ءبىلىم جانە عىلىم ءمينيسترى اسحات ايماعامبەتوۆ بارلىق ىرىكتەۋ ءىس-شارانىڭ فورماتىن اشىقتىق پەن ادىلدىكتى قامتاماسىز ەتۋ ءۇشىن وزگەرتىپ جاتقاندارىن ايتتى. بۇل تۋرالى مينيستر facebook-تەگى پاراقشاسىندا جازدى.
جاقىندا ۇبت-نى ەلەكتروندىق فورماتقا كوشىرۋ تۋرالى پوست جاريالادىم. بۇل وزگەرىستەردى قوعام جاقسى قابىلداپ، قولداۋ ءبىلدىردى. بىراق، ءبىز تەك وسى ەمتيحاندى عانا ەمەس، بارلىق ىرىكتەۋ ءىس-شارالارىنىڭ فورماتىن اشىقتىق پەن ادىلدىكتى قامتاماسىز ەتۋ ءۇشىن وزگەرتۋدەمىز، - دەپ جازدى اسحات ايماعامبەتوۆ.
مينيستر وسى باستامالارعا قىسقاشا توقتالىپ ءوتتى.
بىرىنشىدەن, وقۋشىلاردىڭ پاندىك وليمپياداسى. ءبىز بيىل اقپان ايىندا العاش رەت وقۋشىلار اراسىندا رەسپۋبليكالىق وليمپيادانى ەلەكتروندىق فورماتتا وتكىزدىك. ءار قاتىسۋشىعا جەكە كومپيۋتەر بەرىلدى، ءار وقۋشىنىڭ ءىس-ارەكەتىن بەينەكامەرا باقىلاپ وتىردى. سونىمەن قاتار ارنايى ورتالىقتا كەزەكشىلەر بارلىق پروتسەستى قاداعالاي الىپ، پروكتورينگ جۇيەسى دە قولدانىلدى. الەۋمەتتىك جەلىلەردە جانە ارنايى پورتالدا اشىق ترانسلياتسيا جۇرگىزىلدى. بۇعان قوسا، ءبىز بيىل وليمپيادا تاپسىرمالارىن تەكسەرۋ جۇيەسىن دە وزگەرتتىك. بۇرىن قازىلار القاسى مۇشەلەرىنە بالالاردىڭ جۇمىستارى پروپورتسيونالدى تۇردە بەرىلسە، ەندى باعالاۋ كەزىندە سۋبەكتيۆيزمدى تومەندەتۋ ءۇشىن قازىلار القاسىنىڭ ءار مۇشەسى ءبىر عانا تاپسىرمانى كورىپ، باعالاي الدى.
كەلەسى جىلدارى دا وليپيادانىڭ وبلىستىق جانە رەسپۋبليكالىق كەزەندەرى تەك عانا وسىنداي فورماتتا وتەتىن بولادى.
ەكىنشىدەن, دوكتورانتۋراعا قابىلداۋ. بيىل دوكتورانتۋراعا ءتۇسۋ ەمتيحاندارى دا ۇبت-عا قويىلعان تالاپتار نەگىزىندە جانە ۇلتتىق بىرىڭعاي تەستىلەۋ جۇرگىزىلگەن پۋنكتتەردە وتەدى.
بۇل بىزگە «رەكتورلار ءتىزىمى» دەگەن الىپ-قاشپا ءسوزدى جانە وسىنداي تاۋەكەلدەردى ۇمىتىپ، دوكتورانتۋراعا ەڭ مىقتى جانە لايىقتى ۇمىتكەرلەردىڭ وقۋعا تۇسۋىنە ءتيىستى جاعداي جاساۋعا مۇمكىندىك بەرەدى دەپ ويلايمىن.
ەسسەنى دە، باسقا دا تاپسىرمالاردى دا وسى كومپيۋتەرلەرمەن بەينەكامەرالاردىڭ الدىندا وتىرىپ جازاتىن بولادى.
ۇشىنشىدەن, ماگيستراتۋراعا ءتۇسۋ. وتكەن جىلى ءبىز ماگيستراتۋراعا تۇسۋشىلەردىڭ ەمتيحاندارىن پيلوتتىق رەجيمدە ەلەكتروندىق فورماتتا قابىلدادىق. وقۋعا تۇسكەن ازاماتتار ەمتيحاننىڭ راسىندا ءادىل تۇردە وتكەنىن ايتىپ جاتىر. بيىل بۇل جۇمىس جالعاسىن تابادى. بۇدان بىلاي ماگيستراتۋرانىڭ ەمتيحاندارى وسى فورماتتا وتەدى.
مينيستر بولىپ تاعايىندالعاننان كەيىن بىردەن پەداگوگتەرگە ارنالعان ۇلتتىق بىلىكتىلىك تەستىلەۋدى قاعاز فورماتىنان ەلەكتروندىق فورماتقا كوشىرگەنىمىز ەستەرىڭىزدە بولار. وسىعان بايلانىستى تەستىلەۋدى جاقسى تاپسىرعان ادامداردىڭ سانى بىردەن بىرنەشە ەسە قىسقارعانىنا قاراماستان، بۇل جۇيە سىبايلاس جەمقورلىق پەن كوشىرىپ الۋ تاۋەكەلدەرىن ازايتۋعا مۇمكىندىك بەردى، - دەپ جازدى ول.
مينيستر ادىلدىك، اشىقتىق، اكادەميالىق ادالدىق جۇمىستاعى نەگىزگى قاعيداتتار ەكەىە ايتتى.
بۇل باعىتتاعى جۇمىستىڭ ءالى دە جەتىلدىرىلەتىن تۇستارى بار ەكەنىن بىلەمىز. وسىلايشا، وليمپيادالاردى، ۇبت-نى ۇيىمداستىرۋدان باستاپ ماگيستراتۋرا مەن دوكتورانتۋراعا تۇسكەنگە دەيىنگى بارلىق پروتسەستى ەلەكتروندىق فورماتقا كوشىردىك. وسىنداي جاڭاشىلدىقتار ارقىلى ادىلدىك پەن اشىقتىققا باعىتتالعان باستامالارىمىزدى جۇزەگە اسىرىپ جاتىرمىز. اشىقتىقتى جانە ناقتى باسەكەلەستىكتى قامتاماسىز ەتە وتىرىپ، ءبىلىم بەرۋ جۇيەسىنە دەگەن سەنىمدى دە ارتتىرامىز. ادىلدىك، اشىقتىق، اكادەميالىق ادالدىق - بۇل ءبىزدىڭ جۇمىسىمىزداعى نەگىزگى قاعيداتتار، - دەدى ول.
