اقتوبەدە "ۆاز 2114" اۆتوكولىگىن ۇرلاپ، ايداپ كەتكەن، ءبىر-بىرىنە تۋىس ەكى كۇدىكتى ۇستالدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
سوڭعى ايلاردا اقتوبە قالاسىندا رەسەيلىك اۆتوكولىكتەردى ۇرلاۋ وقيعالارى جيىلەپ كەتتى. ماسەلەن، 13 مامىردا 8 ناۋرىز كوشەسىندەگى ءۇيدىڭ اۋلاسىنان رەسەي ەسەبىندەگى "ۆاز 2115" ماركالى اۆتوكولىك ۇرلاندى. ەكى كۇننەن كەيىن قوناەۆ كوشەسىندەگى ءۇيدىڭ اۋلاسىنان 49 جاستاعى اقتوبەلىككە تيەسىلى رەسەيلىك ءنومىرلى "ۆاز 2114" ماركالى اۆتوكولىگىن ايداپ كەتكەن.
وسى وقيعادان كەيىن اتالعان قىلمىستاردى اشۋ ءۇشىن ارنايى توپ قۇرىلدى. ولار 27 مامىردا كەزەكتى "ۆاز 2114" اۆتوكولىگىن ايداپ اكەتكەننەن كەيىن جالدامالى پاتەردە بىرگە تۇراتىن، ءبىر-بىرىنە تۋىستىعى بار 26 جاستاعى ەكى كۇدىكتىنى ۇستادى.
الدىن الا تەرگەۋ بارىسىندا ولاردىڭ ءبىرىنشى ۇرلاعان اۆتوكولىگىن قۇرمىش اۋدانىنان تاپتى، ال ەكىنشىسىن بولشەكتەپ ساتۋعا تاپسىرعان، ال ءۇشىنشى اۆتوكولىگىن ۇرلاۋعا ارەكەت جاساعان كەزدە پوليتسيا قىزمەتكەرلەرى ولاردى ۇستاپ الدى.
قازىرگى ۋاقىتتا جوعارىدا اتالعان ازاماتتاردىڭ اقتوبە قالاسىندا وسىنداي ۇرلىقتاردى جاساۋعا قاتىستىلىعى تەكسەرىلۋدە. قر قك 188-بابى 3-بولىگى "ۇرلىق" بويىنشا سوتقا دەيىنگى تەرگەۋ جۇرگىزىلۋدە.
"ادىرنا" ۇلتتىق پورتالى.
