پاۆلودار وبلىسىنىڭ قاج مەكەمەسىندە سوتتالعانداردىڭ ءبىرى پەدوفيليا ءۇشىن باس بوستاندىعىنان ايىرىلعان قىلمىسكەردى ولتىرگەن، دەپ حابارلايدى «ادىرنا» ءتىلشىسى. بۇل تۋرالى وبلىستىڭ قىلمىستىق-اتقارۋ جۇيەسى دەپارتامەنتى مالىمدەدى.
«8 مامىردا پاۆلودار وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ اپ-162/4 قاۋىپسىزدىگى بارىنشا جوعارى مەكەمەسىندە كىسى ولتىرگەنى ءۇشىن جازاسىن وتەپ جاتقان 44 جاستاعى سوتتالعان جانجال ناتيجەسىندە باسقا قاماۋداعى ادامعا قاساقانا دەنە جاراقاتىن سالعان. وقيعا مەكەمەنىڭ سانيتارلىق تورابىنىڭ عيماراتىندا كەشكى ۋاقىتتا بولعان. زارداپ شەگۋشى مەديتسينالىق كومەككە جانە مەكەمە اكىمشىلىگىنە شاعىمەن جانە وتىنىشتەرمەن جۇگىنبەگەن. العان جاراقاتتارىنىڭ ناتيجەسىندە سوتتالعان ادام 9 مامىردا جاساقتاعى ءوز جاتىن ورنىندا قايتىس بولدى»،– دەلىنگەن حابارلامادا.
شۇعىل شاقىرىلعان جەدەل جاردەم بريگاداسى قر قىلمىستىق كودەكسىنىڭ 120-بابى 3-1-بولىگى، 1-تارماعى (زورلاۋ) بويىنشا جازاسىن وتەگەن ادامنىڭ قايتىس بولعانىن انىقتادى.
ايتا كەتەيىك، ءمان-جايدى انىقتاۋ ماقساتىندا وقيعا ورنىنا تەرگەۋ-جەدەل توبى، پروكۋراتۋرا، وزىندىك قاۋىپسىزدىك قىزمەتى جانە قاج دەپارتامەنتىنىڭ وكىلدەرى كەلدى. سونداي-اق، ۇلتتىق الدىن الۋ تەتىگىنىڭ جانە قوعامدىق باقىلاۋ كوميسسياسىنىڭ قاتىسۋشىلارى شاقىرىلعان.
«ادىرنا» ۇلتتىق پورتالى
