28 مامىردا نۇر-سۇلتان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا «استانا LRT» جوباسى بويىنشا ايىپتالعاندارعا ۇكىم ايتىلدى، دەپ حابارلايدى «ادىرنا» ۇلتتىق پورتالى.
سوت ۇكىمى بويىنشا:
- نۇر-سۇلتان قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى جەتەكشىسى راشيد امانجولوۆ 10 جىلعا باس بوستاندىعىنان ايىرىلدى. وعان مەملەكەتتىك قىزمەتپەن اينالىسۋىنا تىيىم سالىندى. قاۋىپسىزدىگى جوعارى مەكەمەدە، ياعني قاتاڭ رەجيمدەگى كولونيادا جازاسىن وتەيدى;
- نۇر-سۇلتان قالالىق ءماسليحاتىنىڭ حاتشىسى، بۇرىنعى دەپۋتات جانات نۇرپەيىسوۆ 8 جىلعا باس بوستاندىعىنان ايىرىلدى. بەس جىل مەملەكەتتىك قىزمەتپەن اينالىسۋىنا تىيىم سالىندى. قاۋىپسىزدىگى ورتاشا مەكەمەدە جازاسىن وتەيدى;
- Astana Innovations كومپانياسى باسقارماسىنىڭ بۇرىنعى توراعاسى تالعات ءاشىم 7 جىلعا باس بوستاندىعىنان ايىرىلدى;
- ەنشىلەس كومپانيا وكىلى ۇلىقبەك اچيلوۆقا 8 جىل تۇرمە جازاسى بەرىلدى. قىلمىسكەر قاۋىپسىزدىگى ورتاشا مەكەمەدە جازاسىن وتەيدى. سونىمەن قاتار ول 642 مىڭ تەڭگە مەملەكەتكە تولەۋگە مىندەتتى بولدى;
- ەنشىلەس كومپانيا وكىلى تيمۋر قاساباەۆ 8 جىلعا باس بوستاندىعىنان ايىرىلدى. قاۋىپسىزدىگى ورتاشا مەكەمەدە جازاسىن وتەيدى. ول مەملەكەت قازىناسىنا 574 مىڭ تەڭگە تولەۋى ءتيىس;
- ەنشىلەس كومپانيا وكىلى دۋلات مۇسەنوۆ 7 جىلعا باس بوستاندىعىنان ايىرىلدى. ول مەملەكەتكە 649 مىڭ تەڭگە تولەۋگە مىندەتتەلدى;
- ەنشىلەس كومپانيا وكىلى داۋرەن ءابدىحاميتوۆ 8 جىلعا باس بوستاندىعىنان ايىرىلدى. ول مەملەكەتكە 15 ملن تەڭگە تولەۋى ءتيىس. سونداي-اق ول قاۋىپسىزدىگى ورتاشا مەكەمەدە جازاسىن وتەيدى.
سوت ۇكىمى كۇشىنە ەنگەن جوق، ەكى تاراپتىڭ اپەللياتسيالىق شاعىم تۇسىرۋگە مۇمكىندىگى بار.
"ادىرنا" ۇلتتىق پورتالى
