حالىق نارازىلىق ءبىلدىردى: 1 ملرد 51 ملن تەڭگەگە ەسكەرتكىش سالىنباق

1784
Adyrna.kz Telegram

1 ميلليارد 51 ميلليون تەڭگە. پاۆلودار وبلىسى باياناۋىل اۋدانىندا سالىناتىن اۋماعى ۇلكەن ساياباققا ءدال وسىنداي قارجى بولىنگەن. سەرۋەندەيتىن ورىننىڭ اشىلۋىن اۋدان حالقى اسىعا كۇتەدى. تەك سول ساياباققا ورنالاستىرلادى دەگەن قازاقتىڭ جاسىباي مەن ولجاباي باتىرلارىنىڭ ەسكەرتكىشى كوپشىلىكتىڭ قارسىلىعىن تۋداردى. ويتكەنى تاس مۇسىندەرگە تىم كوپ قاراجات قاراستىرىلىپ وتىر، دەپ حابارلايدى «ادىرنا» ۇلتتىق پورتالى «ينفورمبيۋرو» باعدارلاماسىنا سىلتەمە جاساپ.  

بۇل جاڭا ەسكەرتكىشتىڭ قاعاز نۇسقاسى. بولاشاقتا بۇل ماڭعا جاسىباي مەن ولجاباي باتىرلاردىڭ ەسكەرتكىشى بار اۋماعى ۇلكەن ساياباق سالىنباق. سەبەبى، زامانىندا جاۋ جاعادان العاندا جەرىن قورعاعان جاسىباي باتىر باياناۋىل اۋدانىنىڭ تۋماسى. ال، ناعاشىسى ولجاباي باتىر اقمولا وبلىسىندا دۇنيەگە كەلگەن. ەكەۋى دە جاسىباي كولىنىڭ جاعاسىنداعى ۇرىستاردا كوزگە تۇسكەن. وسىعان بايلانىستى باياناۋلاداعى دەمالىس ورنى جاسىباي باتىردىڭ اتىمەن اتالىپ كەتكەن. ال، تۇرعىندار بولسا، ەسكەرتكىشتىڭ سالىنعاندىعى دۇرىس، بىراق، بۇل قاراجات تىم كوپ دەيدى.

«1 ميلليارد 50 ملن-عا قازىرگى جاعدايدا وسىنداي قىراۋار اقشانى جۇمساپ، قاجەت ەمەس - دەپ ەسەپتەيمىز. ونىڭ سالاتىن جەرى دە قولايسىز. باسقا جەرگە سالۋعا بولادى. ونداي قىرۋار اقشا جۇمساماي، كەرەمەت ەسكەرتكىش ورناتۋعا بولادى دەپ ەسەپتەيمىز»، - دەيدى باياناۋىل اۋىلى ارداگەرلەر كەڭەسىنىڭ توراعاسى تىلەيعالي مۋسين.

ال اۋدان بەلسەندىسى ورال سارتاەۆ بۇل قاراجاتتى الەۋمەتتىك ماسەلەلەردى شەشۋگە جۇمساۋ كەرەكتىگىن ايتادى. سەبەبى ەلدى-مەكەندە ءالى كۇنگە دەيىن شەشىمىن تاپپاعان الەۋمەتتىك ماڭىزى بار تاقىرىپتار جەتىپ ارتىلادى. سونىڭ ءبىرى - اۋدان ورتالىعى باياناۋىلعا كارىز جۇيەسىن تارتۋ.

«باياناۋىلعا بۇگىنگى تاڭدا ەڭ ءبىرىنشى كەرەك نارسە ول - كارىز جۇيەسى. ءبىزدىڭ جەرىمىز ساز، بالشىق ەمەس، تاستاق. ونىڭ ءبارى كولگە بارادى. ونى ەكولوگيالىق تۇرعىدا دالەلدەگەنبىز. كول اقىرىن-اقىرىن قۇرىپ كەلە جاتىر. بۇلاي بولاتىن بولسا، ءبىر 15-20 جىلدان كەيىن كولگە شومىلۋعا بولمايتىنداي جاعداي بولادى»، - دەيدى باياناۋىل اۋداندىق فەرمەرلەر وداعىنىڭ توراعاسى ورال سارتاەۆ.

ال اۋدان اكىمى قانات كارىموۆ ءۇشىن ەسكەرتكىشكە 1 ميلليارد 51 ميلليون تەڭگە كوپ ەمەس. ونىڭ ۇستىنە قاراستىرىلىپ وتىرعان سومانىڭ 560 ميلليون تەڭگەسى دەمەۋشىلەر ەسەبىنەن - دەيدى.

«جوبانىڭ قۇنى نەگىزى جالپى 934 ملن تەڭگە. 600-دەن استام اعاش وتىرعىزۋ كەرەك. 2,5 مىڭ شارشى مەتر گۇلزار، ادامدار جۇرەتىن جولاشىقتار، 100-دەن استام جارىقتاندىرۋ ورىندارى، بالالارعا، جاستارعا ارنالعان الاڭدارى بار. ەندى وسىنداي ەكى ءمۇسىن. سوندىقتان، قىمبات دەپ ايتىپ جاتقان ادامدارعا تىم قىمبات دەپ ايتا المايمىن»، - دەيدى باياناۋىل اۋدانىنىڭ اكىمى قانات كارىموۆ.

اۋدان اكىمدىگى بۇدان بولەك باياناۋىلعا كىرەبەرىستەگى ستەللانى الىپ، جاڭاسىن قويۋدى دا جوسپارلاپتى. ال جەرگىلىكتى حالىق تاريحي ماڭىزى بار بەلگىنى اۋىستىرۋدىڭ قاجەتتىگى جوقتىعىن ايتادى. دەسە دە، جوبا ساراپتامادان وتكىزىلىپ، كونكۋرس جاريالانىپ قويىپتى. قۇرىلىسى كەلەسى جىلى اياقتالادى - دەپ كۇتىلىپ وتىر.

"ادىرنا" ۇلتتىق پورتالى

(فوتو Stan.kz سايتىنان)

پىكىرلەر