بۇگىن، 4 ماۋسىم – مەملەكەتتىك رامىزدەر كۇنى.
1992 جىلدىڭ 4 ماۋسىمىندا ەلباسى نۇرسۇلتان نازارباەۆ «قازاقستان رەسپۋبليكاسىنىڭ مەملەكەتتىك تۋى تۋرالى»، «قازاقستان رەسپۋبليكاسىنىڭ مەملەكەتتىك ەلتاڭباسى تۋرالى» جانە «قازاقستان رەسپۋبليكاسى مەملەكەتتىك ءانۇرانىنىڭ مۋزىكالىق رەداكتسياسى تۋرالى» زاڭدارعا قول قويعان بولاتىن. «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى.
1992 جىلى مەملەكەتتىك رامىزدەردى دايىنداۋ ءۇشىن ارنايى شىعارماشىلىق كوميسسيا قۇرىلدى. قۇرامىنا بەلگىلى زاڭگەرلەر مەن قوعام قايراتكەرلەرى كىردى. ال سودان سوڭ ەلتاڭبا، تۋ، ءانۇران جوباسىن جاساۋعا كونكۋرس جاريالانعان ەدى.
اتالمىش كونكۋرسقا 600-دەن استام ادام قاتىستى. مەملەكەتتىك تۋ ەسكيزى بويىنشا 1200 ءوتىنىمنىڭ ىشىنەن سۋرەتشى شاكەن نيازبەكوۆ سالعان مەملەكەتتىك تۋ بەكىتىلدى.
ەلتاڭبا جوباسى بويىنشا ساۋلەتشى جانداربەك مالىبەكوۆ پەن شوتا ءۋاليحانوۆتىڭ ەڭبەگى ۇزدىك دەپ تانىلدى. ال 2018 جىلى ەلتاڭبادا «قازاقستان» جازۋى لاتىن گرافيكاسىمەن QAZAQSTAN وزگەرتىلدى.
"ادىرنا" ۇلتتىق پورتالى
