ريددەردە ەر ادام 89 جاستاعى اناسىن ەسكەرتۋ جاساعانى ءۇشىن ولگەنشە ۇرىپ-سوقتى، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
شىعىس قازاقستان وبلىسى ريددەر قالالىق سوتى 62 جاستاعى ەر ادامعا قاتىستى قىلمىستىق ءىستى قارادى، ول ماس كۇيدە قارت اناسىن قاتتى ۇرعانى سونشا، ايەل قايتىس بولعان.
«سوتتا ەر ادامنىڭ 2020 جىلعى 30 قاراشادا ساعات شامامەن 19.00-دە ماس كۇيدە جانجال كەزىندە اناسىنىڭ بەت تۇسىنا بىرنەشە سوققى جاساعانى انىقتالدى»، - دەدى شىعىس قازاقستان وبلىستىق سوتىنىڭ ءباسپاسوز قىزمەتىندەگىلەر.
ايەل اۋرۋحاناعا كەلەسى كۇنى عانا بارعان. دارىگەرلەر وعان مي شايقالۋى، قان كەتۋ، وكپەنىڭ جارىلۋى جانە سۇيەگى سىندى دەگەن دياگنوز قويدى. ءۇش كۇننەن كەيىن ايەل قايتىس بولدى.
«سوتتا ايىپتالۋشى كىناسىن تولىق مويىنداپ، وكىنەتىنىن ايتتى. وعان قر قك-نىڭ 106-بابى 3-بولىگى بويىنشا («ابايسىزدا ادام ولىمىنە اكەپ سوققان دەنساۋلىققا قاساقانا اۋىر زيان كەلتىرۋ») ايىپ تاعىلدى. سوتتالۋشىنىڭ جاسىن، كىناسىن مويىنداعانىن، بۇرىن سوتتالماعانىن، تاراپتار كەلىسىمگە كەلگەنىن ەسكەرە وتىرىپ التى جىلعا باس بوستاندىعىنان ايىرۋ جازاسى تاعايىندالدى»، - دەپ ءتۇسىندىردى سوت.
ايتا كەتەيىك، قر قك 106-بابى 3-بولىگىنىڭ سانكتسياسى سەگىز جىلدان ون ەكى جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيدى.
«قىلمىستىق ءىس سوتقا پروكۋرور، سوتتالۋشى، جابىرلەنۋشى اراسىندا جاسالعان كىنانى مويىنداۋ تۋرالى مامىلە نىسانىنداعى پروتسەستىك كەلىسىممەن ءتۇستى. جابىرلەنۋشى رەتىندە قازا تاپقان ايەلدىڭ نەمەرەسى جاۋاپ بەردى. ءىس جۇرگىزۋ كەلىسىمىنىڭ بارلىق شارتى ورىندالعان ىستەر بويىنشا جازا تاعايىنداۋ كەزىندە سوت ءۇشىن شەكتەۋلەر بار. ولار: جازا وسى باپتا كورسەتىلگەن ەڭ جوعارى مەرزىمنەن نەمەسە 1\2 مولشەردەن اسپايدى، بۇل جاعدايدا - التى جىلدان»، - دەدى شىعىس قازاقستان وبلىستىق سوتىنىڭ ءباسپاسوز قىزمەتى وكىلى.
تاراپتار سوت اكتىسىمەن كەلىستى.
"ادىرنا" ۇلتتىق پورتالى
