توقاەۆ كونستيتۋتسيالىق كەڭەستىڭ توراعاسىن قابىلدادى

1959
Adyrna.kz Telegram

پرەزيدەنت قاسىم-جومارت توقاەۆ كونستيتۋتسيالىق كەڭەستىڭ توراعاسى قايرات ءماميدى قابىلدادى، - دەپ حابارلايدى akorda.kz.

مەملەكەت باسشىسىنا كونستيتۋتسيالىق كەڭەستىڭ الداعى پارلامەنت پالاتالارىنىڭ بىرلەسكەن وتىرىسىندا ەلىمىزدەگى كونستيتۋتسيالىق زاڭدىلىقتاردىڭ جاي-كۇيى تۋرالى جاسايتىن كەزەكتى جولداۋىنا دايىندىق بارىسى باياندالدى.

"بۇل ماڭىزدى قۇجاتتا كونستيتۋتسيالىق ءىس جۇرگىزۋ پراكتيكاسى قورىتىندىلانادى. قازىرگى زاڭنامادا جانە ونى قولدانۋ تاجىريبەسىندە كونستيتۋتسيالىق نورمالاردىڭ ىسكە اسۋى، كونستيتۋتسيالىق كەڭەس شەشىمدەرىنىڭ ورىندالۋىنا باعا بەرىلەدى. سونىمەن قاتار ازاماتتاردىڭ كونستيتۋتسيالىق قۇقىقتارى مەن بوستاندىقتارىن ساقتاۋ جانە قورعاۋ ماسەلەلەرى قارالادى", - دەدى كونستيتۋتسيالىق كەڭەستىڭ توراعاسى.

قايرات ءمامي بيىلعى جولداۋ تاۋەلسىزدىكتىڭ 30 جىلدىعىنا ارنالاتىنىن جانە كونستيتۋتسيالىق كەڭەس رەسپۋبليكاداعى زاڭ ۇستەمدىگىن ودان ءارى كۇشەيتۋ جونىندە ناقتى ۇسىنىستار جاسايتىنىن ايتتى.

پرەزيدەنت كونستيتۋتسيانىڭ قازاقستان مەملەكەتتىلىگى مەن ەل جەتىستىگىنىڭ نەگىزى بولىپ تابىلاتىنىن ايتتى. وسى ورايدا، كونستيتۋتسيالىق كەڭەستىڭ قىزمەتى اتا زاڭ ەرەجەلەرىن جۇزەگە اسىرۋدا ماڭىزدى ءرول اتقاراتىنىنا توقتالدى. مەملەكەت اۋماعىندا كونستيتۋتسيا ۇستەمدىگىن قامتاماسىز ەتۋ ەل دامۋىنىڭ مىندەتتى شارتى ەكەنىن ايتتى.

پىكىرلەر