قاراعاندى وبلىسىنىڭ سالىق ينسپەكتسياسى مەن قازاقستان رەسپۋبليكاسىنىڭ ەنەرگەتيكا جانە كوممۋنالدى شارۋاشىلىق باسقارماسىنا اشىق حات!
"ۇلىتاۋعا باردىڭ با، ۇلار ەتىڭ جەدىڭ بە؟!" دەگەن ەل اۋزىنداعى ءسوزدى ەستىمەگەن جان جوق شىعار. سول تابيعاتى كوركەم، قازبا-بايلىقتاردىڭ كوزىنە اينالعان، اۋاسى ساف، سۋى ءمولدىر، كيەلى ۇلىتاۋ حالقىنىڭ تۇرعىندارىنىڭ باسىم كوپشىلىگى بۇگىندە جارىق پەن سۋعا زار بولىپ وتىر. ۇلىتاۋ تۇرعىندارىنىڭ ايتۋىنشا، جارىق پەن سۋدى ۇلىتاۋ اۋدانىنىڭ كوممۋنالدى شارۋاشىلىق ءبولىمى جىلدا سەبەپسىزدەن سەبەپسىز ءسوندىرىپ تاستايتىن كورىنەدى. ودان كەيىن ەگىستىك سۋارۋ بىلاي تۇرسىن، ءبىر جۇتىم سۋ تاپپاي سەڭدەلەدى ەكەن. كوممۋنالدى شارۋاشىلىق ءبولىمىنىڭ بۋحگالتەرى ءدانيزا نۇرجيگيتوۆا بۇل جاعدايدى ۇلىتاۋ اۋدانىنىڭ مەملەكەتكە 271 ميلليون بەرەشەگى بار ەكەندىگىمەن بايلانىستىرادى. ال «شاعىن عانا اۋدان قالايشا سونشا سوماعا قارىزعا باتتى؟» دەگەن سۇراققا اۋدان باسشىلىقتارى ماردىمدى جاۋاپ بەرە الماۋدا.
تۇرعىندار جىل سايىن اكىمشىلىككە سۋ مەن جارىق ماسەلەسىن رەتتەۋ ءۇشىن بولىنەتىن قارجىنىڭ قايدا جۇمسالىپ جاتقانىڭ تۇسىنبەي دال بولۋدا. ولار كوممۋنالدى شارۋاشىلىق ءبولىمىنىڭ قىزمەتكەرلەرى بۇل جاعدايعا كىنالى ەمەس ەكەندىگىن تىلگە تيەك ەتىپ، «مەكەمە قىزمەتكەرلەرى جالاقى الماي جۇرگەنىنە بىرنەشە ايدىڭ ءجۇزى بولدى»، - دەيدى.
قوردالانعان ماسەلە ۇلىتاۋ اۋدانىنا ءار اكىم قارالار كەلگەن سايىن قاۋزالاتىن كورىنەدى. الايدا ەش وزگەرىس بولماعان سوڭ تۇرعىندار دا ءۇمىتىن ۇزگەن. «وسى جولى جاڭادان تاعايىندالعان اكىم سوۆەتبەك مەدەباەۆ تا سۋ مەن جارىقتى جوندەۋ ماسەلەسىندە قيمىلدايىن دەمەيدى»، - دەيدى تۇرعىندار.
ال «كوممۋنالدى شارۋاشىلىققا جاۋاپتى باسشى حامزات ابۋداللاەۆيچ سۋ مەن جارىق قاشان قوسىلادى» دەگەن تۇرعىنداردىڭ كۇن سايىن قويعان ساۋالىنا نەمقۇرايلىلىق تانىتىپ، تولاسسىز حاتتارعا جاۋاپ بەرمەي، ءتىپتى تۇتقا دا كوتەرمەيتىن كورىنەدى. ءتىپتى WhatsApp الەۋمەتتىك جەلىسىندە «كومحوز جارناماسى» دەگەن اتپەن ارنايى اشىلعان توپتىڭ بۇگىندە 255 مۇشەسى بار ەكەن. بارلىعىنىڭ دەرلىك كۇندىز-ءتۇنى جازىپ جاتقان ماسەلەسى قۇدايدىڭ قارا سۋى مەن ءبىر سىعىرايعان جارىعى قانا (توپتاعى تولاسسىز حاتتار لەگى تومەندە كورسەتىلگەن).
الايدا «ايتا-ايتا التايدى، جامال اپام قارتايدى» دەگەندەي ۇلىتاۋ اۋدانىنىڭ اكىمدىگى دە، كوممۋنالدى شارۋاشىلىق ءبولىمىنىڭ باسشىلىعى دا تۇرعىندار ءۇشىن تىرناقتاي ارەكەت جاساماۋدا. قىسقاسىن ايتقاندا، اتى دارداي ۇلىتاۋدىڭ زاتى دارداي بولماي تۇر. اتالعان ماسەلەنى قاراعاندى وبلىسىنىڭ سالىق ينسپەكتسياسى، قاراعاندى وبلىسىنىڭ تۇرعىن-ءۇي كوممۋنالدى شارۋاشىلىق باسشىلىقتارى، قازاقستان رەسپۋبليكاسىنىڭ ەنەرگەتيكا جانە كوممۋنالدى شارۋاشىلىق باسقارماسى، قر-نىڭ قارجى مينيسترلىگىنىڭ سالىق كوميتەتى، قر-نىڭ سىبايلاس جەمقورلىقپەن كۇرەس ءىس-قيمىل اگەنتتىگى نازارعا الىپ، ءبىر شەشىمىن تاۋىپ بەرۋىن ءوتىنىپ سۇرايمىز.
"ۇلىتاۋ" اۋدانىنىڭ تۇرعىندارى،
"ادىرنا" ۇلتتىق پورتالى
