اتىراۋ اۋەجايىندا پوشتا بەكەتى اشىلدى

1373
Adyrna.kz Telegram

قازىرگىدەي پاندەميا جاعدايىندا جۇمىسىن جۇيەلى جولعا قويعان قۇرىلىمداردىڭ قاتارىندا «سامۇرىق-قازىنا» ۇلتتىق ءال-اۋقات قورىنا قاراستى «قازپوشتا» اكتسيونەرلىك قوعامىن ايتۋعا بولادى. كاسىپورىن جىلدان جىلعا حالىققا قىزمەت كورسەتۋ اياسىن كەڭەيتىپ، جەلىسىن جەتىلدىرىپ كەلەدى.

سونىڭ ايقىن ءبىر كۋاسى  ايتۋلى مەرەكە – قازاقستان حالقىنىڭ بىرلىگى كۇنى قارساڭىندا حيۋاز دوسپانوۆا اتىنداعى اتىراۋ حالىقارالىق اۋەجايىندا «قازپوشتا» اق جاڭا پوشتا بايلانىسى بەكەتىنىڭ اشىلۋى.

مۇندا الەمنىڭ كەز كەلگەن نۇكتەسىنە سالەمدەمەلەردى جانە حاتتاردى EMS ارقىلى جەدەل جەتكىزۋگە جانە ءتۇرلى مازمۇنداعى تولەمدەردى جاساۋعا بولادى. الداعى ۋاقىتتا ۆاليۋتالىق وپەراتسيالاردى جۇرگىزۋ مۇمكىندىگى قاراستىرىلادى.

ايتا كەتۋ كەرەك، اتىراۋ اۋەجايىنداعى جاڭا بەكەت اۋە رەيستەرىنىڭ كەستەسىنە قاراي دەمالىسسىز جۇمىس ىستەيدى.  

«وزدەرىڭىزگە ءمالىم، بۇگىندە اتىراۋ حالىقارالىق اۋەجايىندا ترانزيتتىك جولاۋشىلار اعىنى ۇلعايعان. سول سەبەپتى دە، ەگەر جولاۋشىلارعا جانە اۋەجايعا كەلۋشىلەرگە جەدەل تۇردە سالەمدەمەنى نەمەسە حاتتى جەتكىزۋ قاجەتتىگى تۋىنداي قالسا، بۇدان بىلاي ولارعا كۋرەرلىك قىزمەتتى پايدالانۋ ءۇشىن قايتادان قالاعا ورالىپ، ۋاقىت وتكىزۋدىڭ ەش قاجەتتىلىگى جوق. ويتكەنى، ول ازاماتتار ەندى اۋەجايداعى پوشتا بەكەتىنەن EMS حابارلامانى نەمەسە سالەمدەمەنى جەتكىزۋگە  تاپسىرىس بەرە الادى. سونىمەن بىرگە وسىندا تولەمنىڭ كەز كەلگەن ءتۇرى قابىلدانادى. اسىرەسە، شۇعىل تولەم جاساۋ قاجەتسىنگەن جاعدايدا، بۇل قىزمەت ءتۇرى ادامدار ءۇشىن وتە ىڭعايلى بولىپ تابىلادى»، – دەيدى «قازپوشتا» اق اتىراۋ وبلىستىق فيليالىنىڭ ديرەكتورى التىن سادىقوۆا.

بۇگىنگى تاڭدا اتىراۋ وبلىسىندا 100-گە تارتا پوشتا بايلانىسى بولىمشەسى جەرگىلىكتى تۇرعىندارعا قىزمەت كورسەتەدى. ونىڭ 15-ءى قالادا، التاۋى اۋداندا جانە 60 بولىمشە اۋىلدىق جەردە ورنالاسقان. مۇنىڭ سىرتىندا، 3 پوشتا بايلانىسى جانە 8 تولەم قابىلداۋ بەكەتى بار.

پىكىرلەر