بەلگىلى ايتىسكەر اقىن جانداربەك بۇلعاقوۆ ەلدەگى الەۋمەتتىك جاعداي تۋرالى ايتتى، دەپ حابارلايدى «ادىرنا» ۇلتتىق پورتالى.
«مەملەكەتتە تۇرعىندارىنا قاراپ باعا بەرىلەدى. مەملەكەتى وزىپ، ادامى قالىپ كەتكەن مەملەكەت جوق. ادامى بايىپ، مەملەكەتى كەدەيلەندى دەگەن دە جوق. ءۇيدىڭ جيھازىنا قاراپ، يەسىنىڭ تۇرمىستىق جاعدايىن بايقايسىز. ءبىزدىڭ ەلدە شالقىعان باي دا، قارا ناندى كوز جاسىنا شىلاپ جەپ وتىرعان كەدەي دە بار. ءبىزدىڭ ەلدە ورتا تاپ جوق. ءبىزدىڭ ەل باي مەن كەدەيدەن قۇرالعان. ەلىمىز اۆتوبۋسقا جول بيلەتىنە اقشا ازەر تاپقان ادامدار مەن لەكسۋس 570 مىنگەن ادامداردان قۇرالعان. وسى ەكى ارالىقتا عانا ءومىر ءسۇرىپ وتىرمىز. مەملەكەت قۋاتتى بولۋ ءۇشىن ورتاڭعى تاپ كوپ بولۋ كەرەك. مەملەكەتىمىزدە ءبارى كەرەمەت، ءبارى دامىپ كەتتى دەگەن تازا وتىرىك. ءبارى جامان دەگەن دە وتىرىك. قۇداي ەكى كوز بەرگەن سوڭ، جەتىستىكتى دە، كەمشىلىكتى دە قاتار كورۋ كەرەك. ەلىمىزدە حالىققا قىزمەت كورسەتۋ ورتالىعىندا جەتىستىكتەر بار. بىراق، بىت-شىت بولىپ قۇلدىراپ جاتقان سالالار، يدەولوگيا، رۋحانيات بار. حالىقتىڭ تۇرمىسى ناشار»، - دەدى ول نۇرماحان مۇقانۇلىنا بەرگەن سۇحباتىندا.
"ادىرنا" ۇلتتىق پورتالى
