Túrikmenstannyń Serhetabad (burynǵy Kýshka) qalasynda qurǵaqshylyqtyń saldarynan mal basy azaıyp keledi. Aýyl turǵyndary sońǵy túligin soıýǵa májbúr, dep habarlaıdy «Adyrna» tilshisi turkmen.news-ke silteme jasap.
«Shóp joq. Jem satyp alýǵa aqshamyz jetpeıdi. Fermada birneshe sıyr men otar qoı bolsa, tipti qıyn. Barlyǵyn birdeı azyqtandyra almaısyń. Sol sebepti de tórt túlikti soıýǵa týra keledi. Alaıda elde et baǵasy tómendemeıdi»,– deıdi jergilikti turǵyndar.
Qala turǵyndary jańbyr jaýýyn tilep, nıet qylyp otyr. Alaıda, jergilikti «Meteojýrnal» basylymynyń málimetinshe, mamyr aıynyń basynda bolǵan qysqa merzimdi jańbyrdan keıin Túrkimenstanda qaıtadan qurǵaq aýa raıy jalǵasady.
Halyq klımattyń ózgerýine bılikti kinálaıdy.
«Burynǵy kezde Túrikmenstanda damyǵan aryq júıesi tekten-tek qurylmady ǵoı. Aýmaqta aǵashtardyń belgili bir túrleri otyrǵyzyldy. Sondyqtan, jaz qanshalyqty ystyq jáne qurǵaq bolsa da, sý jetkilikti edi. Aryqtardy kúzetip, baqylap, únemi tazalap otyratyn. Al qazir she? Aǵashtar kesildi, aryqtar qurǵaq tur»,— dedi jergilikti turǵyn.
«Adyrna» ulttyq portaly
