ء"بىز قانداي 167 اۆتوكولىك مودەلىن وندىرەمىز؟"

2325
Adyrna.kz Telegram
فوتو. اشىق دەرەككوزدەن
فوتو. اشىق دەرەككوزدەن

قر پرەمەر-مينيسترىنە!

قر يندۋستريا مينيسترلىگى ء"بىز قانداي 167 اۆتوكولىك مودەلىن وندىرەمىز؟" دەگەن سۇراعىما جاۋاپ بەردى. مينيسترلىكتىڭ جاۋابىن قاناعاتتانارلىقسىز دەپ ەسەپتەيمىن. 40 مودەلدى اتاپ شىعۋ، ونىڭ ىشىندە 20-سىن ءبىز وندىرمەيمىز، دايىن كۇيىندە الىپ كەلەمىز، ال 80 مودەلدى كامازداردىڭ تۇرلەرى، تاعى 39 مودەل اۆتوبۋستار دەۋ، جاي عانا وتىرىكتى اقتاۋعا تىرىسۋ ەمەس، ءىستىڭ ناقتى ءمان-جايىن ماقساتتى تۇردە جاسىرۋ دەپ ەسەپتەيمىن. بۇل ۇكىمەت باسشىسى رەتىندە ءسىزدىڭ مۇقيات تەكسەرۋ جانە باعالاۋ جۇرگىزۋىڭىزدى تالاپ ەتەتىن ماسەلە.
ءبىز “حالىق ۇنىنە قۇلاق اساتىن مەملەكەت” قۇرىپ جاتقانىمىزدى نازارعا الۋىڭىزدى وتىنەمىن. سوندىقتان مينيسترلىك دەرەكتەردى قايتا تەكسەرىپ، قاتەلىكتەر ءۇشىن كەشىرىم سۇراپ، تۇزەتۋلەر ەنگىزۋى كەرەك ەدى دەپ سانايمىن. مۇنىڭ ورنىنا ماعان قارسى اقپاراتتىق سوعىس جاريالادى، بلوكباستەرلەر ءتۇسىردى، بلوگەرلەر مەن تەلەگرام-كانالداردى ىزىمە سالدى، نۇر-مەديا مەن بوتتاردى دا وسى ىسكە ارالاستىردى. ماعان جاعىلعان كۇيە، جابىلعان جالا ءۇشىن وكىنبەيمىن. تەك وسىنىڭ بارىنە بيۋدجەتتىڭ قاراجاتى جۇمسالعانى وكىندىرەدى.
مينيسترلەرگە مەنىڭ كۇرەسىم بيلىكپەن ەمەس، ەل ەكونوميكاسىن وسى جاعدايعا جەتكىزگەن وتىرىكپەن، كوزبوياۋشىلىقپەن جانە كاسىبيسىزدىكپەن كۇرەس ەكەنىن ءتۇسىندىرۋىڭىزدى وتىنەمىن. ءبىز وزىمىزگە شىندىقتى ايتىپ ۇيرەنبەگەنىمىزشە، ناقتى جاعداياتتى تۇسىنبەيمىز، دەمەك دۇرىس شەشىم قابىلداپ، دامي دا المايمىز. ءدال وسى سەبەپتەن اقيقاتتى ىزدەپ سوڭىنا دەيىن بارامىن.
سونداي-اق مينيسترلىك سوڭعى 10 جىل ىشىندە 130 جاڭا ماشينا قۇراستىرۋ زاۋىتى قايدا سالىنعان دەگەن ساۋالدى دا جاۋاپسىز قالدىردى، قازاقستاندىق قامتۋ بويىنشا دا جاۋاپ بەرگەن جوق. ويتكەنى ءسىزدىڭ primeminister.kz سايتىڭىزدا اۆتوونەركاسىپتى وقشاۋلاۋدىڭ ورتاشا دەڭگەيى 33%-دى قۇرايدى، جەكە مودەلدەر بويىنشا 50%-دان اسادى دەپ كورسەتىلگەن.
