الەۋمەتتىك جەلىدە بەتى مەن اياق-قولىندا كوپتەگەن جاراقاتى بار وزبەكستاندىق اجەيدىڭ ۆيدەوسى تاراپ كەتتى. بۇل جايتقا قاتىستى تاشكەنت قالالىق ىشكى ىستەر دەپارتامەنتى پىكىر ءبىلدىردى، دەپ حابارلايدى centralasia.media.
پوليتسيا مالىمەتىنە سۇيەنسەك، سوققىعا جىعىلعان اجەي تۋرالى اقپارات مەديتسينالىق مەكەمەدەن تۇسكەن. اۋرۋحاناعا 26 ءساۋىر كۇنى 1934 جىلى تۋعان توزا گ. ەسىمدى زارداپ شەگۋشىنى 1983 جىلى تۋعان نەمەرەسى جەتكىزگەن ەكەن.
اجەيدىڭ سوزىنشە، ول 1964 جىلى تۋعان قىزى مەن 1989 جىلى تۋعان نەمەرەسىنەن ۇنەمى قورلىق كورىپ كەلگەن. اتالعان فاكتى بويىنشا ميرزو-ۇلىقبەك اۋدانىنىڭ ءىىب تەرگەۋ ءبولىمى وزبەكستان رەسپۋبليكاسى قىلمىستىق كودەكسىنىڭ 110-بابىنىڭ 2-بولىگى “ۆ” تارماعى بويىنشا قىلمىستىق ءىس قوزعاعان. سوت-مەديتسينالىق ساراپتاماسى تاعايىندالدى. تەرگەۋ جۇمىستارىنىڭ اياسىندا زارداپ شەگۋشى اتاعان تۇلعالاردىڭ قىلمىسقا قاتىسى بار-جوعى، وقيعانىڭ ءمان-جايى انىقتالماق.
