«قازاق تيتان» تاعى دا تاڭقالدىردى. كوپشىلىك اراسىندا قاجىمۇقان اتانىپ كەتكەن المات جۇمانوۆ بۇل جولى تاعى ءبىر رەكورد قويدى، دەپ حابارلايدى "ادىرنا" ۇلتتىق پورتالى.
ارقاسىنا 280 كەلى تۇيەنى كوتەرگەن الىپ، 4 توننا 68 كەلى بولاتىن ءۇش كولىكتى 13 مەتر جەرگە دەيىن سۇيرەپ گيننەس كىتابىنا ءوز اتىن قالدىردى. مۇنداي ءادىستى العاش رەت ءوزى ويلاپ تاپقان. تۇيە كوتەرۋ قالىپتى بولعاننان كەيىن، وسىنداي جاڭا ارەكەتكە باردىم دەپ وتىر. بۇل جولى الماس ءبىر ايعا جۋىق دايىندالعان ەكەن.
ەستەرىڭىزگە سالا كەتەيىك، المات بۇعان دەيىن 108 توننالىق پويىز ۆاگوندارىن تارتىپ رەكورد قويعان بولاتىن.
سونىمەن قاتار ايدىن نۇرجۇماۇلى دا ەلدى ەلەڭ ەتكىزەر ادىسپەن كولىك تارتىپ ءوز اتىن رەكوردتار كىتابىنا قالدىردى. ءتوس سۇيەگىنە ىلگىش ءىلىپ نەمىس ءاۆتوموبيلىن 63 مەتر جەرگە سۇيرەگەن ازامات بۇل ءادىس ءۇشىن تالاي ەڭبەك ەتكەنىن دە اتاپ ءوتتى. ويتكەنى، ءتوس سۇيەگىمەن نەبارى 10-15 كەلى سالماقتى عانا تارتۋعا بولادى ەكەن.
وسىلايشا، قازاقتىڭ قوس الىبى ءوز ەسىمدەرىن گيننەس كىتابىنا جازىپ، ەندى جاڭا بەلەستەردى باعىندىرۋ ءۇشىن ارى قاراي دا شىنىعا بەرەمىز دەپ وتىر.
وڭعار قابدەن،
"ادىرنا" ۇلتتىق پورتالى