ەگەر ينسدۋستريا مينيسترلىگى قاتەلىكتەرىن تۇزەتىپ، 15 كۇن ىشىندە جاۋاپ بەرمەسە، ۇلتتىق رەسۋرستاردى زاڭدى جانە ءتيىمدى باسقارۋدى تالداۋ، باعالاۋ جانە تەكسەرۋ مىندەتى جۇكتەلگەن قر ەسەپ كوميتەتىنە جۇگىنۋگە ءماجبۇرمىن. سونداي-اق باس پروكۋراتۋراعا دا جۇگىنەمىن، ويتكەنى ەسەپ كوميتەتىنىڭ ەرەجەسىنە سايكەس ونىڭ مىندەتىنە قر باس پروكۋراتۋراسىمەن بىرلەسىپ ەكونوميكالىق جانە قارجىلىق قىلمىستاردى تەرگەۋدى ازىرلەۋ كىرەدى. بالكىم، قوعامنىڭ تالاپ ەتە باستاعانى جاعىمسىز جايت شىعار.
ۇكىمەت اۆتوكولىك سالاسىن ىنتالاندىرۋ بويىنشا تەڭدەسسىز شارالاردى قابىلداعانىن تۇسىندىرەمىن. بۇل ققس، كادەگە جاراتۋ الىمى، جەڭىلدەتىلگەن نەسيە جانە ليزينگ باعدارلامالارى، ءونىم ەكسپورتىن قولداۋ شارالارى. مۇنىڭ ءبارى وتاندىق ونەركاسىپتى قولداۋ ءۇشىن جاسالدى، دەگەنمەن شىن مانىندە بيۋدجەتتەن ۇلكەن مافيانىڭ قالتاسىنا سالىنعان ءجۇز ميللياردتاعان تەڭگەنىڭ ەسەپتەلمەۋىنە الىپ كەلدى. حالىق ارمەنيادان جانە باسقا دا ەلدەردەن اۆتوكولىكتەر تاسىمالداۋدى جالعاستىرا بەردى. بۇل ءبىز 167 اۆتوكولىك مودەلىن شىعارامىز دەپ ماقتانعانىمىزبەن، شىن مانىندە كاپيتالدى سىرتقا شىعارۋ. ەگەر يندۋستريا مينيسترلىگى ءبىزدىڭ از ءونىم وندىرەتىنىمىزدى مويىنداسا، وندا نەگە جانە كىم ءۇشىن كوپ ميللياردتىق پرەفەرەنتسيالار جاسالعانى تۋرالى ساۋال تۋىندايتىنىن تۇسىنەمىن.
ءسوز سوڭىندا ايتارىم، ءوزىم بارىپ قازاقستاندىق قامتۋدى ساناپ شىعۋ ءۇشىن 130 زاۋىتتىڭ مەكەنجايى بويىنشا اقپارات بەرۋدى سوت ارقىلى تالاپ ەتەمىن. ازىرگە ۇكىمەتتىڭ بارلىعىن تەكسەرۋگە، تۇزەتۋگە جانە قوعامعا اقپاراتتى جەتكىزۋگە مۇمكىندىگى بار.
اسقار ۇزاقبايۇلى، سىزدەن «حالىق ۇنىنە قۇلاق اساتىن مەملەكەتتى» قامتاماسىز ەتۋىڭىزدى وتىنەمىن. مەن ءسىزدىڭ قىزمەتتەن كەتۋىڭىزدى سۇرامايمىن. ءسىزدى نەمەسە ءسىزدىڭ مينيسترلەرىڭىزدى اۋىستىرعاننان ەشتەڭە وزگەرمەيدى. ويتكەنى ءدال سونداي ادامدار ورىندارىڭىزعا كەلەدى. ءبىز قۇندىلىقتاردى وزگەرتۋگە ءتيىسپىز. وتىرىكپەن، كوزبوياۋشىلىقپەن جانە كاسىبيسىزدىكپەن كۇرەستى بىرگە جاريالايىق. سوندا اينالاداعى نارسەنىڭ بارلىعى وزگەرە باستاعانىن كورەسىز.

سانجار بوقاەۆ.

"ادىرنا" ۇلتتىق پورتالى.

پىكىرلەر