قر ەڭبەك جانە حالىقتى الەۋمەتتىك قورعاۋ مينيسترلىگى 2019 جىلى جۇرگىزىلگەن كرەديتتىك امنيستيانى ۇزارتۋدى ۇسىندى. سەبەبى الەۋمەتتىك جاعىنان وسال توپتاردىڭ ىشىندە 300 مىڭ تەڭگەنى كەشىرۋ شاراسىن پايدالانىپ ۇلگەرمەگەن ازاماتتار بار، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
«قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋعا بولىنگەن قاراجاتتى پايدالانۋدىڭ كەيبىر ماسەلەلەرى تۋرالى» ۇكىمەتتىڭ 2019 جىلعى 15 شىلدەدەگى №520 قاۋلىسىنا وزگەرىستەر ەنگىزۋگە ارنالعان قۇجاتتىڭ جوباسى «اشىق نقا» پورتالىندا جاريالاندى.
الەۋمەتتىك جاعىنان وسال ازاماتتار ءتۇرلى سەبەپتەرمەن ومىرلىك قيىن جاعدايعا تاپ بولىپ، ءوز اتىنا العان كرەديتتىك مىندەتتەمەلەرىن ورىنداي الماي وتىر.
«قولدانىستاعى قاۋلىدا كوزدەلگەن مەرزىمدەر اياقتالعاننان كەيىن مەملەكەتتىك ورگانداردىڭ اقپاراتتىق جۇيەلەرىندە دەرەكتەردىڭ بولماۋىنا بايلانىستى بەرەشەگى وتەلمەي قالعان ادامدار انىقتالدى»، - دەلىنگەن تۇسىنىكتەمەدە.
وسىعان وراي «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ تۋرالى» قازاقستان رەسپۋبليكاسى پرەزيدەنتىنىڭ 2019 جىلعى 26 ماۋسىمداعى № 34 جارلىعىنىڭ كۇشىنە ىلىگەتىن ادامداردى تولىقتاي قامتۋ ماقساتىندا جارلىقتى ىسكە اسىرۋ مەرزىمدەرىن ۇزارتۋ ۇسىنىلىپ وتىر.
كرەديتتىك امنيستيانىڭ مەرزىمىن ۇزارتۋ وعان ىلىنبەي قالعان ازاماتتاردى قامتىپ، ولاردىڭ قارجىلىق جاعدايىن جاقسارتۋعا مۇمكىندىك بەرەدى.
قۇجاتتىڭ جوباسى 14 ماۋسىمعا دەيىن تالقىلاۋعا شىعارىلىپ وتىر.
ايتا كەتەيىك، كرەديتتىك راقىمشىلىق كەزىندە الەۋمەتتىك جاعىنان وسال توپتاردىڭ تۇتىنۋشىلىق كرەديتتەرى بويىنشا نەگىزگى قارىزدىڭ 300 مىڭ تەڭگەسى وتەلدى. بىراق كرەديتتىڭ جالپى سوماسى 3 ميلليوننان اسپاۋى شارت.
"ادىرنا" ۇلتتىق پورتالى
