ءبىزدىڭ انشىلەردىڭ لوگيكاسىنا ءۇڭىلىپ قاراساڭىز تاڭ قالاسىز. بۇلاردا ەشقانداي دا لوگيكا جوق. ىزدەنبەيدى. وقىمايدى. ارينە، بارلىعى ەمەس. بۇلار ءان ايتىپ، قوعامنىڭ الدىندا جىلتىراپ جۇرگەنى بولماسا، كوپشىلىگىنىڭ ءبىزدىڭ قازاققا بەرەر قۇندىلىعى قالماعان.
ىزدەنبەگەن، وقىماعان، تەر توكپەگەن ادامداردا قايداعى قۇندىلىق بولسىن... سوندىقتان دا انشىلەر وسى ۋاقىتقا دەيىن قوعامدى توبىر ساناعا اينالدىرىپ، رۋحاني رەگرەسسكە تۇسىرۋدە وتە ۇلكەن ءرول اتقاردى. تەر توكپەگەن، سالماعى اۋىر تارتپايتىن، قۇندىلىقسىز جىلتىراق دۇنيە ءبىزدىڭ قوعامدى ارباپ، الداپ، ايتەۋىر رەگرەسستىڭ سان ءتۇرىن جاسادى. 30 جىل بويى كورگەنىمىز، ۇلگى تۇتقانىمىز لوگيكاسى جوق، قۇندىلىعى توقىراعان انشىلەر بولعانان كەيىن، ارينە ءبىزدىڭ قوعام ارتتا قالماعاندا قايدا بارادى.
بۇلار جەڭىل جولمەن لوتورەيا ويناتتى، 10 مىڭ دوللارلاپ گونورارمەن تويلاردى قايناتتى، جىلتىراپ ءجۇرىپ تالاي تالاي توبىرلاردى جايناتتى. وسىلاردىڭ جىلتىراعىنا قىزىعىپ تالاي قازاق كرەديتكە بايلاندى. وسى جەڭىس پە؟ ەردى عوي تالاي قازاق وسىلارعا.
ءبىزدىڭ قوعامنىڭ جاستارىنىڭ ۇزاق ۋاقىت بويى انشىلەردىڭ جىلتىراعى مەن سالماعى جوق جەڭىل دۇنيەلەرىنە الدانىپ كەلگەنى وكىنىشتى. ونىڭ ورنىنا عىلىم مەن تەحنولوگياعا، ۇلتتىق يدەولوگياعا مەملەكەتتىك دەڭگەيدە كوڭىل بولگەنىمىزدە، ءبىز قازىرگى كۇنى الدىمىزدا تۇرعان قانشاما تىعىرىقتان شىعىپ ۇلگەرەر ەدىك. بىزدە ءبىراز وندىرىستىك بازالار قالىپتاسىپ قوياتىن دا ەدى عوي. ءوز ءوزىمىزدىڭ يممۋنيتەتىمىزدى قالىپتاستىرىپ، ءوز ءوزىمىزدى قورعاۋعا قاۋقارلى بولار ەدىك...
اڭقاۋ ءارى اقىماقتاۋمىز. بىزگە ءبارى وزدىگىنەن بولا سالادى دەگەن يلليۋزياعا بەرىلۋ باسىم. سوعان سەنىپ جۇرگەنىمىزدەن وسىلاي بولىپ جاتىر.
بەكبولات قارجان،
"ادىرنا" ۇلتتىق پورتالى
