ەندى كەز-كەلگەن قالا تۇرعىنى جەرگىلىكتى تىركەلگەن ەمحاناسىنا بارىپ، كوۆيدكە قارسى ۆاكتسينا الۋىنا بولادى. بۇل تۋرالى بۇگىن قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ ءباسپاسوز ماجىلىسىندە مالىمدەدى.
باسقارما باسشىسىنىڭ سوزىنشە، ەكپەدەن الدىن ازامات مىندەتتى تۇردە دارىگەردىڭ تەكسەرۋىنەن وتەدى. كەرى كورسەتىلىمدەر بولماسا، ءوز ەركىمەن كەلىسىم بەرگەن ادامعا كوۆيدكە قارسى ۆاكتسينا سالىنادى. كوۆيدكە قارسى ۆاكتسينا سالدىرعىسى كەلگەن ازاماتتارعا جەرگىلىكتى ەمحانالارىندا ەكپە ەگۋ جۇمىستارى جۇرگىزىلەدى.
– قالا تۇرعىندارىن كوۆيدكە قارسى ۆاكتسينا سالدىرتۋعا شاقىرامىز. ءوز ەركىمەن كەلىسىم بەرگەن جاعدايدا، دارىگەر مىندەتتى تۇردە تەكسەرەدى. الدا ورازا ايىن ەسكەرىپ، سەنبى جانە جەكسەنبى كۇندەرى دە ەكپە ەگۋ پۋنكتەرى قارقىندى جۇمىس ىستەيتىندىگىن ايتقىم كەلەدى. ۆاكتسيناعا كەرى كورسەتىلىمى جوق، 18 جاستان اسقان ءاربىر تۇرعىن ۆاكتسينا الۋعا نيەت ەتسە، جەكە كۋالىگىمەن تىركەلگەن ەمحاناسىنا بارۋ قاجەت، – دەيدى باقىتجان پوزيلوۆ.
ءوز ەركىمەن ۆاكتسينا سالدىرعىسى كەلەتىندەردى تولىقتاي قامتاماسىز ەتۋ ءۇشىن قالاعا تاعى 30 000 دوزا كوۆيدكە قارسى ۆاكتسينا جەتكىزىلدى. قازىر قالادا 37 ەكپە ەگۋ پۋنكتى بار. ونىڭ 14-ءى مەملەكەتتىك بولسا، قالعاندارى تەگىن كەپىلدەندىرىلگەن مەديتسينالىق كومەك اياسىندا حالىققا قىزمەت كورسەتەتىن جەكەمەنشىك ەمدەۋ مەكەمەلەرى.
شىمكەنت قالاسى اكىمدىگىنىڭ ءباسپاسوز قىزمەتى
