تۇرىكمەنستاننىڭ سەرحەتاباد (بۇرىنعى كۋشكا) قالاسىندا قۇرعاقشىلىقتىڭ سالدارىنان مال باسى ازايىپ كەلەدى. اۋىل تۇرعىندارى سوڭعى تۇلىگىن سويۋعا ءماجبۇر، دەپ حابارلايدى «ادىرنا» ءتىلشىسى turkmen.news-كە سىلتەمە جاساپ.
«ءشوپ جوق. جەم ساتىپ الۋعا اقشامىز جەتپەيدى. فەرمادا بىرنەشە سيىر مەن وتار قوي بولسا، ءتىپتى قيىن. بارلىعىن بىردەي ازىقتاندىرا المايسىڭ. سول سەبەپتى دە ءتورت تۇلىكتى سويۋعا تۋرا كەلەدى. الايدا ەلدە ەت باعاسى تومەندەمەيدى»،– دەيدى جەرگىلىكتى تۇرعىندار.
قالا تۇرعىندارى جاڭبىر جاۋىن تىلەپ، نيەت قىلىپ وتىر. الايدا، جەرگىلىكتى «مەتەوجۋرنال» باسىلىمىنىڭ مالىمەتىنشە، مامىر ايىنىڭ باسىندا بولعان قىسقا مەرزىمدى جاڭبىردان كەيىن تۇركىمەنستاندا قايتادان قۇرعاق اۋا رايى جالعاسادى.
حالىق كليماتتىڭ وزگەرۋىنە بيلىكتى كىنالايدى.
«بۇرىنعى كەزدە تۇرىكمەنستاندا دامىعان ارىق جۇيەسى تەكتەن-تەك قۇرىلمادى عوي. اۋماقتا اعاشتاردىڭ بەلگىلى ءبىر تۇرلەرى وتىرعىزىلدى. سوندىقتان، جاز قانشالىقتى ىستىق جانە قۇرعاق بولسا دا، سۋ جەتكىلىكتى ەدى. ارىقتاردى كۇزەتىپ، باقىلاپ، ۇنەمى تازالاپ وتىراتىن. ال قازىر شە؟ اعاشتار كەسىلدى، ارىقتار قۇرعاق تۇر»،— دەدى جەرگىلىكتى تۇرعىن.
«ادىرنا» ۇلتتىق پورتالى
