باۋىرجان بايبەكتىڭ مۇددەسىن قورعايتىن زاڭگەر ايجان تاشەنوۆا جانبولات ماماي مەن ونىڭ جۇبايى ينگا يمانبايدىڭ ۇستىنەن الماتى قالاسى اۋەزوۆ اۋدانى №2 اۋداندىق سوتىنا ازاماتتىق تارتىپپەن ار-نامىستى، ابىروي مەن ىسكەرلىك بەدەلدى قورعاۋ تۋرالى تالاپ ارىز بەردى. بۇل تۋرالى ول ءوزىنىڭ Facebook-پاراقشاسىندا ءمالىم ەتتى، دەپ حابارلايدى «ادىرنا» ۇلتتىق پورتالى azattyq-ruhy.kz سايتىنا سىلتەمە جاساپ.
زاڭگەردىڭ ايتۋىنشا، اتالعان تالاپ ارىزدى بەرۋگە ج.ماماي مەن ي.يمانباەۆانىڭ بيىل 13 ساۋىردە «دەموكراتيالى قازاقستان/دەموكراتيچەسكي كازاحستان» youtube-ارناسىندا جانە الەۋمەتتىك جەلىلەردە ورنالاستىرعان بىرقاتار بەينەماتەريالدارى نەگىز بولىپ وتىر.
«جاريالانعان ماتەريالداردا جاۋاپكەرلەر «جۋرناليستىك زەرتتەۋدى» سەبەپ ەتىپ، ب.بايبەكتى سىبايلاس جەمقورلىقپەن جانە قىزمەت بابىن اسىرا پايدالاندى دەپ جاريا تۇردە، ءۇزىلدى-كەسىلدى جانە دالەلسىز ايىپتايدى. اتالعان ماتەريالدارعا جاسالعان تالداۋ بەينەروليكتەردە جالعىز اقپارات كوزى – انونيمدىك «Uzyn Qulaq» تەلەگرام-ارناسىنىڭ اقپاراتىن عانا نەگىزگە العان. بۇل ارنا – وسەك-اياڭدى، دولباردى، تەكسەرىلمەگەن جانە شىندىققا جاناسپايتىن اقپاراتتى تاراتۋمەن اينالىساتىنى ءمالىم.تالاپكەر (ب. بايبەك) اتىنا قاراتا ايتىلعان ايىپتاۋلاردىڭ بۇدان بولەك شىنايى دالەلدەمەلىك بازاسى مەن راستالعان دەرەگى ج.ماماي مەن ي.يمانباەۆانىڭ بەينەماتەريالدارىندا دا، تىركەلمەگەن قدپ سايتىندا دا ۇسىنىلماعان. سوندىقتان ازاماتتىق زاڭناما اياسىندا ءبىز بەينەماتەريالدار اۆتورلارى ايىپتاۋلارىنىڭ نەگىزسىزدىگى مەن ماعىناسىزدىعىن دالەلدەۋگە نيەتتەنىپ وتىرمىز»، - دەدى ول.
بيىل 19 ساۋىردە باۋىرجان بايبەك قاجەتتى رەسمي قۇجاتتار مەن باسقا دا ماتەريالداردى كورسەتە وتىرىپ، بارلىق ايىپتاۋلاردى جاريا تۇردە جوققا شىعارعان بولاتىن. ج.ماماي مەن ي.يمانباەۆانىڭ ايتقان سوزدەرىنىڭ جالعان ەكەنىن ايتقان ب.بايبەك ءوزىنىڭ ار-نامىسىن، ابىرويى مەن بەدەلىن سوت ارقىلى قورعاۋ قۇقىعىن پايدالانۋ جونىندە شەشىم قابىلداعان. زاڭگەردىڭ مالىمەتىنشە، قولدانىستاعى زاڭناماعا سايكەس، بايبەك جاۋاپكەرلەردى قىلمىستىق جانە اكىمشىلىك قۋدالاۋدان باس تارتىپ، ءىستى ازاماتتىق قاراۋمەن شەكتەلۋدى ءجون كورگەن. سونداي-اق، كەلتىرىلگەن مورالدىق زالالعا ماتەريالدىق وتەماقى ءوندىرىپ الۋدان دا باس تارتقان.
