعىن، مەن ولسەمدە ەل ەسىنە السا ەكەن دەگەندى كۇتۋ ھاقى بار. حاكىم اباي ايتپاقشى: «ادام ولگەن كەزدە ەمەس، ۇمىتىلعاندا ولەدى» دەيدى. ەندەشە جۇما-نازار اعا ولگەن جوق. سەبەبى ونى ساعىناتىن، ىزدەيتىن، ۇمىتپايتىن ازدى-كوپتى ءوزى ءومىر سۇرگەن ورتادى جاقسىلارى مەن جايساڭدارى بار. ءاز-اعانىڭ جوعارىداعى ءبىز ايتقان ھاقى وسى جاقسىلار مەن جايساڭداردىڭ وسىنداي مىندەت-پارىزىنان تۋىنداسا كەرەك-ءتى.
ەندەشە قازاعىم دەپ ونىڭ كوز الدىندا شىققان بيىگىنەن الاسارماي كەلە جاتقان ءبىر تۇلعا بولسا، ول – جۇما-نازار اعام ەدى.
اعام، قوعام قايراتكەرى، اقىن، جازۋشى، ءار جىلداردا مەكتەپتە مۇعالىم، جاستار جەتەكشىسى، رەسپۋبليكالىق «قازاقستان اۋىل شارۋاشىلىعى» جۋرنالىندا، وبلىستىق «تورعاي تاڭى» گازەتىندە ءتىلشى بولىپ جۇمىس ىستەدى. وتكىر ادەبي سىندارى، پروبلەمالىق، الەۋمەتتىك تاقىرىپتاردى وزەك ەتكەن كوپتەگەن ماقالالارى رەسپۋبليكالىق ءباسپاسوز بەتتەرىندە جاريالاندى. «كوكتەم تىنىسى»، «نۇرلى نىسانا» اتتى ولەڭ كىتاپتارى، «سارىارقا» تاڭدامالى قوس تومدىق جىر جيناعى جارىق كوردى.
اعانىڭ جاس ۇرپاقتى تاربيەلەۋدەگى سىڭىرگەن ەڭبەگى ءوز الدىنا، بۇل كىسىنىڭ ادامنىڭ ءوزىن-ءوزى تانۋ سالاسىنداعى ەڭبەكتەرىن وقىساڭ ءورىسىڭ كەڭەيەدى، تىنىسىڭ اشىلادى. ەستەلىك جازبالارىنان جانىڭ جادىرايدى، سۇحباتتارىنان ساناڭ سەرگيدى. اعانىڭ ادال جارمەن اراداعى مəمىلەسى بار، ۇل-قىزدارى، نەمەرەلەرىمەن جاسايتىن قارىم-قاتىناسى بار، اعايىن-تۋىسقا ۇنەمى كورسەتەتىن قامقورلىعى بار، قىسقاسى قاي جاعىنان دا ۇلگى الۋعا بولادى. كۇن وتكەن سايىن قازىناعا اينالىپ، قادىرى ارتىپ كەلە جاتقان شىن مəنىندەگى تۇلعا ەدى!!!
جۇما-نازار اعا مەن شىعارىپ جاتقان رەسپۋبليكالىق قوعامدىق-ساياسي «ءتورتىنشى بيلىك» گازەتىنىڭ تۇراقتى اۆتورى بولدى. اعا ءبىر سوزىندە: «تولەمىرزا، سەنىڭ گازەتىڭنىڭ اتى ەرەكشە. سەن بۇل گازەتتى شىمكەنتتە ەمەس، باس قالا –استانادا شىعار. كەل كوپ بولىپ كومەك قولىن بەرەمىز...»،-دەپ ارنايى شاقىرىپ ەدى. كەلگەننەن كەيىن دە كوپ كومەگى ءتيدى. تاياۋدا سويلەسكەنىمدە اعا: «كەلەلى شارۋالاردى كوتەرىپ جاتىرمىن. جاقىندا ناتيجەسى شىعىپ قالار. قۇداي قالاسا سەنىڭ گازەتىڭ بىزگە جۇمىس جاسايتىن بولادى دايىندالا بەر»،-دەپ ەڭسەنى ءبىر كوتەرىپ تاستاعان اعالىعىن بۇگىن قالاي ايتپايمىن.
امال جوق اعامدى ەسىمە الىپ، سۇيگەن جارى ايزادا جەڭەشەمە ايتارىم، سىزگە اللا ءبارىن بەردى شۇكىر دەڭىز!
«ومىرگە مەنىڭ وكپەم جوق،
جامانعا ەسەم كەتكەن جوق.
بىرەۋگە مەندە جەتپەدىم،
بىرەۋلەر ماعان جەتكەن جوق!» – دەيدى اقىن ومىرزاق قوجامۇراتوۆ.
جەڭەشە، اعاعا جەتە الماعان، ونىڭ ىستەگەن ءىسىنىڭ جارىمىنىڭ جارتىسىندا ىستەي الماعان، ول كىرگەن ەسىككە كىرۋ بىلاي تۇرسىن اشپاعاندار قانشاما. ءسىز سۇيگەن جاردى سۇيە الماي، سۇيسەدە تاناۋى تولىپ ءسابيىنىڭ ءيىسىن ءبىر قۇرىشى قانىپ يىسكەي الماي پەرزەنتسىز وتكەندەر قانشاما؟! پەرزەنت كورىپ، پەرزەنتى ناركومان بولىپ، سول پەرزەنتتىڭ كۇيىگىنەن اجالىنان بەس كۇن بۇرىن جۇرەگى
جارىلىپ ءولىپ كەتكەندەر قانشاما؟!
اعام ەلدىڭ ەركەسى، قالاۋلىسى بولدى. جاستىق، جىگىتتىك شاعى جاقسى مەن جايساڭنىڭ ورتاسىندا ءوتتى. ءوزىڭنىڭ بويجەتكەن شاعىڭدا جۇما-نازارداي جىگىتتىڭ سۇلتانىمەن تابىسىپ اتا-اناڭدى قۋانتتىڭ. تويلارىڭ سول كەزدەگى ۇيلەنۋ تويلارىنىڭ الدى بولدى. قۇرساعىڭىز قۇتتى بولىپ اللا مارتەبەلەرىڭدى اسىراتىن باۋبەكتەي ۇل، ەركەگۇلدەي قىز پەرزەنتتەرىمەن نىعىمەتتەدى.
ءسىز جەڭەشە ءوز قاتارىڭىزدىڭ كوبىنەن كوش ىلگەرىسىز. ەشقاشان تاعدىرىڭىزعا نالىماڭىز.
ءماشھۇر ءجۇسىپ:
«دۇنيە تۇلكى قۇيرىق بۇراڭداعان،
باق تايسا مال مەن داۋلەت قۇرالماعان.
كۇنىنە توقسان بالە كورسەڭ داعى،
كۇدەرىڭدى ءبىر ۇزبە ءبىر اللادان!» – دەمەپ پە ەدى. ايزادا جەڭەشە، اللادان ەشقاشاندا كۇدەر ۇزبەيىك. اللاعا شۇكىرلىك جاساپ، ءتاۋبا دەيىك! جۇما-نازار اعانىڭ رۋحى شات بولسىن! ءاۋمين!»، - دەپ جازدى ول.
مارقۇمنىڭ تۋىسقاندارىنا قايعىرا كوڭىل ايتامىز!
"ادىرنا" ۇلتتىق پورتالى
