Qazırgıdei pandemiia jaǧdaiynda jūmysyn jüielı jolǧa qoiǧan qūrylymdardyŋ qatarynda «Samūryq-Qazyna» ūlttyq äl-auqat qoryna qarasty «Qazpoşta» aksionerlık qoǧamyn aituǧa bolady. Käsıporyn jyldan jylǧa halyqqa qyzmet körsetu aiasyn keŋeitıp, jelısın jetıldırıp keledı.
Sonyŋ aiqyn bır kuäsı aituly mereke – Qazaqstan halqynyŋ bırlıgı künı qarsaŋynda Hiuaz Dospanova atyndaǧy Atyrau halyqaralyq äuejaiynda «Qazpoşta» AQ jaŋa poşta bailanysy beketınıŋ aşyluy.
Mūnda älemnıŋ kez kelgen nüktesıne sälemdemelerdı jäne hattardy EMS arqyly jedel jetkızuge jäne türlı mazmūndaǧy tölemderdı jasauǧa bolady. Aldaǧy uaqytta valiutalyq operasiialardy jürgızu mümkındıgı qarastyrylady.
Aita ketu kerek, Atyrau äuejaiyndaǧy jaŋa beket äue reisterınıŋ kestesıne qarai demalyssyz jūmys ısteidı.
«Özderıŋızge mälım, bügınde Atyrau halyqaralyq äuejaiynda tranzittık jolauşylar aǧyny ūlǧaiǧan. Sol sebeptı de, eger jolauşylarǧa jäne äuejaiǧa keluşılerge jedel türde sälemdemenı nemese hatty jetkızu qajettıgı tuyndai qalsa, būdan bylai olarǧa kurerlık qyzmettı paidalanu üşın qaitadan qalaǧa oralyp, uaqyt ötkızudıŋ eş qajettılıgı joq. Öitkenı, ol azamattar endı äuejaidaǧy poşta beketınen EMS habarlamany nemese sälemdemenı jetkızuge tapsyrys bere alady. Sonymen bırge osynda tölemnıŋ kez kelgen türı qabyldanady. Äsırese, şūǧyl tölem jasau qajetsıngen jaǧdaida, būl qyzmet türı adamdar üşın öte yŋǧaily bolyp tabylady», – deidı «Qazpoşta» AQ Atyrau oblystyq filialynyŋ direktory Altyn Sadyqova.Bügıngı taŋda Atyrau oblysynda 100-ge tarta poşta bailanysy bölımşesı jergılıktı tūrǧyndarǧa qyzmet körsetedı. Onyŋ 15-ı qalada, altauy audanda jäne 60 bölımşe auyldyq jerde ornalasqan. Mūnyŋ syrtynda, 3 poşta bailanysy jäne 8 tölem qabyldau beketı bar.