«جاۋاپكەرلەر ج.ماماي مەن ي.يمانباەۆا جاريا تۇردە ب.بايبەكتى جۇيەلى تۇردە سىبايلاس جەمقورلىققا باردى، سونداي-اق مەملەكەتتىك قىزمەتتە جۇرگەن كەزەڭدە قىزمەت بابىن اسىرا پايدالاندى دەگەن ايىپتاۋىندا سۇيەنگەن ايعاقتارى مەن قۇجاتتارىن ۇسىنۋى ءتيىس. ياعني، ايىپتاعان تاراپ مۇنى ناقتى فاكتىلەرمەن دالەلدەۋى قاجەت. سونىمەن قاتار باۋىرجان بايبەك جاۋاپكەرلەردىڭ وتىرىك ايىپتاۋلارىن تەرىسكە شىعاراتىن بارلىق قاجەتتى قۇجاتتار مەن فاكتىلەردى سوتقا ۇسىنۋ بويىنشا ءوز قۇقىعىن پايدالانادى. بۇل – اكىمدىكتىڭ 20-دان استام قاۋلىسى، سونىمەن قاتار باسقا دا قۇجاتتارمەن راستالعان مالىمەتتەر. ب.بايبەكتىڭ بەدەلىنە نۇقسان كەلتىرەتىن روليكتەر نەگىزىندە تالاپكەر «الماتى قالاسىنىڭ اكىمى لاۋازىمىندا بولعان 4 جىل ىشىندە جەكە بيزنەس-يمپەرياسىن قۇرا وتىرىپ، زاڭسىز 1 ميلليارد اقش دوللارىن تاپتى. قازاقفيلمنىڭ، اتاكەنتتىڭ جانە ىلە-الاتاۋ ۇلتتىق پاركىنىڭ جەرلەرىن قۇرىلىس سالۋعا جانە تۇراق جاساۋعا جەكە تۇلعالارعا بەردى. اۆتوبۋستار ساتىپ الۋدا پارا الدى. كومىر مافياسىن «قاناتىنىڭ استىنا الىپ»، الماتىداعى تەتس-2-ءنى گازعا كوشىرۋگە توسقاۋىل قويدى» دەپ جالعان ايىپتاۋعا بارعان. ياعني ماعان سەنىم بىلدىرگەن تۇلعانىڭ ەڭ الدىمەن الماتى اكىمى لاۋازىمىندا شارۋاشىلىق-ءبولۋ فۋنكتسيالارىن ورىنداعان كەزدەگى قىزمەتى قوزعالادى. ەندى مۇنىڭ بارلىعىن جاۋاپكەرلەر بوس مالىمدەمەلەرمەن ەمەس، ناقتى فاكتىلەر مەن قۇجاتتار نەگىزىندە دالەلدەۋى ءتيىس. سوندىقتان دا ءبىزدىڭ تالاپ ارىزىمىزعا، ەڭ الدىمەن، ج.ماماي مەن ونىڭ جۇبايىنىڭ تالاپكەردىڭ وڭتۇستىك مەگاپوليستىڭ باسشىسى رەتىندەگى جۇمىس كەزەڭىنە قاتىستى ايىپتاۋلارىن تەرىسكە شىعارۋ تالابى قويىلدى. سونداي-اق تالاپ ارىزعا تاۋەلسىز پسيحولوگيالىق-فيلولوگيالىق ساراپتاما قوسا بەرىلدى. ول ج.ماماي مەن ي.يمانباەۆانىڭ ايتقان سوزدەرى – ب.بايبەكتىڭ قىزمەتى تۋرالى جاريا تۇردە ايتىلعان جاعىمسىز اقپارات ەكەندىگىن، ولار شىندىققا جاناسپاعان جاعدايدا، تالاپكەردىڭ ار-نامىسىنا، ابىرويى مەن بەدەلىنە نۇقسان كەلتىرەتىن ايىپتاۋلار قاتارىنا جاتاتىنىن راستايدى»، - دەلىنگەن زاڭگەردىڭ جازباسىندا.
ايجان تاشەنوۆانىڭ ايتۋىنشا، ج.ماماي مەن ي.يمانباەۆاعا قاتىستى تالاپ ارىزدى سوت قاناعاتتاندىرعان جاعدايدا، اتالعان ازاماتتار ب.بايبەكتىڭ ار-نامىسى مەن ابىرويىنا نۇقسان كەلتىرەتىن ماتەريالداردى جويۋى، سونداي-اق ءتيىستى الەۋمەتتىك جەلىلەردە جانە YouTube-ارنادا بارلىق نەگىزسىز، شىندىققا جاناسپايتىن ايىپتاۋلارىن جوققا شىعارۋى ءتيىس.
