1 mıllıard 51 mıllıon teńge. Pavlodar oblysy Baıanaýyl aýdanynda salynatyn aýmaǵy úlken saıabaqqa dál osyndaı qarjy bólingen. Serýendeıtin orynnyń ashylýyn aýdan halqy asyǵa kútedi. Tek sol saıabaqqa ornalastyrlady degen qazaqtyń Jasybaı men Oljabaı batyrlarynyń eskertkishi kópshiliktiń qarsylyǵyn týdardy. Óıtkeni tas músinderge tym kóp qarajat qarastyrylyp otyr, dep habarlaıdy «Adyrna» ulttyq portaly «Informbıýro» baǵdarlamasyna silteme jasap.
Bul jańa eskertkishtiń qaǵaz nusqasy. Bolashaqta bul mańǵa Jasybaı men Oljabaı batyrlardyń eskertkishi bar aýmaǵy úlken saıabaq salynbaq. Sebebi, zamanynda jaý jaǵadan alǵanda jerin qorǵaǵan Jasybaı batyr Baıanaýyl aýdanynyń týmasy. Al, naǵashysy Oljabaı batyr Aqmola oblysynda dúnıege kelgen. Ekeýi de Jasybaı kóliniń jaǵasyndaǵy urystarda kózge túsken. Osyǵan baılanysty Baıanaýladaǵy demalys orny Jasybaı batyrdyń atymen atalyp ketken. Al, turǵyndar bolsa, eskertkishtiń salynǵandyǵy durys, biraq, bul qarajat tym kóp deıdi.
«1 mıllıard 50 mln-ǵa qazirgi jaǵdaıda osyndaı qyraýar aqshany jumsap, qajet emes - dep esepteımiz. Onyń salatyn jeri de qolaısyz. Basqa jerge salýǵa bolady. Ondaı qyrýar aqsha jumsamaı, keremet eskertkish ornatýǵa bolady dep esepteımiz», - deıdi Baıanaýyl aýyly ardagerler keńesiniń tóraǵasy Tileıǵalı Mýsın.
Al aýdan belsendisi Oral Sartaev bul qarajatty áleýmettik máselelerdi sheshýge jumsaý kerektigin aıtady. Sebebi eldi-mekende áli kúnge deıin sheshimin tappaǵan áleýmettik mańyzy bar taqyryptar jetip artylady. Sonyń biri - aýdan ortalyǵy Baıanaýylǵa káriz júıesin tartý.
«Baıanaýylǵa búgingi tańda eń birinshi kerek nárse ol - káriz júıesi. Bizdiń jerimiz saz, balshyq emes, tastaq. Onyń bári kólge barady. Ony ekologııalyq turǵyda dáleldegenbiz. Kól aqyryn-aqyryn quryp kele jatyr. Bulaı bolatyn bolsa, bir 15-20 jyldan keıin kólge shomylýǵa bolmaıtyndaı jaǵdaı bolady», - deıdi Baıanaýyl aýdandyq fermerler odaǵynyń tóraǵasy Oral Sartaev.
Al aýdan ákimi Qanat Kárimov úshin eskertkishke 1 mıllıard 51 mıllıon teńge kóp emes. Onyń ústine qarastyrylyp otyrǵan somanyń 560 mıllıon teńgesi demeýshiler esebinen - deıdi.
«Jobanyń quny negizi jalpy 934 mln teńge. 600-den astam aǵash otyrǵyzý kerek. 2,5 myń sharshy metr gúlzar, adamdar júretin jolashyqtar, 100-den astam jaryqtandyrý oryndary, balalarǵa, jastarǵa arnalǵan alańdary bar. Endi osyndaı eki músin. Sondyqtan, qymbat dep aıtyp jatqan adamdarǵa tym qymbat dep aıta almaımyn», - deıdi Baıanaýyl aýdanynyń ákimi Qanat Kárimov.
Aýdan ákimdigi budan bólek Baıanaýylǵa kireberistegi stellany alyp, jańasyn qoıýdy da josparlapty. Al jergilikti halyq tarıhı mańyzy bar belgini aýystyrýdyń qajettigi joqtyǵyn aıtady. Dese de, joba saraptamadan ótkizilip, konkýrs jarııalanyp qoıypty. Qurylysy kelesi jyly aıaqtalady - dep kútilip otyr.
"Adyrna" ulttyq portaly
(foto Stan.kz saıtynan)
