اقتوبە وبلىسىندا وزبەكستان ازاماتى 147 رەت جول-كولىك ەرەجەسىن بۇزعان دەپ حابارلايدى "ادىرنا" ۇلتتىق پورتالىنىڭ ءتىلشىسى.
وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ قىزمەتكەرلەرى "ميراج-ۋراگان" مودەرنيزاتسيالانعان جۇيەسىنىڭ كومەگىمەن وزبەكستان رەسپۋبليكاسى ازاماتىنىڭ جىل باسىنان بەرى 147 رەت ۆاز-21099 اۆتوكولىگىمەن جول ەرەجەسىن بۇزعانىن انىقتادى.
قالا جولدارىندا جۇرگىزۋشى جىلدامدىق رەجيمىنەن 146 رەت اسىپ، ءبىر رەت باعدارشامنىڭ تىيىم سالاتىن سيگنالىنا ءوتىپ كەتكەن. قازىرگى تاڭدا جۇرگىزۋشىگە جالپى مولشەرى 3 ملن 390 مىڭ تەڭگەنى قۇرايتىن ايىپپۇل سالىنعان.پوليتسيا ەندى ماتەريال جيناپ، شەشىم قابىلداۋ ءۇشىن ءىستى اكىمشىلىك سوتقا جىبەرەتىن بولادى. ايتا كەتۋ كەرەك، جىل باسىنان بەرى "ميراج-ۋراگان" مودەرنيزاتسيالانعان جۇيەسىنىڭ كومەگىمەن بۇرىن كولىك قۇرالدارىن باسقارۋ قۇقىعىنان ايىرىلعان 46 جۇرگىزۋشى مەن 113 مەملەكەتتىك بورىشكەر انىقتالىپ، 21 ملن تەڭگەدەن استام قاراجات وندىرىلگەن.
"ادىرنا" ۇلتتىق پورتالى.
