Baýyrjan Baıbektiń múddesin qorǵaıtyn zańger Aıjan Tashenova Janbolat Mamaı men onyń jubaıy Inga Imanbaıdyń ústinen Almaty qalasy Áýezov aýdany №2 aýdandyq sotyna azamattyq tártippen ar-namysty, abyroı men iskerlik bedeldi qorǵaý týraly talap aryz berdi. Bul týraly ol óziniń Facebook-paraqshasynda málim etti, dep habarlaıdy «Adyrna» ulttyq portaly azattyq-ruhy.kz saıtyna silteme jasap.
Zańgerdiń aıtýynsha, atalǵan talap aryzdy berýge J.Mamaı men I.Imanbaevanyń bıyl 13 sáýirde «Demokratııaly Qazaqstan/Demokratıcheskıı Kazahstan» youtube-arnasynda jáne áleýmettik jelilerde ornalastyrǵan birqatar beınematerıaldary negiz bolyp otyr.
«Jarııalanǵan materıaldarda jaýapkerler «jýrnalıstik zertteýdi» sebep etip, B.Baıbekti sybaılas jemqorlyqpen jáne qyzmet babyn asyra paıdalandy dep jarııa túrde, úzildi-kesildi jáne dálelsiz aıyptaıdy. Atalǵan materıaldarǵa jasalǵan taldaý beınerolıkterde jalǵyz aqparat kózi – anonımdik «Uzyn Qulaq» telegram-arnasynyń aqparatyn ǵana negizge alǵan. Bul arna – ósek-aıańdy, dolbardy, tekserilmegen jáne shyndyqqa janaspaıtyn aqparatty taratýmen aınalysatyny málim.Talapker (B. Baıbek) atyna qarata aıtylǵan aıyptaýlardyń budan bólek shynaıy dáleldemelik bazasy men rastalǵan deregi J.Mamaı men I.Imanbaevanyń beınematerıaldarynda da, tirkelmegen QDP saıtynda da usynylmaǵan. Sondyqtan azamattyq zańnama aıasynda biz beınematerıaldar avtorlary aıyptaýlarynyń negizsizdigi men maǵynasyzdyǵyn dáleldeýge nıettenip otyrmyz», - dedi ol.
Bıyl 19 sáýirde Baýyrjan Baıbek qajetti resmı qujattar men basqa da materıaldardy kórsete otyryp, barlyq aıyptaýlardy jarııa túrde joqqa shyǵarǵan bolatyn. J.Mamaı men I.Imanbaevanyń aıtqan sózderiniń jalǵan ekenin aıtqan B.Baıbek óziniń ar-namysyn, abyroıy men bedelin sot arqyly qorǵaý quqyǵyn paıdalaný jóninde sheshim qabyldaǵan. Zańgerdiń málimetinshe, qoldanystaǵy zańnamaǵa sáıkes, Baıbek jaýapkerlerdi qylmystyq jáne ákimshilik qýdalaýdan bas tartyp, isti azamattyq qaraýmen shektelýdi jón kórgen. Sondaı-aq, keltirilgen moraldyq zalalǵa materıaldyq ótemaqy óndirip alýdan da bas tartqan.
«Jaýapkerler J.Mamaı men I.Imanbaeva jarııa túrde B.Baıbekti júıeli túrde sybaılas jemqorlyqqa bardy, sondaı-aq memlekettik qyzmette júrgen kezeńde qyzmet babyn asyra paıdalandy degen aıyptaýynda súıengen aıǵaqtary men qujattaryn usynýy tıis. Iaǵnı, aıyptaǵan tarap muny naqty faktilermen dáleldeýi qajet. Sonymen qatar Baýyrjan Baıbek jaýapkerlerdiń ótirik aıyptaýlaryn teriske shyǵaratyn barlyq qajetti qujattar men faktilerdi sotqa usyný boıynsha óz quqyǵyn paıdalanady. Bul – ákimdiktiń 20-dan astam qaýlysy, sonymen qatar basqa da qujattarmen rastalǵan málimetter. B.Baıbektiń bedeline nuqsan keltiretin rolıkter negizinde talapker «Almaty qalasynyń ákimi laýazymynda bolǵan 4 jyl ishinde jeke bıznes-ımperııasyn qura otyryp, zańsyz 1 mıllıard AQSh dollaryn tapty. Qazaqfılmniń, Atakenttiń jáne Ile-Alataý ulttyq parkiniń jerlerin qurylys salýǵa jáne turaq jasaýǵa jeke tulǵalarǵa berdi. Avtobýstar satyp alýda para aldy. Kómir mafııasyn «qanatynyń astyna alyp», Almatydaǵy TE-2-ni gazǵa kóshirýge tosqaýyl qoıdy» dep jalǵan aıyptaýǵa barǵan. Iaǵnı maǵan senim bildirgen tulǵanyń eń aldymen Almaty ákimi laýazymynda sharýashylyq-bólý fýnkııalaryn oryndaǵan kezdegi qyzmeti qozǵalady. Endi munyń barlyǵyn jaýapkerler bos málimdemelermen emes, naqty faktiler men qujattar negizinde dáleldeýi tıis. Sondyqtan da bizdiń talap aryzymyzǵa, eń aldymen, J.Mamaı men onyń jubaıynyń talapkerdiń ońtústik megapolıstiń basshysy retindegi jumys kezeńine qatysty aıyptaýlaryn teriske shyǵarý talaby qoıyldy. Sondaı-aq talap aryzǵa táýelsiz psıhologııalyq-fılologııalyq saraptama qosa berildi. Ol J.Mamaı men I.Imanbaevanyń aıtqan sózderi – B.Baıbektiń qyzmeti týraly jarııa túrde aıtylǵan jaǵymsyz aqparat ekendigin, olar shyndyqqa janaspaǵan jaǵdaıda, talapkerdiń ar-namysyna, abyroıy men bedeline nuqsan keltiretin aıyptaýlar qataryna jatatynyn rastaıdy», - delingen zańgerdiń jazbasynda.
Aıjan Tashenovanyń aıtýynsha, J.Mamaı men I.Imanbaevaǵa qatysty talap aryzdy sot qanaǵattandyrǵan jaǵdaıda, atalǵan azamattar B.Baıbektiń ar-namysy men abyroıyna nuqsan keltiretin materıaldardy joıýy, sondaı-aq tıisti áleýmettik jelilerde jáne YouTube-arnada barlyq negizsiz, shyndyqqa janaspaıtyn aıyptaýlaryn joqqa shyǵarýy tıis.
