قازاقستاندىق انەل سىتدىقوۆا تمد مەملەكەتتەرى اراسىندا العاش بولىپ انتاركتيدانى ءجۇزىپ ءوتتى، دەپ حابارلايدى "ادىرنا" ۇلتتىق پورتالى.
انەل سىتدىقوۆا 750 مەتر قاشىقتىقتى 18 مينۋت 58.95 سەكۋندتا ەڭسەرگەن. بۇل ۋاقىتتا سۋدىڭ تەمپەراتۋراسى -1,4 گرادۋس بولعان.
«انتاركتيدانىڭ سۋلارىن ءجۇزىپ وتتىك. مەن ءۇشىن بۇل وتە سالقىن بولدى. سۋدىڭ سالقىندىعى -1,4 گرادۋس بولسا، جەلدىڭ جىلدامدىعى ساعاتىنا 35 شاقىرىم ەدى. ايسبەرگتەر مەن پينگۆيندەر اراسىندا ءجۇزۋدىڭ اسەرى بولەك. انتاركتيدا مۇزداي قۇشاعىن اشقان از عانا ادامنىڭ قاتارىندا بولۋ مەن ءۇشىن ەرەكشە وقيعا بولدى»، - دەيدى انەل سىتدىقوۆا.
انەلدىڭ ايتۋىنشا، انتاركتيدادا وتكىزىلگەن 10 كۇن ىشىندە ولار ءجۇزۋ ءۇشىن قولايلى ءساتتى كۇتكەن. سونىمەن قاتار، كەمەدە تاعى 150 جولاۋشى بولعاندىقتان، ولار كەمەنىڭ ءتارتىبىن ساقتاۋ كەرەك بولعان.
انەل سىتدىقوۆا — قازاقستاننىڭ العاشقى «تەمىر حانىمى» ترياتلوننان، العاشقى ايرونمەن جانە ۋلترامەن. بەس جىل بۇرىن ول العاشقىلاردىڭ ءبىرى بولىپ لا-مانش بۇعازىن (38 كيلومەتر) گيدروكوستيۋمسىز ءجۇزۋ ارقىلى قازاقستان اتىنان العاشقى جەتىستىگىن كورسەتكەن.
2022 جىلى جازدا انەل اقش-تا مانحەتتەن ارالىنىڭ اينالاسىندا 20 كوپىردەن ءوتىپ، 48,5 كيلومەتر قاشىقتىقتى باعىندىردى. بۇدان كەيىن ول لوس-اندجەلەستە الەمدەگى ەڭ ۇزىن مارافوندىق قاشىقتىقتاردىڭ ءبىرى — كاتالينا بۇعازىن (شامامەن 34 كيلومەتر) توقتاۋسىز ءجۇزدى.
كاتالينا، لا-مانش جانە مانحەتتەن اينالاسىنداعى 20 كوپىر — اشىق سۋداعى جۇزۋدەن الەمدىك «ۇشتىك كوروناعا» (Triple Crown of Open Water) كىرەدى. وسىلايشا، انەلگە «ۇشتىك كورونا حانشايىمى» اتاعى بەرىلىپ، ول «ۇشتىك كورونا» كلۋبىنىڭ مۇشەسى اتاندى. تمد كەڭىستىگىندە بۇنداي جەتىستىككە ەشكىم جەتكەن جوق.
انەل وتباسىمەن بىرگە انگلياداعى لوندونعا جاقىن جەردە تۇرادى.
ەسكە سالا كەتەيىك، 2019 جىلدىڭ تامىزىندا پرەزيدەنت قاسىم-جومارت توقاەۆ لا-مانش بۇعازىن العاشقىلاردىڭ ءبىرى بولىپ جۇزگەن قازاق قىزىنا تاڭدانىسىن بىلدىرگەن بولاتىن.
